Хэрэгүүд 17 - Библи

Павел Сила хоёр Фессалоники хотодо

¹ Павел Сила хоёр Амфиполь, Аполлони хотонуудые дамжан, Фессалоникидэ хүрэжэ ерэбэ. Тэндэ мүргэлэй гэр бии һэн.

² Павел урдынгаа заншалаар тиишэ орожо, гурбан субботын туршада Нангин Бэшэгһээ жэшээнүүдые дурдан,

³ Бурханай табисууртын ехэ зоболон дабажа, һүүлдэнь амидырха ёһотой байһан тухай зондо айладхаба. «Энэ Иисүүс эгээл Бурханай заяаһан Абарагша мүн», – гэжэ тобшолол гаргаба.

⁴ Мүргэлэй гэртэ байһан хүнүүдэй зариманиинь этигэжэ, Павел Сила хоёртой нэгэдэбэ. Тэдэнһээ гадна ори ганса Бурханиие хүндэлдэг олон тоото грегүүд, нэрэ хүндэтэй эхэнэрнүүд Эзэндэ һүзэглөө.

⁵ Гэбэшье еврейнүүд атаархан, гудамжын үгытэй зоной дундаһаа хэдэн хара һанаатай хүнүүдые шэлэжэ, олон зониие суглуулаад, хотынхидой дунда үймөө татаба. Тэдэ зон Павел Сила хоёрые олоод, зоной урда шиидхэхын тула Ясооной гэртэ сүмэрэн оробо.

⁶ Тэдэ хоёрые оложо ядахадаа, тэдэнэр Ясоониие, баһа хэдэн һүзэглэгшэдые хотын захирагшадта шэрэжэ абаашаад: – Эдэ түби дэлхэйе үймүүлһэн зон, мүнөө манай хотодо ерээд байна, – гэжэ хашхаралдаба.

⁷ – Ясоон тэдэниие гэртээ байрлуулаа. Ондоо хүниие, Иисүүсые хаан гэжэ нэрлэхэдээ, тэдэнэр римэй хаанай зарлигые буруушаана.

⁸ Эдэ бүхэниие дуулахадаа, хотын захирагшадшье, юрын зоншье айн һүрдэбэ.

⁹ Ясооной, бусад һүзэглэгшэдэй барюулга орхиходонь лэ тэдэниие табяа һэн.

Павел Сила хоёр Бээрэ хотодо

¹⁰ Һүни болохотой сасуу һүзэглэгшэд Павел Сила хоёрые Бээрэ хото руу ябуулба. Тэндэ хүрэжэ ерээд, тэдэ хоёр мүргэлэй гэртэ ошобо.

¹¹ Энэ хотын зон Фессалоникиинхидтэ орходоо Бурханай үгэ үлүү ехээр шагнаха дуратай байжа, номнол анхаралтайгаар хүлеэн абаад, Павел Сила хоёрой хэлэһэниинь үнэн гү гэжэ мэдэхын тула Нангин Бэшэгые үдэр бүхэн шудалжа байба.

¹² Тиигэжэ тэдэ зоной олониинь этигэбэ. Тэдэнэй дунда олон нэрэ хүндэтэ грек эхэнэрнүүд, эрэшүүл байгаа.

¹³ Гэбэшье Фессалоникидэ ажаһуудаг еврейнүүд Бурханай үгэ Бээрэдэшье Павел номноно гэжэ дуулахадаа, баһа тиишэ ошожо, зониие үймүүлэн хүлгөөбэ.

¹⁴ Һүзэглэгшэд дары Павелые далай хүргэжэ ошобо, харин Сила Тимофей хоёрынь Бээрэдэ үлэбэ.

¹⁵ Павелые үдэшэһэн хүнүүд тэрэниие Афины хүргөөд, Сила Тимофей хоёр аргатай байбал, түргөөр ерэг гэһэн Павелай захиралта абамсаараа, һөөргөө бусаба.

Павел Афины хотодо

¹⁶ Павел тэрэ хоёроо Афиныдэ хүлеэжэ байхадаа, хотоор дүүрэн бодхоогдоһон онгонуудые хаража гашуудаба.

¹⁷ Тэрэ мүргэлэй гэртэ еврейнүүдтэй болон бусад арадуудай дундаһаа Бурханда һүзэглэһэн зонтой, мүн талмай дээрэ уулзаһан хүн бүхэнтэй үдэр бүри хөөрэлдэдэг байгаа.

