Хэрэгүүд 15 - Библи

Иерусалимда болоһон суглаан

¹ Иудейһээ Антиохдо хэдэн хүн ерээд, «Моисейн захиһан ёһоор бэлгээ отолуулаагүй һаа, таанад абарагдахагүйт», – гэжэ һүзэглэгшэдые һургаба.

² Энэ асуудалай талаар Павел Барнааба хоёр тэдэнтэй нилээд заргалдаба, арсалдаба. Тиимэһээ энэ асуудалые элшэнэртэй ба бүлгэмэй хүтэлэгшэдтэй зүбшөөд ерэхыень Павел Барнааба хоёрые хэдэн һүзэглэгшэдтэй хамта Иерусалим эльгээхэ гэжэ шиидэбэ.

³ Антиохой һүзэглэгшэдэй бүлгэмэй эльгээһэн зон Финикиин ба Самариин нютагуудаар ябахадаа, бусад арадуудай Бурханда яажа хандаһан тухай хөөрэжэ байба, тиихэдэнь бүхы һүзэглэгшэд угаа ехээр баярлажа байба.

⁴ Иерусалимда ерэхэдэнь, тэдэниие һүзэглэгшэдэй бүлгэм, элшэнэр, бүлгэмэй хүтэлэгшэд уриба. Хүрэжэ ерэһэн зон Бурханай тэдэнээр бүтээлгэһэн бүгэдые хөөрэжэ үгөө.

⁵ Иисүүстэ этигэһэн фарисейнүүдэй дундаһаа хэдэн хүн үгэ хэлэхэдээ: – Еврей-бэшэнүүд бэлгээ баһа отолуулха ёһотой, Моисейн Хуули сахихыень тэдэниие уялгаха хэрэгтэй, – гэжэ баадхабад.

⁶ Элшэнэр, бүлгэмэй хүтэлэгшэд энэ асуудалаар зүбшэн хэлсэхэ гэжэ сугларба.

⁷ Арсалдаан гараһаар нилээд удаан сагай үнгэрһэн хойно Пётр бодожо: – Аха дүүнэрни! – гэбэ. – Бусад арадуудай дунда Һайн Мэдээсэл номнон этигэл түрүүлхымни тула Бурхан үни гэһээр намайе таанадай дундаһаа шэлэжэ абаа һэн гэжэ һайн мэдэнэт.

⁸ Хүнүүдэй һанал бодол мэдэдэг Бурхан бидэндэ үгэһэндөөл адляар тэдэндэ Арюун Һүлдэ үгэхэдөө, Өөрынгөө үршөөл хайра баһа бусад арадуудта хайрлаба гээшэ.

⁹ Бурхан маанадай болон бусад арадуудай хоорондо ямаршье илгаа гарганагүй, юундэб гэхэдэ, тэдэнэй зүрхэ сэдьхэл этигэлээр арюудхагдаа.

¹⁰ Тиигээд үбгэ эсэгэнэртэмнайшье, маанадташье даагдахагүй хүндэ ашаае шабинарай хүзүүндэ тээхэеэ оролдон, Бурханиие мүнөө юундэ туршаа юмта.

¹¹ Бидэ гансал Эзэн Иисүүсэй үршөөл хайраар абарагдаабди гэжэ этигэнэбди, тиин тэдэшье баһа Иисүүсэй үршөөл хайраар абарагдаа.

¹² Сугларһан зон абяагүй болоод, ямар гайхамшагта дүлгэ тэмдэгүүдые, үйлэ хэрэгүүдые Бурхан Павел Барнааба хоёрой гараар бусад арадуудай дунда бүтээгөө юм гэжэ тэдэ хоёрой хөөрэһые шагнаба.

¹³ Тэдэнэй хөөрэжэ дүүргэхэдэ, Яков хэлэжэ эхилбэ: – Аха дүүнэрни, намайе шагныт!

¹⁴ Бурханай Өөрын нэрэ алдараар анха түрүүшынхиеэ бусад арадуудай дундаһаа хүнүүдые шэлэжэ абаһан тухай Симон бидэндэ хөөрэжэ үгөө.

¹⁵ Лүндэншэдэйшье үгэнүүд эдэ бүхэниие тобшолно:

¹⁶ «Тэрэнэй һүүлдэ Би бусажа ерээд, Давидай унаһан майханиие дахин бодхоохоб. Һандаран һалаад байһан тэрэниие бодхоожо, дахин шэнээр һэргээхэб.

^17-18 Тиихэдэ Минии хүнүүд болохоор дуудуулһан бусад яһатан болон ондоошье улад зон Эзэниие бэдэрхэ. Эртэ урда сагһаа энээн тухай дуулгаһан Эзэн иигэжэ хэлэнэ».

¹⁹ Тиимэһээ Бурханда хандажа байһан еврей-бэшэ хүниие бидэ хорихо, зобоохо ёһогүйбди гэжэ тоолоноб.

