Хэрэгүүд 19 - Библи

Павел Эфестэ

¹ Аполлосой Коринфда байха үедэ Павел Галаадай ба Фригиин газар дайдые дабан, Эфес хүрэжэ ерэхэдээ, хэдэн шабинартай уулзаба.

² Тэдэнтэй хөөрэлдэжэ байхадаа Павел: – Һүзэглэхэдөө таанад Арюун Һүлдые тогтоон абаа һэн гүт? – гэжэ һураба. – Бидэ Арюун Һүлдэ тухай ойро наашашье дуулаагүй байнабди, – гэбэ тэдэнь.

³ – Тиихэдээ таанад ямар уһан арюудхалда хүртэбэт? – Иоаннай уһан арюудхалда хүртөөбди.

⁴ – Хүнүүдэй нүгэл хэхэеэ болихын тула Иоанн уһаар арюудхаа. Тиихэдээ хойноһоомни заларжа ябаа хүндэ, ондоогоор хэлэбэл Иисүүстэ, таанад этигэхэ ёһотойт гэжэ Иоанн хүнүүдтэ хэлэдэг байгаа, – гэжэ Павел хэлэбэ.

⁵ Энээн тухай мэдэхэдээ, шабинар Эзэн Иисүүсэй нэрэ алдараар уһан арюудхалда хүртэбэ.

^6-7 Павелай арбан хоёр оршом шабинар дээрэ гараа табихадань, Арюун Һүлдэ буужа, тэдэ элдэб хэлэнүүд дээрэ дуугаржа, номножо эхилбэ.

⁸ Павел гурбан һарын үргэлжэдэ мүргэлэй гэртэ ерэжэ, заргалдан, Бурханай хаан орон тухай зоригтойгоор хөөрэжэ, баталан һургажа байба.

⁹ Зарим хүнүүдэй зүрюу зан гаргажа, этигэхэ дурагүй байхадань, Эзэнэй замые зоной дунда хардажа эхилхэдэнь, Павел шабинартайгаа тэдэниие орхижо ошобо. Тиигээд Павел Тиранн гэдэг хүнэй һургуулида үдэр бүри номнодог болобо.

¹⁰ Тиигэжэ хоёр жэлэй туршада Аси можодо ажаһуудаг еврейнүүдшье, грегүүдшье Эзэн тухай соносожо байба.

Скевын хүбүүд

¹¹ Бурхан Павелай гараар олон гайхамшагта хэрэгүүдые бүтээбэ.

¹² Павелай нюурай аршуул гү, али хормойбшо үбшэн зондо асархадань, тэдэнь эдэгэжэ, ада шүдхэрнүүд бэеһээнь гаража, тонилон ошодог байгаа.

¹³ Тиихэдэ ада шүдхэрнүүдые дарадаг зарим еврей тэнүүлшэд ада шүдхэртэ барюулһан хүниие аргалхадаа, Эзэн Иисүүсэй нэрэ дурдадаг болобо. «Павелай номножо байһан Иисүүсэй нэрээр таанадта захирнаб», – гэжэ тэдэ хэлэдэг байгаа.

¹⁴ Еврейнүүдэй ахамад санаарта Скевын долоон хүбүүд баһал тиигэжэ захирба.

¹⁵ Гэбэшье ада шүдхэр тэдэндэ: «Би Иисүүсые мэдэнэб, Павелыешье би танинаб. Харин таанад хэд гээшэбта?» – гэбэ.

¹⁶ Тиигээд ада шүдхэртэй хүнэй тэдэндэ добтолжо, бултыень наншахада, тэдэнь шармай нюсэгэн, шархатаһан барһад гэрһээ зугадан гүйлдэбэ.

¹⁷ Энэ ушар тухай Эфестэ ажаһуудаг еврейнүүд, еврей-бэшэнэр баран сонособо. Тэдэ булта айн һүрдэжэ, Эзэн Иисүүсэй нэрэ хүндэлжэ эхилбэ.

¹⁸ Һүзэглэһэн зоной олонхинь хэһэн элдэб шэбшэлгынгээ муу ёрые мэдэрэн, тэрээн тухайгаа зондо хөөрэжэ үгэбэ.

¹⁹ Эльбэ жэльбэ хэрэглэдэг зарим зон номуудаа асаржа, зоной урда галда шатааба. Тэдэ номуудай сэнгыень тоолоходо, тэдэнь таби мянган мүнгэнэй сэнтэй байшаба.

²⁰ Иимэл хүсэ эршэтэйгээр Эзэнэй үгэ таража, олон хүнүүд һүзэглэжэ байба.

Эфестэ болоһон үймөөн

²¹ Эдэ ябадалнуудай һүүлдэ Павел Македониин ба Ахайяын нютагуудаар ябажа, Иерусалим ошохо гэжэ шиидэбэ. – Удаань би Рим хүрэхэ ёһотойб, – гэжэ Павел хэлэбэ.

