Хэрэгүүд 2 - Библи

Арюун Һүлдын буулга

¹ Тэдэнэр булта нэгэ газарта Табидахи үдэрэй һайндэртэ сугларба.

² Гэнтэ шанга һалхинай бууһандал мэтэ ехэ шууяан тэнгэриһээ дуулдаад, элшэнэрэй байһан гэрые дүүргэбэ.

³ Галай дүлэн мэтэ юумэнэй соробхилхые булта харабад. Тэдэ дүлэнүүд хубааралдан, хүн бүхэнэй дээрэ тогтошобо.

⁴ Тиихэдэнь булта Арюун Һүлдөөр дүүрэн, Һүлдын хүсөөр элдэб хэлэнүүд дээрэ дуугаралдаба.

⁵ Тэрэ үедэ Иерусалимда дэлхэйн элдэб оронуудһаа Бурханда шүтэдэг еврейнүүд ерээд байгаа.

⁶ Тэдэ булта шууяа дуулаад, олоороо сугларжа, нютагайнгаа хэлэн дээрэ элшэнэрэй дуугархые дуулахадаа, сошолдобод.

⁷ – Энэ дуугаржа байһан хүнүүд булта Галилейнхид бэшэ аал? – гэжэ тэдэ гайхалдан бэе бэеһээ һурабад. –

⁸ Тиихэдээ манай түрэл нютагай аялга дээрэ дуугархыень бидэ яагаад дууланабибди? Бидэнэй дунда

⁹ Парфиин, Мидиин, Элаамай, Месопотамиин, Иудейн, Каппадокиин, Понтын, Асиин,

¹⁰ Фригиин, Памфилиин, Египедэй болон Хэрээн хотын хажуудахи Ливиин оршон тойронхи нютагуудһаа, Римһээ уг гарбалтай

¹¹ еврейнүүд болон бусад арадай дундаһаа еврейнүүдэй шажанда оруулагдаһан зон, криидүүд болон араабууд бии. Тиигээд Бурханай агууехэ хэрэгүүд тухай нютагаймнай хэлэнүүд дээрэ тэдэ хүнүүдэй дуугархые дууланабди!

¹² Гайхалаа баран: – Энэ юун болоноб? – гэжэ ором дүрэмыень оложо ядаһан тэдэнэр бэе бэеһээ һуража байбад.

¹³ Харин нүгөөдүүлынь тэдэниие наада барин: – Ай, эдэ һогтоо байна! – гэлдэбэ.

¹⁴ Тиигээд Пётр нүгөө арбан нэгэн элшэнэртэйгээ хамта бодожо, сугларааша зондо хандан, шангаар айладхаба: – Иудейнүүд, аа! Иерусалимынхид, аа! Хэлэһыемни шагнагты даа.

¹⁵ Эдэ хүнүүдые һогтуу гэжэ дэмы һананат. Мүнөө үглөөнэй юһэн лэ саг боложо байна.

¹⁶ Эндэ боложо байһан бүхы юумэн тухай Ёһээл лүндэншэн уридшалан иигэжэ айладаа һэн:

¹⁷ «Иимэл юумэн һүүлшын үдэрнүүдтэ болохо гэжэ Бурхан хэлэнэ: Би Өөрын Һүлдөөрөө хүн бүхэниие нэбтэрүүлхэб, таанадай хүбүүд басагад зүн бэлигээр мэдэдэг болохо, залуушуултнай үзэгдэл үзэжэ захалха, үбгэд хүгшэдтнай зүүдэ зүүдэлхэ.

¹⁸ Тэдэ үдэрнүүдтэ Би богоол шэбэгшые Һүлдөөрөө нэбтэрүүлхэб, тиин тэдэ зүн бэлигээр мэдэдэг болохо.

¹⁹ Дээдэхи огторгойдо юрэ бусын үзэгдэлнүүдые, доодохи газар түбидэ гайхамшагта тэмдэгүүдые: шуһа, гал дүлэ, бөөн хара утаа үзүүлхэб.

²⁰ Эзэнэй агууехэ алдарта үдэрэй ерэхын урда тээ наран балартаха, һара шуһан улаан болохо.

²¹ Эзэнэй нэрэ дуудаһан хүн бүхэн абарагдаха».

²² Израилиин зон, намайе шагнагты! Бурхан Назаредэй Иисүүсээр агууехэ хэрэгүүдые, гайхамшагта үзэгдэлнүүдые ба тэмдэгүүдые бүтээлгэн, Тэрэниие эльгээһэн тухайгаа таанадта гэршэлээ. Эдэ бүхэн танай дунда ушараа. Тиимэһээ таанад өөһэдөө энээн тухай мэдэнэт.

²³ Бурханай үни баталһан түсэбэй ёһоор танай гарта үгтэһэн Иисүүсые хуули эбдэгшэдэй гараар хэрээһэндэ хадажа алаат.

²⁴ Гэбэшье Бурхан Тэрэниие үхэлэй зоболонһоо аршалан амидыруулаа, үхэл Тэрэниие һабартаа барижа шадахагүй байгаа бшуу.