²⁰ Харин онгонуудта үргэжэ бузарлагдаһан хоол барихыень, забхайрхыень, боожо алаһан амитадай мяха, шуһа амсахыень хориһон бэшэг бэшэжэ, тэдээндэ эльгээхэ ёһотойбди.

²¹ Юундэб гэхэдэ, Моисейн Хуули эртэ урда сагһаа хото бүхэндэ номногдожо, мүргэлэй гэрнүүдтэ суббото бүхэндэ уншагдана ха юм.

Бусад арадуудай дундаһаа һүзэглэһэн зондо эльгээгдэһэн бэшэг

²² Тиигээд элшэнэр, бүлгэмэй хүтэлэгшэд һүзэглэгшэдтэйгөө хамта хэдэн хүниие өөһэдынгөө дундаһаа шэлэжэ абаад, Павел Барнааба хоёртой Антиох руу эльгээхэ гэжэ шиидэбэ. Тэдэ һүзэглэгшэдэй дундаһаа нэрэ хүндэтэй Баршаббаа гэжэ ара нэрэтэй Иудые, мүн Силые шэлэжэ абаад,

²³ тэдэнэй дамжуулха ёһотой иимэ бэшэг бэшэбэд: «Элшэнэр, Иерусалимай бүлгэмэй хүтэлэгшэд болон бүхы һүзэглэгшэд Антиох, Сири, Киликидэ ажаһуудаг бусад арадуудай дундаһаа Христоосто һүзэглэһэн зониие амаршална.

²⁴ Зарим һүзэглэгшэднай манһаа абаагүй захиралтаар һанал бодолыетнай һамааруулна, таанадые зобооно гэжэ бидэ дуулаабди.

^25-26 Тиимэһээ манай Эзэн Иисүүс Христоосто алба хэжэ өөрынгөө ами наһые хайрладаггүй, манда ехэ зохистой Барнааба Павел хоёртой хэдэн хүнүүдые шэлэжэ эльгээхэ гэжэ бидэ зүбшэбэбди.

²⁷ Иуда Сила хоёрые, эдэ бүгэдые таанадта тайлбарилжа үгэхыень эльгээнэбди.

^28-29 Онгонуудта үргэжэ бузарлагдаһан хоол, боожо алаһан амитадай шуһа, мяха амсангүй, забхайрангүй байгаарайгты. Энээнһээ гадна ондоо захиралта таанадта үгэхэгүй гэжэ Арюун Һүлдэ болон бидэнэр шиидэбэбди. Дээрэ дурдагдаһан юумэнүүдые сахижа байбал, бүхы юумэн һайн байха. Баяртай!»

³⁰ Антиох хүрэжэ ерээд, эльгээгдэһэн хүнүүдынь һүзэглэгшэдэй бүлгэм суглуулаад, үнөөхи бэшэгээ дамжуулжа үгэбэ.

³¹ Энэ урмашуулһан бэшэг уншаад, зон угаа ехээр баярлаа.

³² Иуда Сила хоёр лүндэншэд байһан туладаа үгэ хэлэжэ, һүзэглэгшэдые зоригжуулан урмашуулба.

³³ Тиигээд тэдэ хоёр хэдэн сагай туршада Антиохдо байба, һүүлдэнь һүзэглэгшэ аха дүүнэрынь тэдэниие үреэгөөд, элшэнэртэ һөөргэнь ябуулба.

³⁵ Павел Барнааба хоёр Антиохдо үлэбэ. Тэдэ бусад олон һүзэглэгшэдөөр хамта улад зониие һургажа, Эзэнэй Һайн Мэдээсэл номножо байбад.

Павел Барнааба хоёр хахасабад

³⁶ Нэгэ хэды сагай үнгэрхэдэ Павел Барнаабада: – Эзэнэй Үгэ ямар хотонуудта номноо һэмди, тэдэ хотонуудаар ябаад, тэндэ ажаһууһан аха дүүнэрээ эрьеэд, хэрэгүүдынь ямархан бэ гэжэ харая, – гэһэн дурадхал оруулба.

³⁷ Барнааба болбол Марк гэжэ нэрэтэй Иоанные абажа ябалсаха һанаатай байгаа.

³⁸ Гэбэшье Памфилида тэдэниие хаяжа, хэрэгыень бүтээлсэхэеэ арсаһан Маркые Павел абажа ябаха дурагүй байгаа.

³⁹ Энээн дээрэһээ Павел Барнааба хоёр зүрилдөөд хахасабад. Барнааба Маркые дахуулаад, Кипр арал руу тамаран ошобо.

⁴⁰ Харин Павел Силые замай нүхэр болгон абаба. Аха дүүнэрынь тэдэниие Эзэнэй үршөөл хайрада даалгажа табяа һэн.

⁴¹ Тэдэ Сириин, Киликиин хотонуудаар аха дүүнэрээ батадхан ябабад.