Хэрэгүүд 13 - Библи

Барнааба Саул хоёрые Һайн Мэдээсэл номнохыень эльгээбэ

¹ Антиохой һүзэглэгшэдэй бүлгэмдэ зарим лүндэншэд, багшанар: Барнааба, Нигер гэһэн ара нэрэтэй Симеон, Хэрээн хотын Лукий, Саул, бага байхадаа хаанай хүбүүн Иродтэй хүмүүжүүлэгдэһэн Мэнааһэм гэгшэд бии һэн.

² Нэгэтэ тэдэнэй Эзэндэ алба хэжэ, масаглажа байхада Арюун Һүлдэ тэдээндэ: – Ямар үүргэ даалган Барнааба Саул хоёрые дуудаа һэнби, тэрэ хэрэгыемни бүтээхыень тэдэ хоёрые Намда табигты, – гэжэ хэлэбэ.

³ Масаглажа, мүргэл зальбаралаа дүүргэһэн хойноо тэдэ зон үнөөхи хоёрые гараараа адислан табиба.

Кипр аралда

⁴ Арюун Һүлдын нүлөөгөөр харгы замда гараһан Барнааба Саул хоёр Селевки хүрэжэ ерээд, тэндэһээ Кипр аралда тамаран ошобо.

⁵ Саламин хүрэжэ ерээд, тэдэнэр мүргэлэй гэрнүүдтэ Бурханай Үгэ номнобо. Тиихэдэ тэдэнтэй Иоанн ябалсажа, туһалжа байгаа.

⁶ Бүхы Кипр аралые гаталан, тэдэ Пафос хото хүрэжэ ерэбэд. Тэндэ Бар-Иисус гэжэ нэрэтэй эльбэшэ, хуурмаг лүндэншэ еврей хүнтэй уулзаба.

⁷ Бар-Иисус аралые захирагша Сергий Павел гэдэг эрдэм ухаа ехэтэй хүнэй нүхэрынь һэн. Сергий Павел гээшэнь Бурханай үгэ дуулаха дуратай байжа, Барнааба Саул хоёрые өөртөө дуудаба.

⁸ Теэд Элиим гэжэ (энэнь тэрэнэй грек нэрэ) эльбэшэн захирагшын этигэхэдэ һаалта хэжэ, шабинарта эсэргүүсэбэ.

⁹ Саул (ондоогоор Павел) Арюун Һүлдөөр дүүрэн, Элиим тээшэ анхаралтайгаар шэртэн хараад:

¹⁰ – Ши, худал хуурмагай бэелэл, шолмосой хүбүүн, али бүхы үнэн юумэнэй дайсан! Эзэнэй арюун сэхэ замые саашадаашье хазагайруулжа ябахаб гэжэ һанана гүш?

¹¹ Мүнөө Эзэнэй гар шам дээрэ зогсоо. Ши һохор боложо, хэдэн сагай туршада наранай гэрэл үзэхэгүйш, – гэжэ хэлэбэ. Тэрэ дороо Элиимые боро хараан бүрхөөн хушажа, хүтэлжэ ябаха хүниие бэдэрэн, тэрэ иишэ тиишээ тэмтэрбэ.

¹² Ушарһан бүхэниие хараһан захирагша ехээр гайхан, Эзэн тухай һургаалда этигээ һэн.

Писидиин Антиохдо

¹³ Павел замайнгаа нүхэдтэй Пафосһаа тамаржа гараад, Памфилиин нютагай Пээргэ хото хүрэжэ ерэбэ. Тэндэ Иоанн тэдэниие орхёод, Иерусалимаа бусажа ошоо һэн.

¹⁴ Харин үлэһэн нүхэдынь Пээргэһээ Писидиин Антиох зорижо ерээд, субботын үдэр мүргэлэй гэртэ орожо һуубад.

¹⁵ Хуулиин, лүндэншэдэй номһоо хэһэгүүдые уншаһанай хойно мүргэлэй гэрэй ахамадууд: – Аха дүүнэр, хүн зониие урмашуулхаар юумэн танда байгаа һаа, хэлыт даа, – гэжэ айлшадта хандаба.

¹⁶ Павел өөдөө бодожо, шэмээгүй бологты гэжэ гараараа харуулаад: – Израильшууд, Бурханиие хүндэлэгшэд, шагныт даа!