²⁵ Давид Тэрээн тухай иигэжэ хэлэнэ: «Би Эзэниие үргэлжэ урдаа харанаб: хажуудам байгаа сагта ганхан унахагүйб.

^26-27 Тиимэһээ зүрхэ сэдьхэлни баяраар халяа, хэлэ амамни дорюун болоо, бэемни хүсэл найдалаар дүүрээ, юундэб гэхэдэ, Та һүнэһэ һүлдыемни үхэлэй орондо орхихогүйт, Өөрынгөө шударгы Зарасые шалзараажа үмхирүүлхэгүйт.

²⁸ Амидаралай зам намда заажа үгөөт, Өөрынгөө хажууда байлгажа, Та баяраар намайгаа дүүргэхэт».

²⁹ Аха дүүнэрни! Таанадта сэхэ хэлэһүүб: манай үбгэ эсэгэ Давид наһа бараад хүдөөлүүлээ, тэрэниие хадаглаһан агы нүхэн мүнөө болотор хэбээрээ байдаг.

³⁰ Давидай хаан шэрээдэ үри һадаһыень һуулгахаб гэжэ Бурханай үгэһэн тангаригые Давид лүндэншэ байһан дээрэһээ мэдэжэ байгаа.

³¹ Тиимэһээ Бурханай юу хэхые мэдэжэ байгаад, Бурханай табисууртын амидырха тухай тэрэ иигэжэ хэлээ: Бурхан һүнэһэ һүлдыень үхэлэй орондо орхёогүй, Тэрэнэй бэе агы нүхэндэ шалзаржа үмхирөөгүй.

³² Бурхан Иисүүсые амидыруулаа, тиин бидэ булта энэ ушарай гэршэнэр болонобди.

³³ Иисүүс Эсэгынгээ баруун талада дэгдүүлэн, найдуулһан Арюун Һүлдэдэнь хүртэбэ, тиигээд Тэрэ Һүлдөөрөө бидэниие нэбтэрүүлээ. Мүнөө таанад энээниие харанат, дууланат.

^34-35 Давид тэнгэри өөдэ дэгдээгүйшье һаа, иигэжэ дуулгаа: «Бузар дайсадыеш хүл дорош дэбһүүлэн табитарни баруун гар таладам һуугаарай гэжэ Эзэн минии Эзэндэ хэлээ».

³⁶ Тиимэ ушарһаа таанадай саазалһан Иисүүсые Бурхан Өөрөө Эзэн болон Бурханай табисуурта болгожо табяа. Израилиин бүхы зон, энээниие хадуужа абагты.

³⁷ Иимэ юумэ дуулаһан хүнүүд зүрхэеэ доһолгон: – Аха дүүнэр аа, бидэ яаха болообибди? – гэжэ Пётрһоо, мүн бусадшье элшэнэрһээ һураба.

³⁸ – Нүгэл хэхэеэ болигты. Нүгэлыетнай Бурханай хүлисэхын тула хүн бүхэн Иисүүс Христоосой нэрэ алдараар уһаар арюудхуулаг. Тиихэдээ таанад Бурханай үршөөһэн Арюун Һүлдэдэ хүртэхэт.

³⁹ Танда, танай хүүгэдтэ болон Эзэнэй, манай Бурханай Өөртөө уряалһан, холууршье байһан хүн бүхэндэ Бурхан найдуулга үгөө, – гэжэ Пётр тэдээндэ харюусаба.

⁴⁰ Мүн ондоошье олон үгэнүүдээр Пётр тэдэниие һэргылэн идхаба: – Энэ забхай ябадалтан дээрэ бууха Бурханай хэһээлтэһээ яажа бэеэ абархаяа бодогты.

⁴¹ Пётрой үгэдэ этигэһэн хүнүүд уһан арюудхалгада хүртэжэ, гурбан мянга тухай хүнөөр һүзэглэгшэдэй тоо нэмэгдэбэ.

⁴² Тэдэ зон элшэнэрэй һургаал шагнадаг, бэе бэетэйгээ һайнаар харилсадаг, хамта хоол баридаг, зальбардаг бэлэй.

Һүзэглэгшэдэй амидарал

⁴³ Элшэнэр олон гайхамшагта хэрэгүүдые болон дүлгэ тэмдэгүүдые харуулжа байгаа. Тиимэһээ хүн бүхэн ехэтэ һүрдэн бэшэрбэ.

⁴⁴ Һүзэглэгшэд байһан юумээрээ хоорондоо хубаалдадаг, бэе бэедээ һайнаар хандадаг һэн.

⁴⁵ Тэдэнэр зөөри зөөшэеэ худалдажа, хүн бүхэндэ хэрэглэхэ зэргээрнь юумэ хубаажа үгэдэг болоо.

⁴⁶ Тэдэнэр үдэр бүри һанал нэгэдэн Һүмэдэ сугларжа, гэр бүхэндэ хамта хоол баридаг, баяр баясхалангаар дүүрэн, сэдьхэл тэнюун хоолоо барижа,

⁴⁷ Бурханаа алдаршуулан, бүхы зондо һайшаагдажа байгаа. Тиихэдэ Эзэн абарагдаһан зоной тоо үдэрһөө үдэртэ олошоруулба.