Хэрэгүүд 26 - Библи

Павел өөрыгөө хамгаална

¹ Үмэглэлтын үгөө хэлэхыеш зүбшөөнэбди, – гэжэ Павелда Агрииппа хэлэбэ. Тиихэдэнь Павел гараа үргөөд, өөрыгөө хамгаалан иигэжэ хэлэбэ:

² – Агрииппа хаан! Еврейнүүдэй намда тохожо байгаа зэмэдэ хабаагүйб гэжэ мүнөөдэр танай урда өөрыгөө үмэглэжэ байһандаа би хуби заяатайб гэжэ бодоноб.

³ Та еврейнүүдэй ёһо заншалыешье, арсалдаан гаргадаг асуудалнуудыешье һайн мэдэнэт. Тиимэһээ намайе тэсэбэритэйгээр шагнахыетнай гуйнаб.

⁴ Минии ажамидарал эдир залуу наһанһаа эхилэн еврейнүүдэй дунда мэдээжэ. Би түрүүн өөрынгөө арад зоной дунда, һүүлдэнь Иерусалимда ажаһуугааб.

⁵ Эдэ еврейнүүд үнинэй намайе мэдэхэ, тиимэһээ дуратай һаа, манай шажанай эгээл хатуу журамтай фарисей бүлгэмэй гэшүүн байһан тухаймни баталжа үгэхэ.

⁶ Бурханай үбгэ эсэгэнэртэмнай найдуулһан юумэндэ мүнөөшье этигэжэ байһан дээрэһээ би танай урда шүүлгэн зогсоноб.

⁷ Тиихэдэ манай арбан хоёр угсаатаншье энэ найдуулга бүтэхэ гэжэ этигэһээр лэ үдэр һүнигүй Бурханда алба хэдэг байгаа. Хаан, энэ бүхэнэйл түлөө намайе еврейнүүд зэмэлнэ.

⁸ Үхэһэн зониие Бурхан амидыруулха аргагүй гэжэ таанар яахадаа һананабта?

⁹ Би өөрөөшье Назаредэй Иисүүсэй нэрэ алдарай урдаһаа шадалаараа тэмсэхэ ёһотойб гэжэ һанадаг байгааб.

¹⁰ Иерусалимда би тиимэ ажал урдань гүйсэдхэжэ байгааб. Түрүү санаартадай үгэһэн эрхээр би Христоосто һүзэглэдэг олон зониие түрмэдэ хаагааб. Тиихэдэ хэн нэгэниие саазалха тухай асуудалай шиидхэгдэхэдэ, би ходо саазада хүртүүлхэ гэжэ хэлэдэг байгааб.

¹¹ Тиин мүргэлэй гэр бүхэндэ Иисүүсһээ арсахыень баадхан, һүзэглэгшэдые хэһээдэг һэм. Би тэдээндэ айхабтар ехээр хоро шараяа бусалан, хариин хото нютагуудааршье ябажа, тэдэниие мүрдэн мүшхэдэг байгааб.

Павел Христоосто һүзэглэһэн тухайгаа хөөрэнэ

¹² Нэгэтэ би түрүү санаартадһаа һүзэглэгшэдые хэһээхэ эрхэ болон зүбшөөл абажа, Дамааск ошооб.

¹³ Хаан, үдэ багта намайе, мүн замаймни нүхэдые тэнгэриһээ сасаран гэрэлтүүлһэн, наранһаа үлүү ялагар гэрэл туяа би харабаб.

¹⁴ Бидэ булта газарта унажа, намда еврей хэлэн дээрэ: «Саул, Саул, юундэ ши намайе хашан мүрдэнэбши? Ташуурай урдаһаа зүдхэһэн зүрюу бухадал адляар ши өөрыгөө зобоонош!» – гэһэн абяа дуулааб.

¹⁵ «Эзэмни, үгы та хэн гээшэбта?» – гэжэ би һурабаб. «Шамда хашуулан мүрдүүлэгшэ Иисүүс гээшэб, – гэжэ Эзэн харюусаа. –

¹⁶ Мүнөө ши хүл дээрээ бодо. Шамайе өөрын зараса болгохын тула, мүнөөдэр хараһан үзэһэн, мүн ерээдүйдэ Минии харуулха бүхы юумэнэй гэршэ болохыншни тула Би шамда үзэгдөөб.

