Хуули дабталга 13 - Библи

Ондоо бурхадта шүтэхые уряалһан хүнэй амиие һүнөө

¹ Таанадай дунда лүндэншэ гү, али зүүдэ тайлбарилагша бии болоод, дүлгэ тэмдэг гү, али гайхамшагта үзэгдэл харуулхаяа найдуулжа,

² тэдэ тэмдэгүүдэйнь нээрээ бэелүүлэгдэшоо гээшэ һаань, танихагүй ондоо бурхадта шүтэдэг болохыетнай тэрэ таанадта идхан хэлэжэ магад.

³ Тэрэ лүндэншые гү, али зүүдэндээ юумэ харадаг хүниие бү шагнагты; юуб гэхэдэ, Эзэн Бурхантнай Намда бүхы зүрхэ сэдьхэлһээ дуратай гээшэ гүт гэжэ мэдэхын тула таанадые туршажа байна гээшэл.

⁴ Эзэн Бурханаа шүтэн ябагты, Тэрэниие хүндэлэгты! Захяа заабаринуудыень сахигты, үгыень дуулагты! Тэрээндэ мүргэгты, Тэрээндэ үнэн сэхэ байгты!

⁵ Эзэн Бурханайтнай захиһан замһаа таанадые хадууруулхаяа һанажа уряалһан, Египедэй газар дайдаһаа гаргаһан, богоол байдалһаатнай мултаруулһан Эзэн Бурхандаа урбахыетнай тухирдаг тэрэ лүндэншые гү, али зүүдэндээ юумэ харадаг хүниие хороохо хэрэгтэй. Өөһэдһөө муу юумэ зайсуулха ёһотойт.

⁶ Шамда дүтэ хэн нэгэн – аха, дүүшни, хүбүүншни гү, али басаганшни, дуратай һамганшни гү, али анда нүхэршни шинии, мүн үбгэ эсэгэнэрэйшни мэдэхэ танихагүй ондоо бурхадта мүргэдэг болохыеш һэмээхэнээр үгэдөө оруулха һанаатай, «ошожо, ондоо бурхадта зальбардаг болоё» гээд хэлээ һаань,

⁷ танай хажууда, мүн холошье ажаһуудаг, дэлхэйе нэгэ захаһаа нүгөө заха хүрэтэр дүүргэдэг арадуудай бурхадта мүргэдэг болохыешни аргадажа эхилээ һаань,

⁸ тэрэнэй үгэдэ бү оро, бү шагна, нигүүлэсхы зан бү гарга, тэрэниие бү хайрла, бү аршала.

⁹ Тэрэниие ала! Алахадаа, эхилээд ши тэрээндэ гар хүрэн, шулуу шэдээрэй, удаань бүхы арад зон гар хүрэхэ.

¹⁰ Шулуу шэдэн тэрэниие алаарай! Юуб гэхэдэ, Египедэй газар дайдаһаа гаргаһан, богоол байдалһаашни мултаруулһан Эзэн Бурханһаашни шамайе холодуулхые тэрэ һэдээ бшуу.

¹¹ Энэ ушар тушаа бүхы Израилиин улад зон дуулажа, һүрдэхэ, саашадаа иимэ муухай хэрэг хэншье хэхэеэ болихо.

¹² Ажаһуухынтнай тула Эзэн Бурханайтнай үгэһэн али нэгэн хотодо

¹³ танай арадай дунда өөдэгүй хүнүүд бии болоһон, «ошожо, ондоо, мэдэхэгүй бурхадта зальбардаг болоё» гээд хотын ажаһуугшадта хэлэнэ гэжэ дуулаа һаа,

¹⁴ мүрдэлгэ гүрдэлгэ ябуулагты, һайса мүшхэгты. Тиигээд иимэ жэгшүүритэй юумэнэй танай дунда үнэхөөр болоо гээшэ һаань,

¹⁵ тэрэ хотын ажаһуугшадые бултыень һэлмээр сабшагты, мал һүрэгыень мүн лэ һалгаагты. Тэрэ хотые дууһан үгы хэгты!

¹⁶ Зонойнь бүхы зөөри хотын талмай дээрэ суглуулагты. Удаань энэ хотые бүхы зөөритэйнь Эзэн Бурхандаа үргэн шатаагты. Энэ хото хэтэ мүнхэдөө һандархай шулуун үлэгдэл болоод лэ үлэхэ, хэзээдэшье дахин бодхоогдохо ёһогүй.

¹⁷ Тэрэ усадхагдаха юумэнһээ юундэньшье гар бү хүрэгты. Тиигэбэлтнай, Эзэнэй уур хилэн намдажа, Тэрэ таанадта үршөөл үгэхэ, хайрлаха, үбгэ эсэгэнэртэтнай тангариглаһанайнгаа ёһоор, таанадые үнэр арад болгохо.

¹⁸ Эзэн Бурханайнгаа үгыень дуулажа, минии мүнөө дамжуулжа байһан Тэрэнэй захяа заабаринуудые сахин, Эзэн Бурхандатнай таатай, һайн юумэ хэжэ байбалтнай, эдэ бүгэдэ гүйсэд бүтэхэ.