Хэрэгүүд 8 - Библи

¹ Стефаниие алаһан хэрэг Саулда ехэ һайшаагдаба. Энэ үдэрһөө хойшо Иерусалимда һүзэглэгшэдые ехээр хашан мүрдэдэг болобо. Тиимэһээ элшэнэр лэ хотодо үлөөд, бусад һүзэглэгшэд булта Иудейн ба Самариин нютагуудаар тараба.

Саул һүзэглэгшэдэй бүлгэмые хашан мүрдэнэ

² Бурханда һүзэглэдэг зарим зон Стефаниие хүдөөлүүлхэдээ шаналан уйлаа һэн.

³ Харин Саул һүзэглэгшэдэй бүлгэмые һүйдхэдэг, гэрһээ гэртэ сүмэрэн орожо, эрэшүүл, эхэнэрнүүдые шэрэн гаргажа, түрмэдэ хаадаг байгаа.

Филипп Самариин нютагта номноно

⁴ Тэрьедэһэн хүнүүд бүхы ороноор таража, Һайн Мэдээсэл номноно.

⁵ Филипп Самариин нэгэ хото ороод, тэндэ Бурханай табисуурта тухай номноно.

⁶ Сугларһан олон зон Филиппэй хэлэһэн үгэнүүдые анхаралтайгаар шагнажа, бүтээһэн гайхамшагта үйлэ хэрэгүүдыень хаража байба.

⁷ Олон ада шүдхэрнүүдынь оог хашхараа табин гаража, олон саа үбшэнтэн болон дохолон хүнүүд эдэгэбэ.

⁸ Тиимэһээ тэрэ хотодо ехэ баяр тудаа.

⁹ Тэрэ хотодо эльбэ шэдиеэ харуулжа, бүхы самариин зониие гайхуулдаг Симон гэжэ нэрэтэй хүн ажаһуугаа. Тэрэ өөрыгөө агууехэб гэдэг,

¹⁰ тиин зон ехэ багагүй тэрэниие анхаран, «энэмнай Агууехэ гэгдэдэг Бурханай хүсэн», – гэжэ хөөрэлдэгшэ һэн.

¹¹ Симон олон жэлэй туршада эльбэ шэдеэрээ зониие тон ехээр гайхуулжа байһан тула тэрэниие хүнүүд анхаралтайгаар шагнадаг һэн.

¹² Гэбэшье тэдэ хүнүүд Бурханай хаан орон болон Иисүүс Христоосой нэрэ алдар тухай айладхаһан Филипптэ этигээд, эхэнэрнүүдтэйгээ, эрэшүүлтэйгээ булта уһаар арюудхуулба.

¹³ Симоншье өөрөө этигээд, уһаар арюудхуулаа. Филиппэй хойноһоо тэрэ хаа хаанагүй дахажа, тэрэнэй бүтээжэ байһан гайхамшагта үйлэ хэрэгүүдыень, дүлгэ тэмдэгүүдыень харахадаа, ехэтэ гайхадаг һэн.

¹⁴ Самариин зон Бурханай үгэ хүлеэжэ абаа гэжэ Иерусалимда байһан элшэнэр дуулахадаа, Пётр Иоанн хоёрые тэдээндэ эльгээбэ.

¹⁵ Тэдэ хоёр Самари хүрэжэ ерээд, Арюун Һүлдэ эдэ зондо үгтэһэй гэжэ зальбарба.

¹⁶ Юуб гэхэдэ, тэдэнэй хэндэшье үшөө Арюун Һүлдэ үгтөөгүй, тэдэ Эзэн Иисүүсэй нэрэ алдараар миин лэ уһаар арюудхуулһан байгаа.

¹⁷ Пётр Иоанн хоёрой гараараа адислахадань, тэдэнь Арюун Һүлдые тогтоон абаба.

¹⁸ Арюун Һүлдын үгтэжэ байхые Симон харахадаа, элшэнэртэ мүнгэ асаржа:

¹⁹ – Минии гараараа хүрэһэн хүн бүхэн Арюун Һүлдые тогтоон абажа байхын тула намда баһа иимэ хүсэ шэди олгожо хайрлыт даа, – гэжэ гуйба.

²⁰ – Ши мүнгэтэйгөө суг хосоро! Бурханай үршөөһэн бэлэгые мүнгөөр худалдаад абахаяа һанаа гүш? – гэбэ Пётр. –

²¹ Манай хэрэгтэ ши хубишье, эрхэшье үгыш, юундэб гэхэдэ, шинии зүрхэ сэдьхэлшни Бурханай урда сэбэр бэшэ.

