Хуули дабталга 17 - Библи

¹ Дутагдал зэмдэгтэй үхэр гү, али хони Эзэн Бурхандаа бү үргэгты. Юуб гэхэдэ, энэ хадаа Эзэн Бурхандатнай жэгшүүритэй муухай юумэн гээшэ.

^2-3 Эзэн Бурханайтнай танда үгэһэн ямар нэгэн хото соо хэн нэгэн, эрэ хүн гү, али эхэнэр, Тэрэнэй үзэн ядадаг муу юумэ хэжэ, ондоо бурхадта мүргэжэ, нара, һарада гү, али огторгойн одо мүшэдтэ зальбаржа, Тэрээнтэй байгуулһан хэлсээгээ эбдээ гээшэ һаань,

⁴ иимэ муу юумэ дуулаа һаа, һайса шалгагты. Үнэн дээрээ иимэ бузар муухай хэрэгэй Израильда үзэгдөө хадань,

⁵ иимэ муу юумэ хэһэн тэрэ эрэ хүниие гү, али тэрэ эхэнэрые хотын бартаануудай хажууда абаашажа, шулуудажа алагты.

⁶ Муу юумэ хэһыень нэгэ хүнэй гэршэлхэдэ, алажа бү байгты. Харин хоёр гү, али үшөөшье олон хүнэй энээниие баталан гэршэлжэ байгаа хадань, тэрэ хүн хороогдохо ёһотой.

⁷ Тэрэниие алахын тула эгээн түрүүн гэршэ зон шулуу шэдэжэ эхилхэ ёһотой. Удаань бусад зон шулуу шэдэхэ, иигэжэ өөһэдынгөө дундаһаа муу юумэ арилгагты.

Зарга шүүбэри

⁸ Ямар нэгэн хэрэгүүдые, жэшээнь, хүниие хорооһон ушар гү, али хоёр хүнэй зөөри зөөшын талаар арсалдаае, үгышье һаа, хэнииеб даа гэмтээһэн хэрэгые нютагай шүүбэрилэгшэд шиидхэжэ шадахагүй байбалнь, бартаануудай хажууда ондо ондоо һанамжануудай гарабалнь, Эзэн Бурханайнгаа нангин үргөөдэ ошогты.

⁹ Левит санаартадта ба тэрэ үедэ хэрэгүүдые шиидхэн шүүбэрилжэ байгаашада ерэжэ асуухадатнай, юу хэхые тэдэнэр хэлээд үгэхэ.

¹⁰ Эзэнэй нангин үргөө соо тэдэнэр шиидхэбэри соносхохо. Тэдэнэй шиидхэбэри дүүргэхэ, хэлэһыень бултыень жэншэдгүй сахиха, гүйсэдхэхэ ёһотойт.

¹¹ Тэдэнэй таанадта заабарилһан һургаалай ёһоор лэ, хэлэһэн соонь лэ хэрэг бүтээгээрэйгты. Шиидхэбэрииень бү хазагайруулагты, нарибшалаарайгты.

¹² Эзэн Бурханайтнай албатан болохо санаартанай гү, али шүүбэрилэгшын үгэнүүдые дуулангүй һөөргэдэһэн хүн үхэхэ ёһотой. Иигэжэ муу юумэн Израиль сооһоо үгы хэгдэхэ жэшээтэй.

¹³ Бүхы арад зон энээн тушаа дуулажа һүрдэг, дахин тиимэ һөөргэдэхэ ябадал хэншье бү гаргаг.

Хаанай уялганууд тушаа

¹⁴ Эзэн Бурханайнгаа үршөөн дамжуулжа байһан газарта ерэжэ эзэмдээд, ажаһуужа эхилхэдээ, «маанадые тойрон ажаһуугша арадуудтал адляар, өөһэдтөө хааниие залая» гээд шиидэбэл,

¹⁵ Эзэн Бурханайнгаал шэлэһэн хүниие өөһэд дээрээ хаанаар залаха ёһотойт. Таанадай нэгэн хаантнай болуужан, хариин хүниие өөрынгөө хаан болгожо бү табигты.

¹⁶ Хаан хадаа өөртөө моридойнгоо тоо олошоруулжа байха ёһогүй, моридые олоор абахын тула зониие Египет руу эльгээжэ байха ёһогүй. Юуб гэхэдэ, Эзэн «Тиишээ, энэ харгыгаар һөөргөө бусахагүйт» – гэжэ таанадта айладаа һэн шуу.

¹⁷ Мүн тиихэдэ тэрэ олон һамгатай байха ёһогүй. Юуб гэхэдэ, тэрэ иигэжэ Эзэнһээ холодожо магад. Тэрэ өөртөө алта мүнгэ угаа ехээр суглуулха ёһогүй.

¹⁸ Хаан шэрээдэ залархадаа, левит санаартадта хадагалагдадаг номһоо һургаал тэрэ өөртөө буулгажа бэшэг.

¹⁹ Тэрэ номые өөртөө баряад байг, бүхы наһан соогоо тэрэниие уншаг. Юуб гэхэдэ, хаан гээшэ Эзэн Бурханаа хүндэлжэ һураха, энэ һургаалые болон хуулинуудые гүйсэд дүүргэхые оролдохо ёһотой.

²⁰ Тиигэбэл, хаан арад зондоо дээрэлхэжэ байхагүй, захяа заабаринуудһаа баруун, зүүн тээшээ хазагайржа байхагүй. Тиимэл хаан ба тэрэнэй уг изагуур удаан саг соо Израилиин хаанта засагые гартаа баряад зонхилхол.