Хэрэгүүд 3 - Библи

Дохолон хүниие эдэгээбэ

¹ Нэгэтэ Пётр Иоанн хоёр Һүмэ руу ошожо ябаа. Тиихэдэ үдын гурбан саг, хурал болохо саг һэн.

² Һүмын «Үзэсхэлэнтэ» гэгдэдэг хаалгын хажууда түрэхэһөөн дохолон хүниие үдэр бүри асаржа һуулгадаг байгаа. Тэрэ хүн Һүмэ руу ерэһэн зонһоо юумэ гуйраншалдаг һэн.

³ Һүмэ руу орохоёо байһан Пётр Иоанн хоёрые хараһаар тэрэ дохолон хүн тэдээнһээ баһа юумэ гуйба.

⁴ Үнөөхи хоёрынь тэрэниие шэртэжэ: – Наашаа хара! – гэжэ тэрээндэ Пётр хэлэбэ.

⁵ Үнөөхи гуйраншань юумэ үгэхэнь гэжэ горидон, тэдээн тээшэ хараба.

⁶ Харин Пётр тэрээндэ: – Алта мүнгэн намда үгы, гэбэшье намда байгаа юумээ би шамда үгэхэб. Бодоод яба гэжэ Назаредэй Иисүүс Христоосой нэрэ алдараар захирнаб! – гээд хэлэбэ.

⁷ Пётр тэрэниие баруун гарһаань баряад, өөдөө бодоходонь туһалба. Дохолон хүнэй хүлдэ тэнхээ шадал орожо, тэрэ хүл дээрээ һуга харайн бодоод, ябажа эхилбэ.

⁸ Тиигээд баярлаһандаа дэбхэрэн, Бурханиие алдаршуулан, Һүмэ руу Пётр Иоанн хоёртой хамта оробо.

⁹ Тэрэ хүнэй хүлөөрөө ябажа, Бурханиие алдаршуулжа байхые бүхы зон хараба.

¹⁰ Һүмын «Үзэсхэлэнтэ» хаалгын хажууда һуудаг гуйраншые танихадаа, тэрээнтэй юунэй ушарһые мэдэхэдээ, сугларһан зон ехэ гайхалдаба.

Пётр һүмэ соо үгэ хэлэнэ

¹¹ Тэрэ хүнэй Пётр Иоанн хоёрһоо һалан һандангүй ябахада, ехээр гайхалдаһан зон Соломооной бахананууд һууринда гүйлдэжэ ерээд, тэдэнэрые тойрошобо.

¹² Пётр хэлэбэ: – Израильшууд! Энээниие хараад яатараа гайхабат? Өөһэдынгөө хүсэ шадалаар, һүзэгөөрөө энэ хүниие ябадаг болгоһон мэтэ таанад юундэ бидэниие иитэрээ шэртэнэбта?

¹³ Абраһаамай, Исаагай, Яковай Бурхан, манай үбгэ эсэгэнэрэй Бурхан Өөрын зараса Иисүүсые алдаршуулаа. Таанад Иисүүстэ урбаат, Тэрэниие Пиладай сүлөөлэн табиха гэхэдэнь, таанад арсаат.

¹⁴ Бурханай хүнһөө, үнэн сэдьхэлтэнһээ арсажа, харин алууршые табиит гэжэ таанад гуйгаат.

¹⁵ Таанар Амидарал бүтээгшые алабат, харин Бурхан Тэрэниие амидыруулаа. Бидэ тэдэ үйлэ хэрэгүүдэй гэршэнэрбди.

¹⁶ Таанадай һайн мэдэхэ, таниха дохолон хүниие Иисүүсэй нэрэ алдарай хүсэн эдэгээгээ. Иимэ гайхалтай юумэн Иисүүсэй нэрэ алдарта этигэһэнһээ болоо. Энэ хүн Иисүүстэ этигэжэ, таанадай хараһаар байтар аргалагдаба.

¹⁷ Гэбэшье, аха дүүнэрни, таанадай, танай захирагшадай үйлэдэһэн юумые мэдэхэгүй байһан дээрэһээл тэрэ буруу ябадал хээт гэжэ би мэдэнэб.

¹⁸ Бурханай табисуурта зоболон эдлэхэ гэжэ Бурханай лүндэншэдэй үнинэй уридшалан хэлэһэниинь бүтэбэ даа.

¹⁹ Нүгэл шэбэлээ Бурханаар хүлисүүлхэ гэбэл, таанад нүгэл хэхэеэ болижо, Бурханда хандагты.

²⁰ Тиигээ һаа, Эзэн таанадта Арюун Һүлдын хүсэ олгохо. Эзэн таанадта заяагдаһан Бурханай табисуурта Иисүүсые эльгээхэ.

²¹ Гэгээн лүндэншэдөөрөө үни гэхэдэ дамжуулан найдуулһан ёһоороо Бурханай бүхы юумые шэнэлүүлтэр Христоос тэнгэридэ оршохо ёһотой.

²² «Таанадай дундаһаа намдал адли лүндэншые Эзэн Бурхантнай элирүүлэн гаргаха. Таанад хэлэһэн үгэ бүхэнииень дуулаха ёһотойт.

²³ Тэрэ Лүндэншын үгэ дуулаагүй хүн арад зонһоо тусгаарлагдан һүнөөгдэхэ», – гэжэ Моисей хэлээ һэн.

²⁴ Самуил, мүн тэрэнэй удаадахи олон лүндэншэд энэ үдэрнүүд тухай уридшалан айладхаа юм.

²⁵ Таанад лүндэншэдэй үри һадаһад гээшэт, тиин танай үбгэ эсэгэнэрэй Бурхантай баталһан хэлсээндэ баһа хабаатай болонот. «Шинии уг удамаар дамжан бүхы дэлхэйн арадууд буян хэшэгтэ хүртэхэ», – гэжэ Бурхан Абраһаамда айладаа.

²⁶ Хүн бүхэнииетнай муу муухай хэрэгүүдһээ зайсуулжа, буян хэшэгтээ хүртөөхын тула Бурхан Зарасаяа амидыруулаад, Тэрэнээ анха түрүүн таанадта эльгээгээ юм.