²² Иимэ нүгэл хэхэеэ болижо, һанал бодолыешни хүлисэхыень Эзэниие гуй.

²³ Атаа жүтөөндэ, нүгэл шэбэлдэ баригданхай байхыешни би харанаб.

²⁴ Тиихэдэ Симон: – Хэлэһэн бүхы юумэнтнай намтай ушархагүйн тула та минии түлөө Эзэндэ зальбарыт даа, – гэжэ Пётрые гуйба.

²⁵ Һургаал номнолоо гэршэлэлгэнүүдээрээ баталан, Эзэнэй үгые айладхан, элшэнэр Иерусалимаа бусаба. Замдаа тэдэ Самариин олохон тосхон нютагуудаар ябажа, хүн зондо Һайн Мэдээсэл дуулгаба.

Филипп болон эфиоп түшэмэл

²⁶ Бурханай Эльгээмэл Филипптэ: – Бодоод, урагшаа яба. Иерусалимһаа Гааза ошоһон эзэгүй харгы дээрэ гара, – гэбэ.

²⁷ Филипп түхеэрээд гараба. Энэ үедэ эфиопой кандагай (али хатанай) түшэмэл, хатанай бүхы баялиг зөөриие сахигша, ордондо албалагша эфиоп хүнтэй тэрэ ушарба. Энэ хүн Иерусалимда мүргэл хээд,

²⁸ мүнөө ута тэргэ дээрээ һуугаад, лүндэншэ Исайн бэшэһые уншан, гэртээ бусажа ябаа.

²⁹ Арюун Һүлдэ Филипптэ: – Тэргэдэ дүтэлөөд, хажуудань яба, – гэжэ хэлэбэ.

³⁰ Тиигээд Филипп тэргэдэ гүйжэ ошоод, тэндэ һууһан хүнэй лүндэншэ Исайн ном уншажа байхыень дуулаба. – Уншажа байһан юумэеэ та ойлгоно гүт? – гэжэ Филипп тэрээнһээ һураба.

³¹ – Нэгэшье хүнэй намда тайлбарилжа үгэнгүй байхада, би хаанаһаа ойлгохобиб? – гэжэ тэрэнь харюусаба. Тиигээд Филиппые тэргэ дээрэ зэргэлээд һуухыень эфиоп уриба.

³² Тэрэнэй уншажа байһан номой хэһэг иимэ: «Үүсэлгэдэ абаашагдажа байһан хониндол адли, нооһо хиргагшын урда байһан хурьгандал адли Тэрэ абяа гараагүй.

³³ Зүб зарга шүүбэри хэхэ эрхэ олгонгүй Тэрэниие доромжолбо. Теэд Тэрэнэй үри һадаһад тухай хэн хэлэхэб? Газар түбидэ Тэрэнэй ами наһан таһалагдаа».

³⁴ – Хэлыт даа намда, энэ хэн тухай лүндэншэ хэлэнэб, өөр тухайгаа гү, али ондоо хүн тухай гү? – гэжэ түшэмэл Филиппһээ һураба.

³⁵ Филипп Нангин Бэшэгэй энэ хэһэгые түрүүн тайлбарилаад, һүүлдэнь Иисүүс тухай Һайн Мэдээсэл бултыень тэрээндэ дуулгаба.

³⁶ Замаа үргэлжэлүүлһээр тэдэнэр уһатай газарта хүрэжэ ерэбэд. – Энэ уһан байнал. Уһаар арюудхуулхадамни намда юун һаалта болоноб? – гэбэ түшэмэл.

³⁸ Түшэмэл Филипп хоёр уһанда оробо, Филипп эфиопые уһаар арюудхаба.

³⁹ Тэдэ хоёрой уһанһаа гарахадань, Эзэнэй Һүлдэ түшэмэл дээрэ тогтобо, харин Филиппые Бурханай Эльгээмэл дээшэнь дэгдээбэ. Түшэмэл тэрэниие ондоо хараагүй, гэбэшье ехэ баяртайгаар замаа саашань үргэлжэлүүлбэ.

⁴⁰ Харин Филипп Ашдоодто бии боложо, оршон тойронхи нютагуудаар ябажа, Һайн Мэдээсэл бүхы хотонуудаар номнон, Кесари хүрэжэ ерэбэ.