Исай 66 - Библи

Эзэн – үндэһэ яһатадай хэрэг шүүгшэ

¹ Эзэн иигэжэ айладхана: «Огторгой – Минии шэрээ, газар – хүлэймни гэшхүүр. Тиигээд хаана таанад Намда үргөө барижа шадахабта даа. Минии амарха таарамжатай газар хаана байгаа юм?

² Эдэ бүгэдые Би Өөрөө бүтээгээ һэм. Даруу зантай, Намһаа айдаг, үгыем дууладаг зоной талые харахаб.

³ Үргэл үргэжэ, үхэр алана гү, али хүниие алана гү; хурьга үргэл гэжэ үргэнэ гү, али нохойн хүзүү мушхана гү; орооһо таряа үргэнэ гү, али гахайн шуһа үргэнэ гү; уталга ууюулна гү, али шүтөөндэ мүргэнэ гү, – зондо хамаагүй болонхой. Бузар муухай юумэ хэхэдээ тэдэ баясадаг.

⁴ Тиимэһээ Би тэдээндэ гай тодхор татахаб, айдаг юумыень өөһэд дээрэнь асархаб. Юундэб гэхэдэ, Минии дуудахада, хэншье харюусаагүй. Минии айладхахада, хэншье соносоогүй. Тэдэ Минии урда муу юумэ хэжэ, Намда таагүй юумэ шэлээ».

⁵ Эзэнһээ айдаг, үгыень дууладаг зон, Тэрэнэй иимэ үгэ шагнагты: «Намда этигэдэг байһандатнай танай арад зоной заримашуул таанадые үзэн ядажа, харшална. Эзэн Өөрынгөө хүсэ шадал харуулаг лэ, таанадые манай хараһаар байтар абараг лэ, баярлахыетнай харахабди гэжэ тэдэ хэлэнэ. Тэдэ эшхэбтэр байдалда орохо!

⁶ Шагныт! Хотоһоо гаража байгаа ехэ шууяан, нангин үргөөһөө гаража байһан дуу шэмээ болбол дайсадаа хэһээжэ байһан Минии, Эзэнэй, дуу шуун гээшэл».

⁷ «Иерусалим хото зобон-үбдэнгүй үхибүү гэнтэ түрэгшэ эхэнэртэл адли.

⁸ Хэн иимэ юумэ дуулаа, хараа юм? Нэгэ үдэр соо арад түмэн бии боложо байгаа юм аал? Үндэһэ яһатаниие түрэхэдөө, Сион удаан үбдэжэ байгаагүй.

⁹ Түрэхэ тээшэнь дүтэлүүлээд, түрэхыень зүбшөөнгүй байха аргамгүй», – гэжэ Бурхантнай айладана.

¹⁰ Иерусалимда дуратай зон, тэрээнтэй баясан сэнгэгты! Тэрэнэй түлөө һанаагаа зобогшод, булта тэрээнтэй хамта баясан жаргагты!

¹¹ Тэрэнэй һэргэн һалбарһанда таанад эхынгээ хүхэ хүхэжэ байһан үхибүүндэл һанаагаа амаран, баясахат.

¹² Эзэн иигэжэ айладхана: «Би таанадта гол мэтээр амгалан тайбан байдал, үндэһэ яһатанай эд баялигуудые урдахуулхаб. Тэжээлгэжэ, эхынгээ гар дээрэ үргэгдэн, үбдэг дээрэнь энхэрүүлэн байгааша үхибүүндэл адли таанад болохот.

¹³ Эхын үхибүүгээ һамааруулдагтал, Би таанадые Иерусалим соо аргадан, һанааетнай амаруулхаб.

¹⁴ Энээниие харахадаа, сэдьхэлтнай баясаха, бэе тамиртнай зүлгэ ногоондол һалбаран, элүүр энхэ болохот. Минии, Эзэнэй, үгэ дуулагша зондо туһалдагыем, дайсадтаа уур хилэнгээ харуулдагыем ойлгохот».

¹⁵ Үзөөрэйгты, Эзэн гал дүлэн мэтэ бууха. Уурлаһан зоноо хэһээхэеэ Тэрэ шуурган һалхин мэтэ шуумайха.

¹⁶ Эзэн дэлхэйн бүхы амин голтойшуулые гал дүлэнөөр, эритэ һэлмээр шүүбэрилхэ, олохониинь Тэрээндэ усадхагдаха.

¹⁷ Эзэн иигэжэ айладхана: «Гахайн мяха, хулгана болон бусад бузартай юумэ эдидэг, ой модондо ошожо, шүтэн мүргэдэг зон бултадаа хосорхо.

¹⁸ Би тэдэнэй һанаа бодол, хэрэгүүдынь мэдэхэб. Бүхы үндэһэ яһатадые суглуулха гэжэ ерэжэ байнаб. Тэдэ ерэжэ, Минии солые харахал.

¹⁹ Би тэдэнэй дунда дүлгэ тэмдэг харуулхаб! Заримашуулыень абаржа, ондоо арадуудта, алас холын нютагуудта, юрэдөө, Нам тушаа дуулаагүй, Минии һүр жабхалан, хүсэ шадал хараагүй зон руу – Испани, Ливи, мэргэн харбаашадтай Лиди, Тубаал, Греци руу ябуулхаб. Тиихэдэм тэдэ Минии һүр жабхалан тушаа арадуудта соносхохол.

²⁰ Тиигээд тэдэ нэгэ үндэһэ яһатан болохо зоноо тэндэхи арадуудһаа бусаажа, Намда бэлэг мэтээр асарха. Морёор, мори тэргээр, жууза дээрэ, лус, тэмээгээр тэдэниие Иерусалимдахи Минии нангин хада уула руу асарха. Арюун сэбэр амһарта соо талханай үргэл хэжэ, нангин үргөө руу Израилиин хүбүүдэй асардагтал тэдэ нэгэ яһатан болохо зоноо асарха.

²¹ Тэдэнэй заримыень санаартад болон левит зон болгохоб.

²² Минии бүтээхэ шэнэ тэнгэри, шэнэ газар хэтэ мүнхэдөө байха гэдэгтэл, таанадай уг удам, нэрэтнай хэтэ мүнхэдөө үлэхэ.

²³ Һара бүхэндэ, амаралтын үдэр бүхэндэ бүхы арадууд Намда мүргэхэеэ Иерусалим руу ерэдэг байха.

²⁴ Гэртээ харихаяа гаража байхадаа тэдэ Минии урдаһаа эсэргүүсэһэн зоной хүүрнүүдые хараха. Тэдэниие эдигшэ хорхойнууд хэзээдэшье үхэхэгүй, тэдэниие шатаагша гал дүлэн хэзээдэшье унтархагүй. Бүхы зон жэрхэн, эдээниие харан байха».