Хэрэгүүд 18 - Библи

Павел Коринф хотодо

¹ Эдэ бүхэнэй һүүлдэ Павел Афины хотоһоо Коринф хүрэжэ ерэбэ.

² Тэндэ Павел Понтһоо уг гарбалтай Ааквила гэдэг еврейтэй, тэрэнэй Прискиилла һамгатай уулзаба. Клавдий хаанай бүхы еврейнүүдтэ Римые орхижо ошохыень захирһан хада, тэдэ һая Италиһаа ерэһэн байба. Павел тэдэнэйдэ айлшалба.

³ Нэгэ ажал урлалгатай дээрэһээ хамта хүдэлбэ. Тэдэнэр майхануудые хэдэг байгаа.

⁴ Павел еврейнүүдыешье, грегүүдыешье этигүүлхэеэ оролдон, суббото бүхэн мүргэлэй гэртэ номнодог һэн.

⁵ Сила Тимофей хоёрой Македониһоо ерэхэдэнь, Павел Һайн Мэдээсэл номнолгодо өөрыгөө бүрин зорюулжа, Иисүүс гээшэмнай Бурханай табисуурта гэжэ еврейнүүдтэ баталан гэршэлжэ байгаа.

⁶ Теэд тэдэ зоной арсалдажа, хэрүүл татахадань, Павел өөрынгөө хубсаһа гүбеэд: – Бурханай абаралгаһаа арсажа байһандаа таанад өөһэдөө зэмэтэйт. Би зэмэгүйб, тиин мүнөө бусад арадуудта ошохомни, – гэжэ хэлэбэ.

⁷ Тэдэ зониие орхижо, Павел Бурханда һүзэглэдэг Титий Юст гэдэг хүнэй гэртэ ошобо. Энэ хүнэй гэрынь мүргэлэй гэрэй хажууда һэн.

⁸ Криисп гэжэ нэрэтэй мүргэлэй гэрэй дарга бүхы гэр бүлөөрөө Эзэндэ баһа этигээд байгаа. Номнол дуулаһан олон коринфууд этигэжэ, уһаар арюудхуулба.

⁹ Нэгэтэ һүни Эзэн Павелай үзэгдэлдэ орожо, хэлэбэ: – Бү ай, саг үргэлжэ номножо бай.

¹⁰ Би шамтай байнаб, хэншье шамда хоро хүргэхэгүй, энэ хотодо Минии хүнүүд олон бшуу.

¹¹ Тиимэһээ Павел тэндэ жэл хахад соо Бурханай үгэ номнобо.

¹² Ахайя можын захирагшаар Галлиониие табихада, еврейнүүд хоорондоо үгэсэлдөөд, Павелай урдаһаа бодожо, тэрэниие сүүдлэхэеэ шэрэжэ асарба.

¹³ – Энэ хүн манай Хуулида хэлэгдээгүй ёһоор Бурханда мүргэгты гэжэ хүнүүдые үгэдөө оруулжа байна, – гэлдэбэ тэдэ.

¹⁴ Павелай амаа нээжэ үрдеэгүй байтар, Галлион еврейнүүдтэ хандажа: – Ай, еврейнүүд, хэрбээ ямар нэгэн гэмтэ ябадал гү, али муу үйлэ тухай хэлэбэлтнай, би таанадые шагнаха байгааб.

¹⁵ Харин үгэнүүдһээ, нэрэ алдарһаа боложо, өөһэдынгөө Хуулиин асуудалнуудаар арсалдаа юм бол, өөһэдөө шиидхэгты. Энэ асуудалаар танай заргаша байха аргамгүй, – гэбэ.

¹⁶ Тиигэжэ хэлээд, Галлион заргын газарһаа тэдэ еврейнүүдые намнажархиба.

¹⁷ Харин тэдэнь мүргэлэй гэрэй дарга Сосфендэ добтолон орожо, зарга шиидхэдэг газарай урда тээ тэрэниие зада наншаба. Гэбэшье Галлион эдэ бүгэдые ойндоо абаагүй.

Павел Антиох бусажа ерэбэ

¹⁸ Павел үшөө олон үдэр тэндэ байгаад, удаань аха дүүнэртэйгөө хахасан, Прискиилла Ааквила хоёрые абаад, Сириин орон тамаржа ошобо. Хэзээ нэгэтэ үгэһэн дашаа тангаригайнь болзор дүүрэжэ, Павел Кенхрейдэ үһэеэ абхуулаа.

¹⁹ Эфестэ тамаржа ерэхэдээ, Павел нүхэдөө орхёод, мүргэлэй гэртэ ошожо, еврейнүүдтэй хөөрэлдэбэ.

²⁰ Тэрэниие үлыт даа гэжэ еврейнүүдэй гуйхадань, тэрэ зүбшөөбэгүй.

²¹ – Ойртожо байгаа һайндэрые би заатагүй Иерусалимда үнгэргэхэ ёһотойб. Хэрбээ Бурханай хүсэбэл, би таанадта дахин бусажа ерэхэб, – гэжэ хэлээд, тэдэнтэй хахасан, Эфесһээ тамаран ошобо.

²² Тэрэ Кесари хүрэжэ ерээд, саашаа Иерусалим зорибо. Тэндэ һүзэглэгшэ зонтой уулзаад, Антиох ошобо.

²³ Хэдэн сагай туршада Антиохдо байгаад, Павел замаа саашань үргэлжэлүүлэн, бүхы Галаадай болон Фригиин нютагуудаар ябажа, шабинарай этигэлые батадхан бэхижүүлбэ.

Аполлос гэдэг хүн Эфес ба Коринф хотонуудта

²⁴ Александриһаа уг гарбалтай Аполлос гэдэг еврей хүн Эфестэ бии болобо. Тэрэ ехэ уран хэлэтэй, Нангин Бэшэг һайн мэдэдэг һэн.

²⁵ Аполлос Эзэн тухай һургаалые дуулаһан байгаа. Гансал Иоаннай уһан арюудхалга мэдэжэ байһаншье мүртөө ехэ оролдосотойгоор, үнэн зүбөөр Иисүүс тухай хөөрэдэг һэн.

²⁶ Тэрэ хүн мүргэлэй гэртэ зоригтойгоор номножо эхилбэ. Прискиилла Ааквила хоёр тэрэниие шагнаад, гэртээ урижа, Бурханай зам тухай тэрээндэ бүри тодорхойгоор хөөрэжэ үгэбэ.

²⁷ Тэрэнэй Ахайя ошохо гэжэ шиидэхэдэ, угтажа абахыень гуйһан бэшэг һүзэглэгшэд тэндэхи шабинарта бэшэбэ. Ахайя ерээд, Бурханай үршөөлөөр һүзэглэһэн зондо Аполлос ехэ туһалба.

²⁸ Юуб гэхэдэ, тэрэ олон зоной дунда еврейнүүдтэй заргалдан, тэдэниие буруушаажа, Нангин Бэшэгһээ хэһэгүүдые хэрэглэн, Иисүүс гээшэмнай Бурханай табисуурта мүн гэжэ баталба.