¹⁷ Израилиин арад зоной Бурхан манай үбгэ эсэгэнэрые шэлэжэ абаад, хариин газарта, Египедтэ ажаһуухадань, тэдэниие агууехэ үндэһэн болгоо. Тиигээд хүсэн түгэлдэр гараараа Бурхан тэдэниие Египедһээ гаргажа,

¹⁸ дүшэн жэлэй туршада сүл губида тэдэнтэй тэсэбэритэй байгаа.

¹⁹ Ханаһаанай газар нютагта долоон үндэһэтэниие тэрэ һүнөөгөөд, газарыень манай үбгэ эсэгэнэртэ эзэлжэ байхаарнь үгөө һэн.

²⁰ Иигэжэ дүрбэн зуун табин жэл үнгэрөө. Тэрэнэй удаа Бурхан заргашадые үгөө. Заргашад лүндэншэ Самуилай үе саг хүрэтэр захираа.

²¹ Һүүлдэ хааниие манда үгыт гэжэ израильшуудай гуйхадань, Бурхан тэдэндэ Бэньямиинэй угсаатанай Киишэй Саул хүбүүе үгэбэ, тиин тэрэнь дүшэн жэлэй туршада хаан шэрээдэ һууба.

²² Тэрэниие тушаалһаань халажа, Бурхан Давидые израильшуудай хаан болгожо табяа. Тиин тэрээн тухай Бурхан: «Би Ишайн хүбүүн Давидые оложо абааб, тэрэ минии һанаа сэдьхэлдэ таарама байна, тэрэ захиралтануудыемни бултыень дүүргэхэ», – гэжэ хэлээ юм.

²³ Бурхан найдуулһан ёһоороо Давидай үри һадаһан болохо Абарагша Иисүүсые Израильда эльгээгээ.

²⁴ Тэрэнэй заларан ерэхые Иоанн уридшалан айладхажа, нүгэл үйлэдэхэеэ болёод, уһаар арюудхахыень бүхы Израилиин зониие уряалаа.

²⁵ Ажалаа түгэсхэхэ хирэдээ Иоанн: «Намайе хэн гэжэ һананабта? Би таанадай хүлеэһэн хүн бэшэлби. Таанадай хүлеэһэн Нэгэн минии хойноһоо заларжа ябана, тиин би Тэрэнэй гуталайнь ооһорыешье тайлаха эрхэгүйб!» – гэжэ хэлээ һэн.

²⁶ Аха дүүнэрни! Абраһаамай үри һадаһад, Бурханиие хүндэлэгшэд, абаралга тухай энэ мэдээсэл бидэндэ эльгээгдэһэн байна.

²⁷ Иерусалимда ажаһуугшад ба захирагшад Бурханай табисууртые таняагүй, Тэрэниие гэмнээд, суббото бүхэндэ уншадаг лүндэншэдэй ном соо бэшэгдэһые бүтээгээ.

²⁸ Тэрэниие саазалха нэгэшье баримта олонгүй, тэдэ зон Иисүүсые саазала гэжэ Пиладые баалаа.

²⁹ Тиигэжэ тэдэнэр Иисүүс тухай Нангин Бэшэг соо бэшээтэй зүйл бүхэниие бэелүүлбэ. Тэдэнэр Иисүүсые хэрээһэнһээ буулгажа, агы нүхэндэ хүдөөлүүлээ һэн.

³⁰ Гэбэшье Бурхан Тэрэниие амидыруулаа.

³¹ Галилейһээ Иерусалим хүрэтэр Тэрээнтэй хамта ерэлсэһэн хүнүүдтэ олон үдэрэй туршада Тэрэ үзэгдөө, тиимэһээ тэдэнь мүнөө хүнүүдтэ Иисүүс тухай баталан гэршэлнэ.

³² Харин бидэ манай үбгэ эсэгэнэртэ үгтэһэн үгэ бүтэбэл даа гэжэ Һайн Мэдээсэлые айладхажа байнабди.

³³ Бурхан Иисүүсые амидыруулхадаа, бидэндэ, тэдэнэй үри хүүгэдтэ найдуулһанаа бүтээгөө. Энээн тухай «Бурханай дуунай номой» хоёрдохи дуун соо иигэжэ бэшэгдэнхэй: «Ши Минии хүбүүнши, мүнөөдэр Би эсэгэшни болооб».

