Исай 8 - Библи

Эзэнэй дүлгэ тэмдэг – Исайн хүбүүн

¹ Эзэн намда иигэжэ айладхаба: – Томо хабтаһа абаад, зоной уншахаар, ойлгохоор дээрэнь томо үзэгөөр «Һаяар дээрмэдэлгэ, түргөөр тонолго» гээд бэшэ.

² Би найдамтай гэршэнэрые – Урияа санаартаниие ба Ебэрээхия гэгшын хүбүүн Захарияае дуудахаб.

³ Тиигээд би һамгантаяа унтажа, һамгамни хээлитэй болоод, хүбүү түрөө бэлэй. Эзэн намда айладхаба: – Хүбүүгээ «Һаяар дээрмэдэлгэ, түргөөр тонолго» гээд нэрлэгты.

⁴ Юуб гэхэдэ, энэ үхибүүнэй «аба, эжы» гэжэ хэлэжэ һуратар Дамааскын бүхы эд баялиг болон Самариин бүхы олзо Ассириин хаанай болохо.

Ассириин хаан ерэхэ

⁵ Эзэн намтай дахин хөөрэлдэбэ.

⁶ Тэрэ иигэжэ айладхаа: «Эдэ зоной Шилоах горхоной аалин намдуу урасхал уһые шамарлажа, Рэциин ба Рэмаалияагай хүбүүндэ баясажа байһандань

⁷ Би, Эзэн Бурхан, тэдээндэ бүхы сэрэгээрээ добтолхыень Ассириин хааниие асархаб. Эрьеһээ халин үерлэгшэ Евфрат мүрэнэй ехэ урасхал уһандал адли тэрэнэй сэрэг нэбтэрэн-халин ерэхэл.

⁸ Тэдэ Иудын хан түрын газараар үер мэтэ дэлгэржэ, хүзүү хоолойдонь хүрэтэрөө, шэнгээхэ болотороо тулаха, бүхы газарыень эзэлхэ. Далинуудынь шинии бүхы газар дээгүүр далбаатай байха, Эммануил!»

⁹ Арадууд, мэдэгты! Шэшэрэлдэгты! Алас холын бүхы орон нютагууд, шагнагты! Дайнда бэлдэгты, шэшэрэлдэгты! Дайнда бэлдэгты, шэшэрэлдэгты!

¹⁰ Байлдаа яажа ябуулхаяа түсэблэгты! Гэбэшье тэдэ түсэбүүдтнай бүтэхэгүй. Захиралта үгэнүүдые сэрэгтэ хэлэгты! Гэбэшье эдэ бүгэдэ ямаршье туһагүй, юуб гэхэдэ, Бурхан бидэнтэй хамта!

Эзэн лүндэншые һэргылнэ

¹¹ Бүхы эдэ зондол адляар юумэ хэжэ байхагүй тухайм Эзэн намайе агууехэ шадал хүсөөрөө һэргылбэ. Тэрэ иигэжэ айладхаа:

¹² – Энэ арадай нюуса хэлсээн гэжэ тооложо байгаашые бүгэдыень нюуса хэлсээн гэжэ бү тооло. Тэдэнэй айжа байгаа юумэнһээ бү ай, бү һүрдэ.

¹³ Намайе, Түмэн Сэрэгтэ Эзэниие, нангинаар хүндэлжэ, Намһаа айжа-түбэгшөөжэ байха ёһотойт.

¹⁴ Би зониие арюудханаб, Иудын, Израилиин хан түрэнүүдтэ бүдэрдэг шулуун, торожо унадаг шулуун мэтэ байхаб. Иерусалимай улад зониие бариха урьха занга мэтэб.

¹⁵ Олохон зон бүдэржэ унаха, тэһэ бута унаха. Тэдэ урьха зангада орожо баригдаха.

Үхэһэн зонтой зүбшэжэ болохогүй!

¹⁶ Таанад, минии шабинар, Бурханай намда дамжуулһан айладхал сахиха, хадагалха ёһотойт.

¹⁷ Эзэн Өөрынгөө арад түмэнһөө хоргодоо-хороо, гэбэшье би Тэрээндэ этигэнэб, Тэрээндэл найданаб.

¹⁸ Эзэнэй намда даалгаһан үхибүүдтэй би мүнөө эндэ байнаб. Бидэ Израилиин улад зондо дүлгэ тэмдэг, амиды гэршэлэлгэнүүд болонобди. Бидэ Сион уула дээрэ заларан оршогшо Түмэн Сэрэгтэ Эзэнээр эльгээгдэнхэйбди.

¹⁹ Таанадые зарим зон иигэжэ гуйжа болохо: – Һүнэһэ дуудагшадтай болон шэбшэдэг шэдитэнтэй зүбшыт. Теэд таанад иигэжэ тэдээндэ харюусаарайгты: – Арад түмэн өөрынгөө Бурханһаа туһа эрихэ ёһотой. Эльбэ жэльбэтэйшүүлые хэрэглэн, юундэ амиды зон тухай үхэһэн зонһоо асууха болонобибди?

²⁰ Эзэнэй һургаал болон гэршэлэлгэдэ хандагты. Тэдэниие сахин дүүргээгүй һаа, худал хуурмаг үгэнүүдтэ хүрмэгдэхэт. Теэд тэдэ үгэнүүд хооһон, аша туһагүйл.

Хэсүү үе

²¹ Эльбэ жэльбэтэйшүүлые шагнагша зон зоболондо дарлагданхай, үлэсхэлэн хооһон газар дэлхэйгээр тэнэжэ ябаха. Гэдэһээ үлдэжэ ябахадаа тэдэ сухалдажа, хаанаа болон Бурханаа харааха. Тэдэ өөдөө огторгой руу гү,

²² али доошоо хүрьһэтэ газар руушье шэртэхэдээ, гансал зоболон ба харанхые, шэг харанхые хараха. Тиигээд тэрэ харанхыда өөһэдөө абташаха.