Хуули дабталга 18 - Библи

Санаартанай хуби

¹ Израилиин бүхы улад зоной газарай хуби абажа байхадань, Левиин санаарта обогтон иимэ юумэндэ хүртэхэгүй. Хубинь – Эзэндэ үргэдэг үргэлнүүд, тэдээгээр тэдэ хооллохо.

² Бусад обогой зондо орходоо левидүүд газарай өөрын хубигүй байха. Эзэнэй тэдээндэ айладаһанай ёһоор, Эзэн лэ Өөрөө тэдэнэй хуби мүн.

³ Арад түмэнэй үргэлһөө санаартанай абаха хубинь гэбэл, үргэжэ байһан үхэр гү, али хониной хоёр үргэн, гэдэһэ дотор болоно.

⁴ Орооһоной, үзэмэй дараһан архиин, оливын тоһоной дээжэ, хонидһоо хайшалһан түрүүшын нооһо тэрээндэ мүн лэ үгэгты.

⁵ Юуб гэхэдэ, Өөрынь урда зогсожо, хэтын хэтэдэ алба хэхыень Левий гэгшын үри һадаһадые бүхы обогуудһаатнай Эзэн Бурхантнай шэлээ ха юм.

⁶ Израилиин ямар нэгэн хотодо ажаһуудаг левит Эзэнэй нангин үргөөдэ дураараа өөрөө ерэжэ,

⁷ Эзэндэ алба хэдэг бусад левидүүдтэл адли, Эзэн Бурхандаа алба хэбэл,

⁸ тэдэнтэй адли эдеэ хоолдо хүртэдэг байха, мүн эсэгэһээ абаһан хубияа худалдажа, мүнгэеэ өөртөө үлөөхэ эрхэтэй.

Хүүгэдээ шатаан үргэхэ хорюултай

⁹ Эзэн Бурханайнгаа үгэжэ байһан газарта ерэхэдээ, тэндэхи арадуудай хэжэ байһан жэгшүүритэй муухай юумэ хэжэ бү һурагты.

¹⁰ Хүбүүгээ гү, али басагаяа гал дээрэ шатаажа үргэхэ ёһогүйт. Ерээдүйе айладагша, тааха шэдитэн, юумэ харадаг хүн, эльбэ жэльбэтэй нэгэн таанадай дунда бү байг,

¹¹ шэбшэдэг эльбэшэд, үхэһэн хүнэй һүнэһэ дуудагшад, шэдитэн, наһа бараһан зонтой хөөрэлдэдэг зон танай дунда бү үзэгдэг лэ.

¹² Эдэ бүгэдые хэдэг зониие Эзэн үзэн ядадаг. Иимэ жэгшүүритэй муухай хэрэгүүдэй түлөө Эзэн Бурхантнай тэдэ арадуудһаа газарыень абажа, таанадта үгэхэ.

¹³ Эзэн Бурханайнгаа урда түгэс арюун байгты.

¹⁴ Танай үлдэн гаргаха тэдэ арадууд юумэ таадаг шэдитэй зониие, ерээдүйе айладхагшадые шагнадаг. Харин Эзэн Бурхантнай таанадта энээниие даалгаа бэшэ!

Лүндэншые эльгээхэл!

¹⁵ Таанадай дундаһаа намдал адли лүндэншые Эзэн Бурхантнай элирүүлэн гаргаха. Тэрэнэй үгэ дуулаха ёһотойт.

¹⁶ Хорээб хадын дэргэдэ сугларһан тэрэ үдэр гээгдэхэһээ айжа, таанад Эзэнэй дуу хоолойе дахин шагнахагүй тухай, тэрэ ехэ гал дүлэн бэшэ үзэхэ харахагүй тухай гуйгаа бэлэйт.

¹⁷ Эзэн намда иигэжэ айладаа һэн: «Тэдэнэй хэлээшэнь зүйтэй.

¹⁸ Шамдал адли лүндэншые өөһэдынь дундаһаа тодоруулан гаргахаб, тиигээд юу хэлэхыень тэрээндэ заажа үгэхэб. Минии бүхы захиралтые тэрэ арад зондо хэлэжэ байха.

¹⁹ Тэрэнэй Минии нэрэһээ хэлэһэн үгэнүүдые хэн нэгэнэй дуулаагүй гээшэ һаань, Би тиимэ хүниие хэһээхэб!

²⁰ Минии айладаагүй юумэ Минии нэрэһээ лүндэншын ярибал, мүн ондоо бурхадай нэрэһээ хэлэбэл, иимэ лүндэншэ үхэхэ ёһотой».

²¹ «Эзэнэй айладаагүй үгэ тэрэ хэлэнэ гээд хаанаһаа мэдэхэ гээшэбибди?» – гэжэ досоогоо һанажа болохот.

²² Хэрбээ лүндэншын Эзэнэй нэрэһээ хэлэһэн зүйл болоогүй, бэелүүлэгдээгүй байбал, тэрэнь Эзэнэй айладхаһан үгэ бэшэ. Тэрэниие лүндэншын өөрын дураар хэлэһэн һэн тула таанад тэрэ лүндэншэһөө бү айгты.