Хэрэгүүд 5 - Библи

Анания Сапфира хоёр

¹ Анания гэжэ нэрэтэй хүн Сапфира һамгатаяа хоюулан таряалан газараа худалдаад,

² хоорондоо зүбшэжэ, олзынгоо нэгэ хубииень өөртөө орхёод, үлэһыень элшэнэртэ асаржа үгэбэ.

³ Пётр: – Анания, таряалан газараа худалдаад, олоһон олзынгоо хубиие юундэ нюужа, Арюун Һүлдэдэ худалаар хэлээбши? Иихэдээ яатараа сатана шинии зүрхые эзэлээ юм?

⁴ Худалдахыншни урда тээ тэрэ таряалан газар шинии байгаа бэшэ гү? Тэрэ газараа худалдаһанайшье һүүлдэ мүнгэниинь баһа шинии мэдэлдэ байгаа бэшэ гү? Тиигэһэн хойно яагаад иимэ юумэ хэхэ гэһэн бодол өөрынгөө сэдьхэлдэ түрүүлбэш? Ши хүнүүдтэ худал юумэ хэлээ бэшэ, харин Бурханда худал юумэ хэлээш.

⁵ Эдэ үгэнүүдые дуулахадаа Анания амяа табин унаба. Болоһон ушар тухай дуулаһан хүнүүд бултадаа аргагүй ехээр айн һүрдэбэ.

⁶ Залуу һүзэглэгшэд ерэжэ, тэрэ үхэһэн хүниие бүдөөр орёогоод, газаашань гаргажа хүдөөлүүлбэ.

⁷ Юунэйшье болоһые мэдээгүй тэрэ хүнэй һамганиинь гурбан сагай үнгэрһэн хойно орожо ерээ.

⁸ Пётр тэрээнһээ: – Хэлыш даа, таанад таряалан газараа тэды мүнгөөр худалдаа гүт? – гэжэ һураба. – Тиимэ, тэды мүнгөөр, – гэжэ тэрэ эхэнэр харюусаба.

⁹ – Эзэнэй Һүлдые та хоёр яагаад туршаха гэбэт? Нүхэрыешни хүдөөлүүлһэн хүнүүд үүдэндэ дүтэлнэ, тэдэ шамайешье абажа гаргаха, – гэжэ Пётр тэрэ эхэнэртэ хэлэбэ.

¹⁰ Тэрэ эхэнэрынь удангүй хүлдэнь унажа, амяа табиба. Газааһаа ороһон залуу һүзэглэгшэд тэрэнэй наһа бараһые хараад, гэрһээ гаргаад, нүхэрэйнь хажууда хүдөөлүүлбэ.

¹¹ Һүзэглэгшэдэй бүлгэмэйхин бултадаа, мүн энээн тухай дуулаһан бүхы хүнүүд аргагүй ехээр айн һүрдэбэ.

Гайхамшагта үзэгдэлнүүд ба дүлгэ тэмдэгүүд

¹² Элшэнэрэй гараар хүн зоной дунда олон гайхамшагта үзэгдэлнүүд болон дүлгэ тэмдэгүүд бүтээгдэдэг байгаа. Һүзэглэгшэд булта Соломооной бахананууд гэдэг хушалтатай газарта һаналаа нэгэдүүлэн суглардаг һэн.

¹³ Бусад зон тэдэнээр нэгэдэхэеэ зүрхэлдэггүй байбашье, һүзэглэгшэдые ехэтэ хүндэлжэ байгаа.

¹⁴ Бүри олон эхэнэрнүүд, эрэшүүл Эзэндэ этигэжэ, һүзэглэгшэдэй тоо олошоржол байба.

¹⁵ Хажуугаар үнгэрһэн Пётрой һүүдэрэйньшье үбшэн хүн дээрэ тудахынь тула үбшэнтэниие дэбисхэртэйнь газаашань гаргажа табидаг байгаа.

¹⁶ Иерусалимай оршон тойронхи хотонуудһаа зон олоороо үбшэн хүнүүдые, ада шүдхэртэ барюулһан зониие хүтэлжэ асардаг бэлэй. Тиин тэдэнь булта аргалуулан эдэгэшэдэг һэн.

Элшэнэрэй зоболон

¹⁷ Тиихэдэнь ахамад санаарта, мүн тэрээндэ хамаатай саддукей бүлэгэй хүнүүд хоро шараяа бусалаад,

¹⁸ элшэнэрые барижа, хотын түрмэдэ хааба.

¹⁹ Гэбэшье Эзэнэй Эльгээмэл һүниндөө түрмын үүдэ нээжэ, элшэнэрые сүлөөдэ гаргаба. Тиихэдээ тэрэ Эльгээмэл:

²⁰ – Ябагты, Һүмэ соо орожо, шэнэ Амидарал тухай бултыень зондо хөөрэжэ үгэгты, – гэжэ хэлэбэ.

²¹ Элшэнэр тэрэнэй үгэ дуулажа, эртэ үглөөгүүр Һүмэ соо ороод, зондо номнобо. Ахамад санаарта өөрынгөө хүнүүдтэй ерээд, Зүблэлэй гэшүүдые болон Израилиин зоной бүхы ахамадуудые суглуулаад, элшэнэрые түрмэһөө абаад ерэхыень хүнүүдые эльгээбэ ха.

