Исай 59 - Библи

Зоной нүгэл шэбэл тушаа

¹ Эзэн таанадые абаржа шадахагүй, дан хүсэгүй гү, али таанадай туһаламжа эрин дуудаһые дуулахагүй дүлии гэжэ бү һанагты.

² Нүгэлһөөтнай боложо Тэрэ таанадые дууланагүй, таанадай гэм зэмэ Бурхантай таанадые хахасуулаа.

³ Таанад хүниие алажа, буруу шүүжэ, худалаар хэлэжэ, нүгэл хээт.

⁴ Хэншье зүб шударга юумэнэй түлөө тэмсэнэгүй, хооһон, худал юумэ хэлэнэ. Муу муухай хэрэгүүдые түсэблэжэ, тэрэнээ бэелүүлнэт!

⁵ Таанадай муу муухай түсэбүүд хорото могойн үндэгэд мэтэ хоротой. Тэрэ үндэгэ тэһэлээ һаа, досооһоонь могой гарана!

⁶ Теэд таанадай энэ муухай түсэбүүд абаахайн шүлһөөр нэхэгдэһэн хубсаһандал ямаршье туһагүй, удхагүй!

⁷ Гүйдэлөөрөө муу муухай хэрэгүүдые хэнэт, ямаршье зэмэгүй зониие аланат. Һанаан бодолтнай хилэнсэгтэ, харгы замтнай – сүйд, эбдэрэл.

⁸ Энхэ тайбан байдал таанад найруулжа шадахагүйт, зүб шударга хэрэгшье үгы. Харгы замтнай һарюу, хойноһоотнай ябагшад оройдоошье амар амгалан байгаагүй.

Зон нүгэлтэйгөө мэдэрнэ

⁹ Зон иигэжэ хэлэнэ: «Тиимэһээл үнэн шударга бидэнһээ холо байна, үнэн зүб бидэндэ хүрөөгүй. Бидэ гэрэл хүлеэгөөбди, теэд гансал харанхы хаа-хаанагүй байна. Толон хүлеэгөөбди, теэд бүрэн соо түгэншэлнэбди.

¹⁰ Бидэ һохор зон мэтэ хана тэмтэрэн, нюдэгүй мэтэ гараараа барин ябанабди, үдын тэн багаар бүрэнхы байдалда байһандал бүдэрнэбди, элүүр энхэ зоной дунда үхэһэн хүнүүдтэ адлибди.

¹¹ Бидэ бултадаа баабгай шэнги бүрхирнэбди, тагтаа шэнги ёолонобди. Үнэн шударгые хүлеэгөөбди, харин тэрэ үгы, абарал хүлеэгөөбди, теэд тэрэ холо.

¹² Эзэн Бурхамнай, Танай урдаһаа маанадай хэһэн гэм зэмэ олон, манай нүгэлнүүд өөһэдыемнай муу болгон гэршэлнэ. Бидэ тэдэниие һайн мэдэнэбди.

¹³ Бидэ Танай урдаһаа һөөргэдөөбди, Таниие орхёобди, Танһаа буруу хараабди. Һанаан бодолнай буруу, үгэнүүднай худал.

¹⁴ Зүб шударга ёһо хойшоо хаягдан, үнэн зүб холодобо. Үнэн гудамжа дээрэ бүдэржэ, үнэн сэхэ ябадал нэбтэрэн эндэ орожо шадахагүй байна.

¹⁵ Үнэн зүб үгы болоо. Муу муухайһаа холодогшод өөһэдөө хүнэһэн болоно. Зарга шүүбэриин үгы болоһые Эзэн хараад, нюдэдынь балартаа». Эзэн энээниие хараад, зүб шударга ёһын үгы болоһондо сухалаа хүрөөд байна.

Өөрын арад зониие абарха

¹⁶ Дарлалта доро байһан хүндэ туһалха хэнэйшье үгы байһые Эзэн гайхан хараба. Тиимэһээ Тэрэ Өөрынгөө хүсэ шадал хэрэглэн, дарлалтада байгшадые абарна.

¹⁷ Тэрэ үнэн зүбые хуяг мэтэ үмдэжэ, абаралые дуулга мэтээр толгой дээрээ табиба. Тэрэ зонһоо үһөөгөө абаха шанга хүсэлдэ нэрбэгдэбэ.

¹⁸ Тэрэ дайсадаа хэһэн хэмээрнь хэһээхэ, аяар холын орон нютагуудаар ажаһуугшадыешье мартангүй хэһээхэл.

¹⁹ Зүүн зүгһөө баруун зүг хүрэтэр бүхы зон Тэрээнһээ, асари ехэ һүр һүлдэһөөнь айха. Голой урасхал, шанга һалхин мэтэ Тэрэ буухал.

²⁰ Эзэн иигэжэ айладхана: «Сионой зондо болон муу муухайһаа зайлагша Яковай үринэртэ Абарагша заларха.

²¹ Би тэдэнтэй энэ хэлсээ баталхаб. Шам дээрэ оршогшо Минии Һүлдэ, амандашни Минии хэгшэ үгэмни хододоо шинии, үри һадаһадайш, тэдэнэйшье уг удамай аманда мүнөөнһөө эхилэн хэтэ мүнхэдөө оршог!»