²² Тэрэ Тимофей Эрааст хоёр туһалагшадаа Македони эльгээжэ, өөрөө халта зуура Аси можодо үлэбэ.

²³ Тэрэ үедэ Эзэнэй замһаа боложо ехэхэн арсалдаан гараба.

²⁴ Мүнгөөр урлагша Дэмээтрэ гэдэг хүн Артемидын һүмын мүнгэн дүрсэнүүдые бүтээдэг һэн. Тэрэнэй ашаар бусадшье олон урладаг зон бага бэшэ олзо олодог бэлэй.

²⁵ Дэмээтрэ тэдэниие, мүн ондоошье урлагшадые суглуулаад: – Эрэшүүл аа, энэ урлал ажалһаа манай ажабайдал дулдыдана гэжэ таанад һайн мэдэнэт.

²⁶ Павелай гансашье Эфестэ бэшэ, харин бүхы Асида номнолоороо олон зоной тархи эрьюулһыень таанад хаража дуулажа байгаа бэзэт. Гараар бүтээгдэһэн юумэн бурхан байжа шадахагүй гэжэ тэрэ хэлэнэ.

²⁷ Энээнһээ боложо манай урлал ажал хэндэшье хэрэггүй болохоһоо гадна, агууехэ бурхан Артемидыншье һүмэ хэрэггүй болохо аюул тохёолдохоёо байна. Тиигэбэл бүхы Асиин болон юртэмсын шүтэжэ байһан бурханай һүр жабхалангынь буураха бшуу, – гэжэ хэлэбэ.

²⁸ Хэлэһыень дуулаһан зон хоро шараяа ехээр бусалжа: – Эфесэй Артемида алдаршаһай! – гэжэ хашхаралдаба.

²⁹ Хотынхид үймөө татажа, Павелай замай нүхэд болохо Македониин Гай Аристарх хоёрые театр руу шэрэбэ.

³⁰ Павелай өөрөө тэдэ зоной урда гараха гэхэдэнь, шабинарынь табибагүй.

³¹ Аси можын зарим захирагшад Павелай нүхэд байһан дээрэһээ театр ошохыень һэргылэн хүнүүдые эльгээгээ.

³² Театрта сугларһан зоной зариманиинь һүхиржэ, нүгөөдүүлынь хашхарба. Суглаанай эмхи гуримгүй үнгэржэ байхада, тэндэ байһан зоной олонхинь юундэ сугларһанаашье ойлгонгүй байба.

³³ Тиимэһээ сугларһан зоной зариманиинь Александр гэжэ нэрэтэй хүндэ юу боложо байһые тайлбарила гэһэн эрилтэ табиба. Александрые еврейнүүд өөһэдынгөө дундаһаа түлхижэ урагшань гаргаба. Тэрэ шэмээгүй бологты гэжэ гараараа харуулаад, бэеэ сагааруулха һанаатай байхадань,

³⁴ тэрэниие еврей байна гэжэ мэдэхэдээ, зон нэгэн дуугаар: «Агууехэ Эфесэй Артемида алдаршаһай», – гэжэ хоёр сагай туршада зогсонгүй хашхаралдаба.

³⁵ Һүүлэй һүүлдэ хотын захирагшадай нэгэн зониие номгоруулжа: – Эфесэй эрхэтэн! – гэжэ хандаба. – Эфес агууехэ бурхан Артемидын һүмые, огторгойһоо унаһан нангин шулууе хамгаалан сахигша хото гэжэ мэдэхэгүй хүн олдохо аал?

³⁶ Энэ арсашагүй баримта юм, тиимэһээ таанад номгоржо, үймэлдэхэ шууялдахаяа болигты.

³⁷ Таанадай иишэнь шэрэжэ асарһан зон һүмэ дээрмэдээгүй, тиихэдэ Артемида бурханииемнайшье муудхаагүй ха юм.

³⁸ Хэрбээ Дэмээтрэ болон тэрээнтэй ерэһэн урлагшадай хэн нэгэниие зэмэлээ һаань, заргашада гү, али захирагшадта гэмнэлгэ нэхэбэритэйгээ хандаг лэ.

³⁹ Хэрбээ бүри шухала юумэ нэхэбэлтнай, хэрэгтнай хуулиин ёһоор зарлагдаһан эрхэтэнэй суглаан дээрэ шиидхэгдэхэ.

⁴⁰ Үгы һаа, бидэниие үймөө татаа гэжэ зэмэлхэдээ болохо, юундэб гэбэл, мүнөөдэр юундэ эндэ сугларһанаа бидэ тайлбарилжа шадахагүйбди, юугээршье өөһэдыгөө сагааруулха аргагүйбди. Иигэжэ хэлээд, тэрэ захирагша сугларһан зониие тарааба.