³⁴ Бурханай Тэрэниие амидыруулһан, гутаан үмхирүүлээгүй тухай: «Давидта найдуулһан үреэлнүүдээ Би таанадай дунда бэелүүлхэб», – гэжэ бэшээтэй байдаг.

³⁵ Тиимэһээ Нангин Бэшэгэй ондоо газарта: «Та Өөрын шударгы Зарасые шалзараажа үмхирүүлхэгүйт», – гэжэ хэлэгдэнэ.

³⁶ Давид бүхы наһаараа Бурханай уг зорилгые бүтээжэ, һүүлдэ наһа барахадаа үбгэ эсэгэнэртэйгээ суг хүдөөлүүлэгдөө, бэень эсэстээ шалзаран үмхирөө.

³⁷ Харин Бурханай амидыруулһан Нэгэн шалзаран үмхирхэгүй.

^38-39 Тиимэһээ, аха дүүнэрни, Иисүүсээр дамжуулан, Бурхан таанадта нүгэл хүлисэхэ тухай айладхаа гэжэ мэдэгты. Моисейн Хуули сахяадшье хүлисүүлхэ аргагүй нүгэлнүүдые Иисүүстэ этигэдэг хүн бүхэндэ Иисүүсэй хүсөөр тэрэ нүгэлнүүдынь хүлисэгдэбэ.

⁴⁰ Лүндэншэдэй иигэжэ хэлэһэн үгэнүүд таанадтай тохёолдохогүйн тула таанад һэргэг байгты:

⁴¹ «Харагты даа, шоглон гасаалагшад, гайхалдагты, хосорогты! Таанадта дуулгаашье һаа, танай үнэншэхөөр бэшэ Агууехэ үйлэ хэрэг эдэ үдэрнүүдтэ Би бүтээхэмни».

⁴² Павел Барнааба хоёрой мүргэлэй гэрһээ гаража байхада, һая хөөрэһэн юумэеэ ерэхэ субботодо үргэлжэлүүлэн хэлэхыень хүнүүд гуйба.

⁴³ Сугларһан зоной таража эхилхэдэ, еврейнүүд болон еврейнүүдэй шажанда этигэһэн олон хүнүүд Павел Барнааба хоёрые дахаба, харин тэдэ хоёрынь саашадаашье Бурханай үршөөл хайрада амидархыень тэдэ зониие идхан һургаба.

⁴⁴ Нүгөө субботодо бүхы хотын зон тооной Эзэнэй Мэдээсэл шагнахаяа сугларба.

⁴⁵ Еврейнүүд иимэ олон зониие харахадаа, ехээр атаархажа, Павелые муудхан, тэрээнтэй арсалдаба.

⁴⁶ Павел Барнааба хоёр зоригтойгоор иигэжэ хэлэбэ: – Бидэ Бурханай үгэ анха түрүүн таанадта соносхохо ёһотой байгаабди. Харин энэ үгые таанадай буруушаажа, мүнхын амидаралда хүртэхөөр бэшэбди гэжэ өөһэд тухайгаа һанаа юм һаатнай, бидэ мүнөө бусад арадуудта ошохомнай.

⁴⁷ Эзэн бидэндэ: «Газар түбиин заха хизаар хүрэтэр абаралга асархыншни тула Би шамайе бусад арадуудай гэрэл туяа болгон табяаб», – гэжэ захяа һэн.

⁴⁸ Хэлэһыень дуулахадаа, бусад арадууд ехээр баярлажа, Эзэнэй үгые алдаршуулба, тиигээд мүнхэ ажамидархаар шэлэгдэһэн хүнүүд булта һүзэглэбэ ха.

⁴⁹ Бурханай үгэ энэ орон нютагаар хаа хаанагүй дэлгэрэн тараа.

⁵⁰ Гэбэшье еврейнүүд хотын түрүү хүнүүдые болон Бурханда һүзэглэһэн хүндэтэ эхэнэрнүүдые Павел Барнааба хоёрто эсэргүү һанаатай болгобо. Тэдэ хоёрые хашан мүрдэжэ, нютагһаан намнаба.

⁵¹ Тиихэдэнь Павел Барнааба хоёр хүлдөө халдаһан тооһо гүбижэ, Икоони руу ошобо.

⁵² Тэрэ үедэ Антиохдо байһан шабинар баяр баясхалангаар, Арюун Һүлдөөр дүүрээд байба.