Хуули дабталга 14 - Библи

Гашуудалай хорюултай ёһолол

¹ Таанад Эзэн Бурханайнгаа арад зон болонот. Хэн нэгэнэй наһа барахада, гашуудалай тэмдэг харуулан, өөһэдыгөө хадхажа, отолжо бү байгты, магнай дээрэхи үһэеэ бү хюһагты.

² Юундэб гэхэдэ, таанад Эзэн Бурханай нангин арад ха юмта. Дэлхэйн арадууд сооһоо Эзэн таанадыел Өөрынгөө арад болгохо гэжэ шэлэһэн байна.

Сээргүй ба сээртэй амитад

³ Жэгшүүритэй муухай ямаршье юумэ бү эдигты.

⁴ Таанадай эдижэ болохо амитад гэбэл: үхэр, хонин, ямаан,

⁵ буга, зээрэн, боро гүрөөһэн, янгир, зэрлиг буха, оронго, аргали.

⁶ Асатаһан туруутай, хибэдэһэ хибэдэг мал эдихэдэтнай болохо.

⁷ Гансал тэмээ, туулай, дорго бү эдигты, юундэб гэхэдэ, тэдэнэр хибэдэһэ хибэдэгшье һаа, харин аса туруугүй. Тэдэнэр таанадта сээртэй.

⁸ Тиигээд гахай аса туруутай байбашье, харин хибэдэһэ хибэдэггүй, тиимэһээ танда бузартай байха. Тэдэнэй мяханһаа бү эдигты, һэедэньшье гар бү хүрэгты; танда бузартай байха.

⁹ Уһанай амитадһаа һэрбээтэй болон хашарһатай амитадые таанадай эдихэдэ болохо.

¹⁰ Зүгөөр һэрбээгүй, хашарһагүй амитадые бү эдигты: тэдэ танда бузартай байха.

¹¹ Сээргүй ямаршье шубуу эдихэдэтнай болохо,

^12-18 харин элдэб янза түрэлэй иимэ шубуудые эдижэ болохогүй: бүргэд, бэгсэргэ, харсага, нашан харсага, элеэ, ёло, хирээ, тэмээн хяруул, шара шубуун, сахали, хилэн шубуун, хүхэ дэглээ, хотон шубуун, суусагаалжан, бүбөөлжэн, һарьһан баабгай.

¹⁹ Далитай бүхы хорхой шумуул таанадта сээртэй, тиимэһээ тэдэниие бү эдигты,

²⁰ харин сээргүй алишье шубуу эдихэдэтнай болохо.

²¹ Үхэһэн амитадай һэе бү эдигты. Танай хотодо байгша ерүүл хариин хүндэ тэрэниие үгэгты, үгышье һаа, худалдагты, тэрэ эдиг. Юуб гэхэдэ, таанад Эзэн Бурханайнгаа нангин арад ха юмта. Эшэгые эхынь һүн соо бү шанагты.

Арбанай нэгэ хуби тухай

²² Жэл бүри ургуулдаг ургасынгаа арбанай нэгэ хубиие амяарлан орхи.

²³ Тиигээд Эзэн Бурханайнгаа нангин үргөөдэ ошожо, Тэрэнэй урда таряанайнгаа, үзэмэй дараһан архиингаа, оливын тоһоной арбанай нэгэ хубииень, мал һүрэгэйнгөө түрүүшын түл эдеэрэй. Иигэжэ ши Эзэн Бурханаа хододоо хүндэлжэ, түбэгшөөжэ һурахаш.

²⁴ Эзэн Бурханайтнай нангин үргөө шамһаа холо байба гэел даа. Тэрэнэй үршөөһэн ургаса, мүн түлэй арбанай нэгэ хубиие тиишэнь абаашажа шадахагүй байгаа һаа,

²⁵ эдэ бүгэдэеэ худалдаад, мүнгэн болгоод, Эзэн Бурханайнгаа нангин үргөөдэ тэрэ мүнгөө абаад ошоорой.

²⁶ Тиигээд тэрэ мүнгөөрөө һанаһан юумэеэ худалдан аба: үхэр, хони, үзэмэй дараһан архи, шара ундаа, һанаһан бүхы юумэеэ. Гэр бүлэтэеэ хамта тэндэ Эзэн Бурханайнгаа урда эдеэлэ, сэнгэ.

²⁷ Гэбэшье шинии хотодо ажаһуудаг левидүүд тухай бү марта. Юундэб гэхэдэ, шамда орходоо тэдээндэ газарай хуби үгы ха юм.

²⁸ Гурбан жэлэй үнгэрхэ эсэстэ жэлэй ургасын, мүн түлэйнгөө арбанай нэгэ хубиие суглуулжа, хото соогоо нөөсэлдэг бай.

²⁹ Тиихэдэш өөрын хубиин газаргүй левидүүд, ерүүл зон, шинии хотын үншэн хэнзэнүүд, бэлбэһэн эхэнэрнүүд ерэжэ, садатараа эдеэлжэ байг. Иигээд байгаа һаашни, Эзэн Бурханшни хэһэн хэрэг бүхэнииеш үреэхэл.