Исай 65 - Библи

Үгыень дууладаггүй зониие Тэрэ хэһээхэ

¹ Эзэн иигэжэ айладхана: Намайе гуйгаагүй зондо Би Өөрыгөө элирхэйлээб, Намайе бэдэрээгүйшүүлдэ Өөрыгөө олуулааб. Нэрыем дуудаагүй арад зондо «Би эндэ байнаб! Би эндэб!» гэжэ байгааб.

² Муу зам даган, өөрын һанаһаар ажаһуудаг, хүнэй үгэ дууладаггүй арад руу бүхэлиин үдэрөө гараа һунган байгааб.

³ Теэд тэдэ Минии хараһаар байтар Намайе доромжолон, тахилтай ой модон соо үргэл үргэн, хирпиисэнүүд дээрэ уталга ууюулан байна.

⁴ Һүниндөө тэдэ нюуса газарнууд, хүүрнүүд руу ошожо, үхэһэн зонһоо зүбшэл асууна. Гахайн мяха, бузартай шүлэ тэдэ гаргана.

⁵ Удаань тэдэ иигэжэ бусадта хэлэнэ: «Зогсогты, маанадта бү дүтэлэгты. Бидэ таанадта орходоо арюун гээшэбди». Би тэдэниие тэсэхэгүй байнаб, уур хилэмни хэзээдэшье унтархагүй түймэр мэтэ.

⁶ Би тэдэниие яажа хэһээхэеэ бэшэжэ абанхайб. Дуугай байхагүйб, хэһэн хэрэгэйнь түлөө үһөөгөө абахаб.

⁷ Өөһэдэйнь болон үбгэ эсэгэнэрэйнь нүгэлэй түлөө үһөөгөө абахаб. Тэдэ хада ууланууд дээрэ уталга ууюулжа, Нам тушаа муугаар хэлээ һэн. Хэһэн хэмээрнь тэдээндэ хэһээлтэ амасуулхаб.

⁸ Эзэн иигэжэ айладхана: Үзэмэй модоной мүшэр шүүһэтэй байбал, тэрээн тушаа «бү һалгаагты, тэрэ үреэлтэй» гэдэг. Бишье Өөрын арад түмэниие бултыень усадхахагүйб, Намда мүргэдэг зониие абархаб.

⁹ Яковта үри үршөөхэб. Иудын уг удамынь хадалиг Минии орон нютагые үеһөө үедэ эзэлэн байха. Намда мүргэдэг зон тэндэ ажаһууха.

¹⁰ Минии арад түмэн Намда зальбаран, Шароон газар руу хонидоо, Ахоорой нюруу газар руу үхэрөө туужа адуулдаг байхал.

¹¹ Харин Намайе тоонгүй, Нангин уулыем мартан, Гаад болон Мени гэдэг бурхадта зальбарагша таанадта

¹² һэлмээр сабшагдан үхэхэ үхэл бэлдэнхэйб. Таанадые үбдэглүүлээд сабшаха! Минии дуудахада, харюусаагүйт, айладахадамни, дуулаагүйт. Таанад муу хэрэг үйлэдэн, Намда таарамжагүй юумэ шэлэһэн байнат.

¹³ Тиимэһээ Би, Эзэн Бурхан, таанадта иигэжэ соносхоноб: Намда һүгэдэн зальбардаг зон эдихэ хоол, ууха ундаар элбэг-дэлбэг байхадань, таанад гэдэһээ үлдэжэ, ангажа байхат.

¹⁴ Тэдэ баясан хүхилдэн байха, харин таанад сүхэрэн-орилон байхат.

¹⁵ Минии һунгаһан зон танай нэрэ хараал мэтээр хэлэдэг болохо. Би, Эзэн Бурхан, таанадые хюдахаб. Харин Намда һүгэдэн мүргэдэг зондо шэнэ нэрэ үгэхэб.

¹⁶ Дэлхэй дээрэ байгшадай хэн нэгэн юрөөл тушаа гуйбал, бодото Бурханһаа юрөөл гуйха. Шахаа тангариг үргэхэеэ һанаһан хэн нэгэн үнэнхэ Бурханай урда тангариглаха. Урданай зоболонгууд мартагдаха.

Шэнээр бүтээхэнь

¹⁷ Эзэн иигэжэ айладхана: «Харагты, Би шэнэ огторгой, шэнэ газар бүтээнэб. Урданай юумэн һанаандашье орохогүй.

¹⁸ Таанад Минии бүтээжэ байгаа юумэндэ хүхилдэн, хэтэ мүнхэдөө баясан байхат. Минии бүтээжэ байгааша Иерусалим хүхюун зугаагаар билтаржа, арад зониинь баяраар халин байха.

¹⁹ Иерусалимда баярлан, арад түмэндөө баясажа байхаб. Тиигээд тэндэ уйлаха, туһа эрин орилхо абяан саашадаа бэшэ дуулдахагүй.

²⁰ Нарай нялханууд нарайдаа һамшахагүй, зон бултадаа наһалха наһаяа эдлэхэ. Зуу наһалаад үхэһэн хүн залуу гэжэ тоологдохо, харин энэ наһа наһалангүй урид нүгшэһэн хүндэ Минии хараал хүрөө гэжэ хэлсэгдэдэг байха.

²¹ Зон гэрнүүдые барижа, тэндээ ажаһууха. Тэдэ мүн лэ үзэмэй модоной сэсэрлиг һуулгажа, үрэ жэмэсынь эдихэ.

²² Ондоо хүн тэрэ бариһан гэрнүүдтэнь ажаһуухагүй, ондоо зон тариһан мододһоонь эдижэ байхагүй. Мододтол адли, зомни удаан ажаһууха, ажалайнгаа үрэ шэмэ өөһэдөө эдлэхэ.

²³ Тэдэ дэмы хооһон ажаллахагүй, түрэһэн үхи хүүгэдынь зоболонтой ушархагүй. Би тэдэниие мүн уг удамынь саашанхи үе сагуудта юрөөхэб.

²⁴ Тэдэнэй Намда зальбаран, гуйлтаяа дууһан хэлэжэ үрдеэдүй байтар Би харюу үгэдэг байхаб.

²⁵ Шоно хурьгадтай хамта бэлшэхэ, арсалан үхэр мэтэ һолоомо эдихэ, шорой могойн хоол болохо. Минии нангин уула дээрэ ямаршье муу, хорото хэрэг ябуулагдахагүй».