²² Теэд албатан түрмэдэ ороод, хэнииешье олобогүй. Бусажа ерээд:

²³ – Бидэнэй ошоходо түрмын үүдэн бүхөөр шэбхэдээтэй, хаалгын хажууда харуул табигданхай байгаа. Гэбэшье хаалга нээжэ ороходомнай досоонь хэншье байбагүй, – гэжэ мэдүүлбэ.

²⁴ Эдэ үгэнүүдые соносоһон Һүмын харуулай дарга болон түрүү санаартад юун болоһые ойлгожо ядан, гайхалдаба.

²⁵ Тэрэ үедэ хэншьеб орожо: – Шагныт ээ, таанадай түрмэдэ хааһан хүнүүд мүнөө Һүмэ дотор зониие һурган номноно, – гэбэ.

²⁶ Тиихэдэнь Һүмын харуулай дарга албатанаараа суг ошожо, арад зондо шулуудуулхаһаа айн, хүсэ шадал хэрэглэнгүйгөөр элшэнэрые абажа ерэбэ.

²⁷ Тэдэ элшэнэрые Зүблэлэй гэшүүдэй урда асаржа байлгаба. Ахамад санаарта тэдэнһээ:

²⁸ – Иисүүсэй нэрэ алдараар номнохыетнай бидэ хорёо бэшэ һэн гүбди? Харин таанад өөһэдынгөө һургаалые бүхы Иерусалимаар номноод, үшөө Иисүүсэй адхарһан шуһые манһаа нэхэхэ һанаатай байна гүт? – гэжэ һураба.

²⁹ – Бидэ анха түрүүн хүнүүдэй бэшэ, харин Бурханай үгэ дуулаха ёһотойбди!

³⁰ Таанадай модон хэрээһэндэ хадажа саазалһан Иисүүсые манай үбгэ эсэгэнэрэй Бурхан амидыруулаа.

³¹ Израилиин зоной нүгэл хэхэеэ болижо, нүгэлөө хүлисүүлхын тула Бурхан Тэрэниие Өөрын баруун талада Ударидагша болон Абарагша болгон һуулгаа.

³² Бидэнэр өөһэдөөшье, Арюун Һүлдэшье эдэ бүхэнэй гэршэнэрбди. Бурхан үгыень дууладаг хүн бүхэндэ Арюун Һүлдые үгэдэг юм, – гэжэ Пётр болон бусад элшэнэр харюусаба.

³³ Зүблэлэй гэшүүд хэлэһыень дуулахадаа хиирэн гааража, элшэнэрые алаха гэбэ.

³⁴ Тиихэдэ зоной дунда ехэ хүндэтэй Хуули заадаг багша, Гамалиһээл гэжэ нэрэтэй фарисей хүн Зүблэлэй гэшүүдэй урда зогсобо. Тэрэ элшэнэрые ойро зуура гаргахыень захирба,

³⁵ тиигээд Зүблэлэй гэшүүдтэ хандаба: – Израильшууд! Эдэ хүнүүдтэй юу хэхэ байһанаа түрүүн һайн бодожо үзэгты.

³⁶ Һаяар Тэүдаа гэжэ нэрэтэй нэгэ хүн тодороод, өөрыгөө агууехэб гэжэ нэрлэхэдэнь, тэрэниие дүрбэн зуугаад хүн дахаа. Гэбэшье тэрэнэй алуулхада, дахалдагшадынь булта зугадан таража, юуншье үлөөгүй.

³⁷ Һүүлдэнь, зоной тоо бүридхэжэ байха үедэ, Галилейн Иуда бии боложо, хойноһоонь нилээд олон хүн дахаа. Тэрэнэй алуулхада, дахалдагшадынь булта таража хосороо.

³⁸ Тиимэһээ мүнөө би эдэ уладые орхигты гэжэ зүблэхэ байнаб! Эдэниие табигты! Хэрбээ тэдэнэй зорилго, үйлэ хэрэгынь хүнһөө эхитэй юм бол, тэрэнь хосорон һалаха.

³⁹ Хэрбээ энэ зорилго, үйлэ хэрэгынь Бурханһаа байбал, таанад эдэ хүнүүдые зогсоожо шадахагүйт, харин Бурханай урдаһаа эсэргүүсэн тэмсэгшэд болохот! Зүблэлэй гэшүүд тэрэнэй үгэ дуулаба.

⁴⁰ Тиигээд элшэнэрые дуудажа оруулаад, ташуурдаад, Иисүүсэй нэрэ алдараар номнохыень хорёод табиба.

⁴¹ Иисүүсэй нэрэ алдарай түлөө иигэжэ доромжолуулан зобохонь зохистой гэжэ тоолоһон элшэнэр баяртайгаар Зүблэлэй суглаанһаа гаража ошобод.

⁴² Үдэр бүхэн Һүмэдэ гү, али айлаар ябажа тэдэнэр Иисүүс Христоос тухай Һайн Мэдээсэлые номножо байгаа.