Исай 6 - Библи

Лүндэншэ болохыень Эзэн Исайе дуудана

¹ Уззияа хаанай наһа бараһан жэл би Эзэн Бурханиие хараа һэм. Тэрэ үндэр дээгүүр заларһан хан шэрээ дээрэ һуужа байгаа. Нэмэргынь хормойнууд нангин үргөөе бүхыдэнь дүүргээд байгаа бэлэй.

² Тэрэниие тойроод сераафууд элин байгаа. Амитан бүхэн зургаан далитай: хоёр даляараа нюураа бүглэжэ, хоёр даляараа хүлөө хушажа, хоёроороо ниидэжэ байгаа.

³ Нэгэнь нүгөөдэдөө хашхаран: – Түмэн Сэрэгтэ Эзэн нангин, нангин, нангин! Тэрэнэй алдараар бүхы газар дэлхэй дүүрэнхэй! – гэжэ хэлэжэ байба.

⁴ Тэдэнэй абяа дуунһаа үүдэнэй һуури шэшэржэ, үргөө дүүрэн утаан гараба.

⁵ Тиихэдэнь би иигэжэ хэлэбэб: – Ай даа! Һалахамнил! Хэлэһэн үгэ бүхэмни нүгэл шэбэлтэй, нүгэл шэбэл дуугардаг зоной дунда ажаһуунаб. Тиимэ аад, Түмэн Сэрэгтэ Эзэн Хааниие хараалби.

⁶ Тиихэдэм сераафуудай нэгэн үргэлэй шэрээһээ шатажа байгаа сог нүүрһэ хабшуураар абажа, намда ниидэжэ ерэбэ.

⁷ Тэрэ сог нүүрһээр уралдамни хүрэжэ, иигэжэ үгүүлбэ: – Энэ шинии уралда хүрэхэдэм, гэм зэмэшни үгы болоо, нүгэлшни арюудхагдаа.

⁸ – Би хэниие ябуулхабиб? Хэн Манай даабари дүүргэхэб? – гэһэн Эзэнэй дуу соносоод, би хэлэбэб: – Би ошохоб, намайе ябуулагты!

⁹ Тиихэдэм Тэрэ айладаба: – «Хэды дуулаһаншье һаа, таанад юумэ ойлгохогүйт. Хэды хараһаншье һаа, юумэ обёорхогүйт» гэжэ тэрэ арадта ошожо хэлэ.

¹⁰ Энэ арад түмэниие ухаагүй ойгог болгожо, шэхынь дүлии, нюдынь һохор болго. Тэдэ бү хараг, бү дуулаг, бү ойлгог. Үгы һаа, тэдэ Нам руу эрьежэ, эдэгэхэл.

¹¹ Би асуубаб: – Эзэмни, хэр удаан энэ үргэлжэлхэб? Тэрэ иигэжэ харюусаба: – Хотонуудай һандаран сүйдтэ орожо, хүн зонгүй болотор, оршон тойроной эзэгүйржэ, газар нютагай юушьегүй болотор.

¹² Би зониие үлдэхэб, энэ орон нютаг ехэ хооһорхо.

¹³ Зоной арбанай нэгэ хубишье эндэ үлөө һаань, энэ газар дайда дахин хооһоруулагдаха. Сарса болон зандан мододые тайрахада, үндэһэн түгсүүл үлэдэг. Тэрээн мэтэ нангин үрэ энэ орон нютагай үндэһэн мүн.