¹⁸ Эпикур болон стоик һургаалай гүн ухаантанууд тэрээнтэй уулзажа: – Энэ дэмы шашагша юу хэлэхэ һанаатайб? – гэжэ нэгэ зариманиинь хэлэжэ байба. – Үгы, энэшни хариин бурхадууд тухай номноно ха, – гэжэ нүгөөдүүлынь хэлэбэ. Юундэ тиигэжэ хэлсээб гэхэдэ, Павел Иисүүс тухай, Тэрэнэй амидыралга тухай номноо.

¹⁹ Гүн ухаантанууд Павелые Ареопаг хүтэлжэ абаашаад: – Танай номноһон шэнэ һургаал маанадта шагнажа болохо гү? – гэжэ һурабад. –

²⁰ Та нэгэл жэгтэй һонин юумэ һонорто дуулганат. Тиимэһээ энэ юун ааб гэжэ бидэ мэдэхэ һанаатайбди.

²¹ Афины хотынхид, тэндэ ажаһуугша хариин зон шэнэ үзэлнүүдые шагнан, тэдэниие зүбшэн хэлсэһээр лэ сүлөө сагаа үнгэргэдэг байгаа.

²² Павел Ареопагай дунда зогсожо: – Афинынхин, таанарай аргагүй һүзэгтэй зон байхые би ажаглажа байнаб.

²³ Юундэб гэхэдэ, танай мүргэл шүтөөнүүдые хаража байхадаа, «мэдэгдээгүй Бурханда» гэжэ бэшээтэй үргэлэй шэрээ би оложо харааб. Танай мэдээгүй аад, шүтэжэ мүргэжэ байһан эгээл тэрэ Бурхан тухай би номножо байнаб.

²⁴ Юртэмсэ дэлхэйе, тэрээн дээрэ оршодог хамаг юумэ бүтээһэн Бурхан газар тэнгэриин Эзэн юм, гараар бодхоогдоһон һүмэдэ амидардаггүй юм.

²⁵ Хүнэй ямаршье туһаламжа Бурханда хэрэггүй. Тэрэ Өөрөө амитай бүхы юумэндэ ами наһа, амисхал, бүгэдые үгэнэ.

²⁶ Бүхы дэлхэйгээр нютагжахынь тула амидарха саг болзорыень болон байрлаха хилэ хизаарыень тогтоон, ори ганса хүнһөө бүхы хүн түрэлхитэниие Тэрэ бүтээгөө.

²⁷ Бурхан хүн бүхэнһөөмнай холо бэшэ гэжэ мэдэрэн, Тэрэниие бэдэржэ олохын тула эдэ бүгэдые зохёогоо юм.

²⁸ «Бидэнэр Бурханай ашаар амидаржа, хүдэлжэ, ажаһуужа байнабди». Танай шүлэгшэдэй зариманиинь баһал: «Бидэ Тэрэнэй угсаатан гээшэбди», – гэжэ хэлээ бэлэй.

²⁹ Хэрбээ бидэ Бурханай угсаатан һаа, Бурхан гээшэмнай хүнэй һанаашалгаар алтаар, али мүнгөөр, али шулуугаар дүрсэлһэн уран бүтээлэй урлалга гэжэ бодохо ёһогүйбди.

³⁰ Бурханиие мэдээгүй сагта Бурхан эдэ бүгэдые хүнүүдтэ хүлисэдэг байгаа. Харин мүнөө хаа хаанагүй ажаһуудаг зониие нүгэл үйлэдэхэеэ болихыень Бурхан захирна,

³¹ юундэб гэхэдэ, Бурхан юртэмсэ дэлхэйе үнэн зүб зарга шиидхэбэреэр шүүхэ үдэрөө тогтоогоо, тиин Зарга шүүгшэеэ Тэрэ томилон табяа. Тэрэниие Бурхан амидыруулжа, бүхы хүнүүдтэ гэршэ баримта болгон үгөө.

³² Үхэһэн хүнүүдые амидыруулһан тухай дуулахадаа, нэгэ зарим зон ташаганаса энеэлдэбэ, нүгөө зариманиинь: – Бидэ таниие үшөө дахин шагнуужамди, – гэлдэбэ.

³³ Тиихэдэнь Павел тэдэниие орхижо ошоо.

³⁴ Гэбэшье хэдэн хүн Эзэндэ этигэжэ, Павелай шабинар болобо. Тэдэнэй дунда Ареопагай гэшүүн Дионисий, Дамариида гэжэ нэрэтэй эхэнэр болон бусадшье зон байгаа.