Хуули дабталга 16 - Библи

Паасха

¹ Авиив гэһэн һарада Паасха гэһэн һайндэр һайндэрлэжэ, Эзэн Бурханаа хүндэлэгты. Юуб гэхэдэ, авиив һарада һүниндөө Тэрэ таанадые Египедһээ гаргаа бэлэйл.

² Эзэнэй нангин үргөөдэ үхэр, хонёор Паасхын үргэл хээрэйгты. Энэ үргэл Эзэн Бурхандашни зорюулагдаха ёһотой.

³ Эһээһэн талхаар бариһан хилээмэ Паасхын үргэлтэй хамта бү эдигты. Долоон үдэр эһээбэригүй талхаар болгоһон хилээмэ Паасхын үргэлтэй хамта эдеэрэйгты, Египедэй газар дайдаһаа яаралтайгаар гаран ошоходоо иимэ хилээмэ эдеэ бэлэйлта. Эдигты энэ гай зоболонгой хилээмэ, Египедһээ гараһан тэрэ үдэрые амиды мэндэ байһан сагтаа һанан байгаарайт.

⁴ Танай газар нютагта долоон хоногой туршада хэндэшье эһээбэри байха ёһогүй. Тиихэдэ түрүүшын үдэр боро хараанаар үргэһэн мяханһаа үглөөгүүр болотор юуншье үлэнгүй эдигдэхэ ёһотой.

^5-6 Малаар Паасхын үргэл гансал Эзэнэй нангин үргөө соо хээрэйгты. Эзэн Бурханайтнай танда үршөөжэ байһан газарта хаа-хаанагүй иимэ үргэл хэжэ болохогүй. Үдэшэлэн, наранай орохо үедэ, таанадай Египедһээ гараһан сагта Паасхын үргэл хээрэйгты.

⁷ Эзэн Бурханайнгаа нангин үргөөдэ мяха шанажа эдеэрэйгты, тиигээд үглөөдэрынь гэртээ харихадатнай болохо.

⁸ Эһээбэригүй талхаар болгоһон хилээмэ зургаан хоногой туршада эдигты, харин долоодохи үдэртөө нангин суглаагаа үнгэргэжэ, ямаршье ажал бү хэгты.

Ургаса Хадалгын һайндэр

⁹ Ургаса хадажа эхилһэн сагһаа хойшо долоо дахин долоон хоногые тоолоорой.

¹⁰ Тиигээд Эзэн Бурханайнгаа нэрэ хүндэдэ Ургаса хуряалгын һайндэр һайндэрлэгты, Эзэн Бурханайтнай таанадые үршөөһэнэй хэмжүүрээр, юрэдөө, шадалайнгаа аяар Тэрээндэ үргэл хээрэйгты.

¹¹ Эзэнэй нангин үргөөдэ таанад үхи хүүгэдтэеэ, зарасанараараа, левидүүдтэй, ерүүл зонтой, танай хотын үншэн хэнзэнүүдтэй, бэлбэһэн эхэнэрнүүдтэй хамта Эзэн Бурханайнгаа урда хүхилдэгты.

¹² Египедтэ богоол байһанаа бү мартагты, тиигэжэ эдэ хуулинуудые сахин гүйсэдхөөрэйгты.

Майхангуудай һайндэр

¹³ Таряагаа тээрмэдэһэнэй, үзэмэй модонойнгоо шүүһэ даража дүүргэһэнэй удаа Майхангуудай һайндэр һайндэрлэгты.

¹⁴ Таанад үхи хүүгэдээрээ, богоолнуудтаяа, левидүүдтэй, ерүүл зонтой, танай хотын үншэн хэнзэнүүдтэй, бэлбэһэн эхэнэрнүүдтэй хамта һайндэрэй үедэ хүхилдэгты.

¹⁵ Эзэнэй нангин үргөөдэ долоон хоногой туршада Тэрэниие магтан һайндэрлэгты. Ургасыетнай, бүхы ажал хэрэгүүдыетнай Эзэн Бурханай үреэһэн ушарһаа таанад сэдьхэл дүүрэн сэнгэгты.

¹⁶ Танай үндэһэ яһанай бүхы эрэ зон Эзэн Бурханайнгаа нангин үргөөдэ жэлдээ гурба дахин ерэхэ ёһотой: Паасхын, Ургаса хуряалгын һайндэр болон Майхангуудай һайндэрнүүдэй үедэ. Ерэхэдээ, Эзэнэй урда гар хооһон бү ерэгты.

¹⁷ Эзэн Бурханайнгаа үршөөн үгэһэнэй хэмээр, шадалайнгаа аяар хүн бүхэн бэлэг асараг лэ.

Зарга хэрэгүүдые шиидхэлгэ

¹⁸ Эзэн Бурханайнгаа үршөөһэн бүхы хото соо обог бүхэндэ хэрэг шүүн шиидхэгшэдые болон ахамадуудые томилон табигты. Тэдэнэр улад зоной хэрэгүүдые зүбөөр шиидхэжэ байг лэ.

¹⁹ Тэдэ хуули гурим хазагайруулха, нюур илгажа байха ёһогүй. Эдилгэ бү аба, юуб гэхэдэ, эдилгэ хадаа сэсэн хүниие һохор болгодог, үнэн шударга хүниие худалша болгодог.

²⁰ Үнэн шударга, гансал үнэн шударга байхаяа эрмэлзээрэй! Тиигэбэл, Эзэн Бурханайнгаа үгэжэ байгаа газарые эзэмдэн, амар мэндэ ажаһуухат.

Бусад бурхадые шүтэлгэ

²¹ Эзэн Бурхандаа үргэлэй шэрээ бүтээхэдээ, Ашэраа бурханай модо хажуудань бү һуулгагты, ямаршье модо бү һуулгагты.

²² Шүтөөнүүдтэ мүргэхэ шулуун бахана бү бодхоогты, юуб гэхэдэ, Эзэн Бурхантнай энээниие үзэн ядадаг.