Хуули дабталга 10 - Библи

Хуулиин шэнэ хабтаһанууд

¹ Тэрэ үедэ Эзэн намда иигэжэ айладхаба: «Түрүүшынхидэл адли хоёр шулуун хабтаһа хайжа хэ, тэдэниие хадагалха модон ханза дархала, тиигээд Намда хада өөдэ гара.

² Шинии эбдэһэн түрүүшын хабтаһанууд дээрэ бэшээтэй байгаа үгэнүүдые Би тэрэ хабтаһанууд дээрэ бэшэхэб. Тиигээд ханза руу тэдэниие хээрэй».

³ Акаци модоор ханза хэбэб, урданайхидань адляар хоёр шулуун хабтаһа дархалбаб, тиигээд тэдэниие абаад, хада өөдэ гарабаб.

⁴ Танай сугларһан үдэр хада дээрэһээ, гал дүлэн сооһоо таанадта айладхаһан Өөрынгөө Арбан Зарлиг Тэрэ урдань бэшээтэйдэл адляар эдэ хабтаһанууд дээрэ бэшэжэ, намда үгэбэ.

⁵ Би һөөргөө эрьеэд, хадаһаа буубаб. Тиигээд Эзэнэй намда захирһанай ёһоор, өөрынгөө дархалһан ханза руу хабтаһануудые хэбэб. Тэрэ гэһэн сагһаа хойшо тэдэ тэндэл байгша юм.

⁶ (Израилиин арад зон Бээроот-Бэнээ-Якаанай уладай худагуудһаа Мосэроо хүрэтэр аян зам гаталба. Тэндэ Аһароон наһа баража, хүдөөлүүлэгдөө бэлэй. Тэрэнэй орондо Эльазаар хүбүүниинь санаартан болоо һэн.

⁷ Тэндэһээ тэдэнэр Гудгодаа руу зорибо, Гудгодааһаа гол горход элбэгтэй – Ётбаата хүрэтэр ошоо бэлэй.

⁸ Тэрэ үедэ Эзэн Левиин обогой зониие бусадһаа тусгаар илгажа, Өөрынгөө хэлсээнэй ханза абан ябахыень даалгаба. Тэдэнэр Эзэнэй урда зогсодог, санаартанай уялга дүүргэдэг, Тэрэнэй нэрээр зониие үреэдэг болобо. Мүнөөшье болотор тэдэ энэ ажалаа хэһээр.

⁹ Бусад уг гарбалнуудта орходоо Левиин обогой зон өөрын хуби газаргүй. Юуб гэхэдэ, Эзэн Өөрөө тэдэнэй хуби болоно. Эзэн Бурхантнай тэдээндэ тиигэжэ айладаа бэлэйл.)

¹⁰ Түрүүн байһандал адляар, хада дээрэ би дүшэн хоногой туршада байгааб. Эзэн дахин минии үгэ дуулажа, таанадые хюдахагүй гээд шиидээ һэн.

¹¹ Эзэн намда захирба: «Ошо, арад зоноо хүтэлжэ, урдань яба. Үгэхэб гэжэ танай үбгэ эсэгэнэртэ Минии тангариглан найдуулһан газар орон руу тэдэнэр орожо, эзэмдэг лэ».

Эзэн ямар эрилтэ табинаб

¹² Зай, Израилиин арад зон, Эзэн Бурхантнай таанадта гансал эрилтэтэй: Тэрэниие хүндэлэгты, Тэрэнэй зааһан замаар хододоо ябагты, Тэрээндэ дуратай байгты, үнэнхэ зүрхэнһөө Эзэн Бурхандаа һүгэдэгты.

¹³ Таанадта мүнөөдэр минии дамжуулһан Эзэнэй захяа заабаринуудые, хуули ёһонуудые сахигты. Тиигэбэлтнай, таанадта һайн байха.

¹⁴ Эгээл үндэр огторгойнуудшье, газар дэлхэй, мүн дээрэнь байгааша бүхы юумэн Эзэн Бурханайтнай мэдэлэй юм.

¹⁵ Теэд гансал танай үбгэ эсэгэнэртэ Эзэн дурлажа, тэдэнэй уг удам болохо таанадые бусад арадуудһаа шэлэн абаа. Мүнөөшье болотор таанад Тэрэнэй шэлэн абаһан арад зандаат.

¹⁶ Тиимэһээ энэ сагһаа хойшо Эзэнэй үгэ дууладаг бологты, саашадаа бү үсэрхэлдэгты.

¹⁷ Юуб гэхэдэ, Эзэн Бурхантнай бурхадай ехэ Бурхан, эзэдэй ехэ Эзэн, Тэрэ агууехэ, асари хүсэтэй, һүрөөтэй Бурхан. Тэрэ нюур илгажа байдаггүй, эдилгэ абадаггүй,

¹⁸ үншэн хэнзэнүүдые, бэлбэһэн эхэнэрнүүдые аршалдаг, ерүүл зондо дуратай, тэдээндэ эдеэ хоол, хубсаһа хунар үгэдэг.

¹⁹ Таанадшье ерүүл зондо налархай байгты, юуб гэхэдэ, өөһэдөө Египедэй газар дайдада ерүүл зон байгаа ха юмта.

²⁰ Эзэн Бурханаа хүндэлэгты, Тэрээндэ һүгэдэгты, Тэрээндэ хододоо үнэн сэхэ байгты. Гансал Тэрэнэйнгээ нэрээр тангариглагты.

²¹ Тэрэ – танай алдар соло, Тэрэ – танай Бурхан. Танай түлөө агууехэ, һүрдэмөөр хэрэгүүдые хэһыень өөһэдынгөө нюдөөр хараа ха юмта.

²² Далан халуун амин үбгэ эсэгэнэртнай Египет руу ерэһэн юм. Харин мүнөө Эзэн Бурхантнай таанадые огторгойн одо мүшэд мэтээр үнэржүүлээ.