Хаггай 1 - Библи

Иерусалимай Һүмые шэнэлэн барихые Эзэн захирна

¹ Персиин агууехэ хаан Даариин хаан шэрээ эзэлһэн сагһаа хойшо хоёрдохи жэлэй зургаадахи һарын түрүүшын үдэр Эзэн Хаггай лүндэншэдэ хандан, Иудын захирагша, Шалтиээлэй хүбүүн Зэрубабээлдэ ба ахамад санаарта Ёцадаагай хүбүүн Иисүүстэ айладхалыень дамжуулхые захирба.

² Түмэн Сэрэгтэ Эзэн иигэжэ айладхаһан байна: «Минии Һүмэ бариха саг үшөө ерээдүй гэжэ энэ арад түмэн хэлэжэ байна».

³ Тиигээд Эзэн Хаггай лүндэншөөр иигэжэ дамжуулан айладаа:

⁴ – Һүмын эзэгүйрэн хооһороод байхада гоёогдоһон гэрнүүдтээ таанад өөһэдөө байха сагтай аалта?

⁵ Мүнөө Би, Түмэн Сэрэгтэ Эзэн, иигэжэ айладханаб: Өөрынгөө хэһэн үйлэ хэрэгүүд тухай бодомжолжо үзэгты!

⁶ Таанар ехээр тарибашье, бага ургаса хуряанат. Эдеэлээшье һаа, саданагүйт. Уугаашье һаа, һогтоногүйт. Хубсалаашье һаа, дулаасанагүйт! Олоһон мүнгэнтнай хахархай хармаанда ороод лэ үгы болоно.

⁷ Би, Түмэн Сэрэгтэ Эзэн, иигэжэ айладханаб: Өөрынгөө хэһэн үйлэ хэрэгүүд тухай бодомжолжо үзэгты!

⁸ Хада өөдэ гаража, модо отолон, Һүмэ барижа эхилэгты! Би тэрээндэ сэдьхэлээ ханан, тэрээн соо магтуулан, Өөртөө мүргүүлэн байхаб.

⁹ Ехэ юумэ хүлеэнэт, теэд бага юумэн болоно. Гэртээ асарһан юумыетнай Би хумхаа тооһон болгохоб. «Ямар ушарһаа?» – гээд асуухадатнай, Би, Түмэн Сэрэгтэ Эзэн, иигэжэ харюу үгэхэб: «Хүн бүхэнтнай өөрын гэр шэмэглэн сүлөөгүй ажаллана, харин Минии Гэр хооһон, һандархай байна. Энээнэй түлөө!»

¹⁰ Энээнэйл түлөө таанарта тэнгэри шүүдэр, аадар үгэнэгүй, газар үрэжэл үгэнэгүй.

¹¹ Ган гасуурые Би дуудааб! Газар руу – хадануудта, таряалангуудта, үзэмэй модоной сэсэрлигтэ, оливын мододто, – юрэдөө, газарай ургуулдаг бүхы юумэндэ, хүн зондо, мал адууһанда, хүнэй хэдэг бүхы ажалда.

Һүмые шэнэлэн бариха ажал эхилбэ

¹² Шалтиээлэй хүбүүн Зэрубабээл, Ёцадаагай хүбүүн Иисүүс болон бусад арад түмэн Хаггай лүндэншые Эзэн Бурханаар эльгээгдэһэн мүн гэжэ мэдэржэ, Эзэн Бурханайнгаа Хаггай лүндэншөөр дамжуулһан үгэ дуулаба. Тиигээд тэдэ Эзэнһээ айжа, Тэрэниие хүндэлжэ эхилбэ.

¹³ Эзэнэй мэдээсэгшэ Хаггай айладхалынь арад түмэндэ дамжуулба: «Би таанадтай байхаб, энэ Минии найдуулга мүн гэжэ Эзэн айладхана!»

¹⁴ Түмэн Сэрэгтэ Эзэн Бурханайнгаа Һүмэ соо ажал хэхыень Иудын захирагша, Шалтиээлэй хүбүүн Зэрубабээлдэ ба ахамад санаарта Ёцадаагай хүбүүн Иисүүстэ болон баряанһаа бусаһан үлдөөсэ арад зондо Эзэн һүр һүлдыень хүдэлгүүлбэ. Тиигээд тэдэ ерэжэ, Һүмэ заһабарилжа эхилбэ.

¹⁵ Энэ хадаа агууехэ хаан Даариин хаан шэрээдэ заларһаар хоёрдохи жэлэй зургаадахи һарын хорин дүрбэдэхи үдэр болоо бэлэй.