Хэрэгүүд 21 - Библи

Павел Иерусалим ошобо

¹ Бидэ Эфесэй бүлгэмэй хүтэлэгшэдтэй хахасаһаар Коос арал тамаржа ерээбди, тиигээд хойто үдэрынь Родос арал хүрэжэ, тэндэһээ Патара хото тамараабди.

² Патарада бидэ Финики ошохо корабль оложо һуубабди.

³ Кипр аралые зүүн таладаа орхижо, Сири тээшэ тамарбабди, тиигээд корабльнай ашаагаа буулгахаяа Тииртэ зогсобо.

⁴ Тииртэ бидэ шабинарые оложо, тэдэнтэй долоо хонообди. Тэдэ шабинар Павелые Иерусалим бү ошыт даа гэжэ гуйба, юундэб гэхэдэ, Арюун Һүлдэ тэдэндэ тиигэжэ захиһан байна.

⁵ Долоон хоногой үнгэрхэдэ замдаа гарахадамнай, һүзэглэгшэд эхэнэр үхибүүдээрээ хамта бидэниие корабль хүрэтэрнай үдэшэбэ. Эрье дээрэ бидэ үбдэглэн һуужа зальбараад,

⁶ хахасажа, корабльдаа һуубабди, һүзэглэгшэд гэртээ бусаба.

⁷ Тиир хотоһоо бидэ Птолемаида хүрэтэр тамаржа ерээд, эрье дээрэнь буужа, һүзэглэгшэ аха дүүнэртээ айлшалан, тэдэнэйдээ нэгэ хоноо һэмди.

⁸ Хойто үдэрынь бидэ Кесари хүрэжэ, Һайн Мэдээсэл номнодог долоон туһалагшадай нэгэн болохо Филиппэй гэртэ зогсобобди.

⁹ Тэрэ хадамда гараагүй дүрбэн басагатай һэн. Басагадынь булта лүндэншэд байгаа.

¹⁰ Тэрэнэйдэ хэдэн үдэр байһанаймнай һүүлээр Агааб гэжэ нэрэтэй лүндэншэн Иудейһээ ерээ.

¹¹ Агааб манай байһан газарта ерэжэ, Павелай бүһэ абажа, хүл гараа хүлеэд: – «Энэ бүһын эзэниие еврейнүүд Иерусалимда иигэжэ хүлеэд, бусад арадуудта тушааха» гэжэ Арюун Һүлдэ соносхоно, – гэбэ.

¹² Энээниие дуулахадаа бидэшье, эндэхи һүзэглэгшэдшье бултадаа Павелые Иерусалим бү ошыт даа гэжэ гуйбабди.

¹³ Тиихэдэмнай Павел: – Үгы, яана гээшэбта? Юундэ уйлалдажа бархиралдажа, минии зүрхэ сэдьхэлые зобоонобта? Би Иерусалим ошоод, хүлюулхэһээ гадна, Эзэн Иисүүсэй нэрэ алдарай түлөө үхэхэеэшье бэлэнби, – гэжэ харюусаба.

¹⁴ Павелые үгэдөө оруулха аргагүй байһанаа ойлгоходоо, бидэ аргадахаяа болижо: – Эзэнэй эрхэ мэдэлээр лэ болог даа! – гэлсэбэбди.

¹⁵ Хэдэн үдэрэй үнгэрхэдэ бидэ харгыдаа түхеэржэ, Иерусалим тээшэ ябаабди.

¹⁶ Бидэнэрээр хамта Кесариһаа хэдэн шабинар ябалсаа һэн. Тэдэнэр бидэниие Кипрһээ уг гарбалтай, түрүүшын шабинарай нэгэн болохо Мнасон гэжэ хүнэйдэ абаашаха байгаа. Бидэ тэрэнэйдэ зогсохо түсэбтэй һэмди.

Павел Яковтай уулзана

¹⁷ Иерусалим хүрэжэ ерэхэдэмнай, аха дүүнэрнай бидэниие ехэ халуун дотоноор угтажа абаа.

¹⁸ Хойто үдэрынь Павел мантай суг Яковта ошобо. Ошоһон газартамнай бүлгэмэй хүтэлэгшэдшье булта суглараа ха.

¹⁹ Тэдэниие мэндэшэлээд, бусад арадуудай дунда Бурханай тэрээгээр хүүлэһэн юумэнүүд тухай Павел тодорхойгоор хөөрэжэ үгэбэ.

²⁰ Шагнаһан хойноо сугларагшад Бурханиие магтан алдаршуулба, һүүлдэнь: – Павел аха, олон мянган еврейнүүдэй этигэжэ, Хуули ханамжатай һайнаар сахижа байһые та харана гүт?

²¹ Тэдэ зон тан тухай: «Тэрэ бусад арадуудай дунда ажаһуудаг еврейнүүдые Моисейн Хуулиһаа холодуулан, хүбүүдээ бү отолуулагты, ёһо гуримуудаа бү сахигты гэжэ һургана», – гээд хэлсэнэ.