^17-18 Би шамайе еврейнүүдһээ, мүн бусад арадуудһаа абархаб. Мүнөө тэдэнэй нюдыень нээжэ, харанхы мунхагһаа гэрэл туяада шэглүүлхыншни тула, сатанагай эрхэ мэдэлһээ Бурханай эрхэ мэдэлдэ оруулхыншни тула, мүн Намда этигэн тэдэнэй нүгэл шэбэлээ хүлисүүлжэ, Бурханай арад зоной дунда өөрынгөө һуури эзэлхынь тула Би шамайе тэдэндэ эльгээнэб».

Павел ажал тухайгаа хөөрэнэ

¹⁹ Агрииппа хаан, энээнһээ боложо би тэнгэридэ үзэгдэһые буруушаангүй,

²⁰ түрүүн Дамааскынхидтэ, һүүлдэнь Иерусалимай зондо, удаань бүхы Иудейн орон нютагайхинда, һүүлэй һүүлдэ бусад яһатанда нүгэл хэхэеэ болигты, тэрэнээ бодото хэрэгүүдээрээ баталжа, Бурханда хандагты гэжэ уряалааб.

²¹ Энээнэй түлөө еврей зон намайе Һүмэ соо барижа алаха гээ.

²² Гэбэшье Бурханай туһаламжаар би энэ саг хүрэтэр сухаришагүй зогсоноб, юрыншье, нэрэ хүндэтэйшье зондо гэршэлнэб. Лүндэншэдэй болон Моисейн уридшалан хэлэһэндэ нэмэжэ би нэгэшье үлүү юумэ хэлээгүйб.

²³ Харин Бурханай табисуурта ехэ зоболон эдлэжэ, үхэһэн зоной дундаһаа эгээн түрүүн амидыржа, манайшье арад зондо, бусад арадуудташье абаралга тухай хөөрэхэ гэжэ тэдэнэй бэшэһые хэлэһэн байгааб.

²⁴ Иигэжэ Павелай өөрыгөө үмэглэжэ байхада Фест: – Павел, шинии ухааншни муудаа! Ши ехэ эрдэм номһоо боложо үбэштэйрөөш, – гэжэ шангаар хашхарба.

²⁵ – Эрхим хүндэтэ Фест, би үбэштэйрөөгүйб, – гэжэ Павел буруушааба. – Би үнэн зүб, сэсэн удхатай үгэнүүдые хэлэнэб.

²⁶ Хаанда иимэ зоригтойгоор хандажа байнаб. Хааншье энээниие мэдэнэ. Эдэ бүхэниие хаан анхарангүй орхихогүй гэжэ би этигэнэб, юундэб гэхэдэ, энэ бүхэн ямар нэгэн харанхы буланда ушараа бэшэ ха юм.

²⁷ Агрииппа хаан, та лүндэншэдтэ этигэнэ ха юмта? Этигэнэт гэжэ мэдэнэб!

²⁸ – Ушаргүй түргөөр намайе христоос шажанда хандуулха һанаатай гүш! – гэжэ Агрииппа Павелда хэлэбэ.

²⁹ – Түргөөр гү, түргөөр бэшэ гү, гэбэшье гансал та бэшэ, харин мүнөөдэр намайе шагнажа байгаашад булта (энэ гэнжэнүүдһээ гадна) намдал адли болохыень би Бурханда зальбарнаб, – гэжэ Павел харюусаба.

³⁰ Хаан өөдөө бодобо, хойноһоонь захирагша, Бэрниикэ, бусадшье улад бодобо.

³¹ Таһалгаһаа гараад, тэдэ бэе бэедээ: – Энэ хүн саазалуулхаар гү, али түрмэдэ һуухаар нэгэшье муу юумэ хээгүй байна, – гэлдэбэ.

³² – Римэй хаанай зарга шүүбэри шаардаагүй һаань, энэ хүниие сүлөөдэ табижа болохо һэн, – гэжэ Агрииппа хаан Фестдэ хэлэбэ.