Исай 60 - Библи

Иерусалимай ерээдүй алдар соло

¹ Иерусалим, һэргэжэ гэрэлтыш, Эзэнэй алдар соло шам дээрэ толотоно.

² Хараарайгты, харанхыгаар газарай хушагдаад, бусад арадуудай гүн харанхыда байхада, таанад дээрэ Эзэнэй гэрэл туяа мандан, алдар солонь толорхо.

³ Үндэһэ яһатад шинии гэрэл руу, хаашуул шинии мандажа байгаа туяа руу ерэхэ.

⁴ Оршон тойроод харыш: улад зоншни гэртээ ерэхэеэ забдажа байна. Хүбүүдшни алас холоһоо ерэхэ, басагадыеш үхи хүүгэд мэтээр гар дээрээ үргэн ерэхэ.

⁵ Эдэ бүгэдые хараад, баярлахаш, зүрхэншни хүдэлэн баясаха. Үндэһэ яһатадай баялиг таанадай болохо, далайгаар дамжан тэрэ ерэхэ.

⁶ Тэмээн хамбы Мидиан болон Эпааһаа ерэхэ. Алта, үнэтэ гүгэл тэдэ Шэбааһаа асарха. Тиигээд ерэһэн зон Эзэнэй хэһэн хэрэгүүд тушаа һайн мэдээ дуулгаха.

⁷ Кэдаарай болон Нэбайһоодой бүхы хонин һүрэг үргэл болон, Эзэнэй шэрээ дээрэ шатаагдаха. Эзэн Өөрын алдарай нангин үргөөе алдаршуулха!

⁸ Үүлэд мэтэ, уурхай руугаа бусажа байһан гулабхаанууд мэтэ ниидэжэ байгша тэдэ юун бэ?

⁹ Олтирогууд Эзэндэ найдана, Таршиишэй онгосонууд түрүүлэн наашаа ерэжэ байна! Тэдэ болбол холын оронуудһаа танай арад зониие, алта, мүнгыень асаржа байна. Эзэн Бурханайтнай, Израилиин арюун Бурханай захиралта иигэжэ гүйсэдхэнэ, Тэрэ таанадые алдаршуулаа!

¹⁰ Эзэн Иерусалимда иигэжэ хандана: Хариин зон хана хэрэмыеш бодхоохо, хаашуулынь шамда алба хэхэ. Уур дундаа Би шамайе хэһээгээ һэм, харин мүнөө шамда үршөөл хайраяа элирхэйлхэб.

¹¹ Үдэр, һүнигүй бартаануудтнай нээлтэтэй байха, иигэжэ үндэһэ яһатадай хаашуул эд баялигаа шам руу асаржа байхал.

¹² Харин шамда алба хэхэеэ һанаагүй үндэһэ яһатад бүримүһэн усадхагдаха. Иимэ арадууд үгы хэдэхэ.

¹³ Минии нангин үргөөе, Иерусалим, шамайе үзэсхэлэн һайхан, һүр жабхалантай болгохын тула нарһан, арса, жодоо модод – Ливаанай ойн эгээл үнэтэй модод шам руу асарагдаха.

¹⁴ Шамайе дарлагшадай үри һадаһад ерэжэ, бултадаа доро дохин зогсохо. Шамайе хэзээ нэгэтэ үзэн ядагшад хүлэйшни ула хүрэтэр бохиин һүгэдэхэ. Тэдэ шамайе «Эзэнэй хото, Израилиин арюун Бурханай Сион хото гэжэ нэрлэхэ.

¹⁵ Хаясаанай, үзэн ядадагай, хооһон хото байһаншье һааш, Би шамайе хэтэ мүнхын бахархал, үеһөө үедэ баярай газар болгохоб.

¹⁶ Эхын нарай нялхаяа хүхөөрөө тэдхэдэгтэл, үндэһэ яһатад шамайе тэдхэн байха, хаашуулынь тэдхэгшэдшни болохо. Иигэжэ Минии, Эзэнэй, таанадай Абарагша, Яковай Хүсэтэ Бурхан байһые мэдэхэш.

¹⁷ Би шамда гуулин түмэрэй орондо алта, түмэрэй орондо мүнгэ, модоной орондо гуулин, шулуунай орондо түмэр асархаб. Удамаршадшни бэшэ шамайе дарлахагүй, хэрэгүүдые тэдэ зүб шударга, амар амгаланаар шиидхэдэг болохо.

¹⁸ Орон нютагташни хүсэрхэл, һандарал бэшэ үзэгдэхэгүй, хана хэрэмүүдтэш адли Би шамайе аршалхаб, тиихэдэм ши Намайе магтан байхаш.

¹⁹ Энээнһээ хойшо үдэртөө наранай гэрэл, һүниндөө һарын туяа шамда хэрэгтэй бэшэ болохо, Би, Эзэн, шинии хэтэ мүнхын гэрэл туяа болохоб, Минии алдар солын гэрэл таанадые гэрэлтүүлхэ.

²⁰ Голхорхо сагшни түгэсэхэ. Би, Эзэн, шамда хэтэ мүнхын гэрэл болохоб, нара, һарада орходоо далда оронгүй, хододоо байхаб.

²¹ Удаань бүхы арад зоншни гансал зүб шударга хэрэг үйлэдэн байха, газарые хэтэ мүнхэдөө эзэмдэхэ. Намайе алдаршуулхын тула Би тэдэниие таряа, бүтээгээ бэлэйб.

²² Эгээл үсөөн бүлэһөөшье хамагай олон, хүсэтэй үндэһэ яһатан үдэн гаража болохо. Таатай сагай тохёолдоходо, Би, Эзэн, энэ хэрэг түргөөр бүтээхые оролдохоб!»