²² Яаха гээшэб? Хүн зон ерэһэн тухайтнай заатагүй дуулаха.

²³ Тиимэһээ манай хэ гэһэн юумые хыт даа. Бурханда тангариг үгэһэн дүрбэн хүн эндэ бии.

²⁴ Тэдэнэрээр хамта ошожо, заншалай ёһоор өөрыгөө арюудхагты, тиигээд үһөө абхуулха мүнгэ тэдэндэ үгөөрэйгты. Тиигэбэл таниие Хуули сахина, тан тухай дэмы юумэ шашалдана гэжэ булта ойлгохо.

²⁵ Бусад арадуудай дундаһаа Христоосто һүзэглэһэн зон тухай хэлэбэл, тэдэ бидэнэй урда бэшэһэн захиралтые дүүргэхэ ёһотой: онгонуудта үргэжэ бузарлагдаһан боожо алаһан амитадай шуһа, мяха амсангүй, забхайрангүй байгаарайгты.

²⁶ Хойто үдэрынь Павел тэдэ дүрбэн хүнүүдээр хамта өөрыгөө арюудхаха, арюудхалгын ёһололой дууһаха үдэрые дуулгаха гэжэ һүмэ руу оробо. Тэрэ үдэр тэдэ зон өөһэдынгөө түлөө үргэл хэхэ ёһотой байгаа.

Павелые Һүмэ соо бариба

²⁷ Үлэһэн долоон үдэрэй үнгэржэ байхада, Аси можын еврейнүүд Павелые һүмэ соо харахадаа, зониие үймүүлжэ, тэрэниие бариба.

²⁸ – Израильшууд! Туһалыт! – гэжэ һүхирэлдэбэ. – Энэл хүн манай улад зон, Хуули, газар доромжолһон һургаал хүн бүхэндэ хаа хаанагүй номноно. Мүнөө грегүүдые һүмэдэ асаржа, нангин газар бузарлаа!

²⁹ Юундэ тиигээб гэбэл, урдань тэдэ зон хотодо Павелые Эфесэй Трофимтай хараһан байгаа, тиимэһээ Павел тэрээниие дахуулаад, һүмэ руу асараа гэжэ бодобо.

³⁰ Хөөрсэгэнэһэн хотын зон булта гүйлдэжэ ерээд, Павелые барижа, һүмэ сооһоо шэрэн гаргаба. Тэрэнэй хойноһоо һүмын үүдэ хааба.

³¹ Тэдэ зоной Павелые алахаяа забдажа байхада, бүхы Иерусалим үймэжэ байна гэжэ түмэнэй даргада дуулгаба.

³² Тэрэ дарга удангүй зуунай дарганартай, сэрэгшэдтэйгээ хамта тиишээ ошобо. Түмэнэй даргые сэрэгшэдтэйнь харахадаа, улад зон Павелые наншахаяа болибо.

³³ Түмэнэй дарга тэдэндэ дүтэлжэ, Павелые дабхар гэнжээр хүлихыень захираад, һүүлдэ тэрэнэй хэн байһан, юу хэһэн тухай һураашалба.

³⁴ Зон элдэб юумэ хашхаржа байба, гэбэшье шууяатай байһан дээрэһээ тэрэ дарга юушье ойлгобогүй. Тиимэһээ тэрэ Павелые хэрэм руу туужа абаашаад, тэндэ хаахыень захирба.

³⁵ Павелай гэшхүүрэй дээдэ табсан дээрэ гараад байхадань, зон бүри ехээр гааралдан дошхорбо, сэрэгшэд тэрэниие гар дээрээ үргөөд ябаха баатай болобо.

³⁶ Олон зон хойноһоонь дахалдан: – Энээниие алагты! – гэжэ хашхаралдаба.

Павел өөрыгөө үмэглэнэ

³⁷ Хэрэмдэ оруулхынь урда тээ Павел түмэнэй даргада хандажа: – Танда юумэ хэлэжэ болохо гү? – гэжэ грек хэлэн дээрэ һураба. – Та грек хэлэ мэдэхэ гүт? – гэжэ урдаһаань түмэнэй дарга һураба. –

³⁸ Тиихэдээ та һая үймөө татажа, өөрынгөө хойноһоо сүл губи руу дүрбэн мянган алууршадые дахуулжа ошоһон египет хүн гүт?

³⁹ – Би еврей хүнби, – гэжэ Павел буруушааба, – Килики ороной Тарс гэдэг түб хотын эрхэтэн хүнби. Эдэ зонтой хөөрэлдэхыемни зүбшөөгыт даа, – гэжэ тэрэ гуйба.

⁴⁰ Дарга зүбшөөбэ. Павел гэшхүүрэй дээдэ табсан дээрэ зогсоод, аалин бологты гэжэ гараараа зондо харуулба. Булта аниргүй боложо, Павел еврей хэлэн дээрэ үгэ хэлэбэ: