Исай 57 - Библи

Шүтөөнүүдтэ мүргэхэ гээшэ жэгшүүритэй

¹ Зүб шударга хүнэй наһа барахада, хэншье энэ ушар ехэ тоожо байдаггүй. Үршөөл хайратай зон наһа барана, юундэ энэ болоноб гэжэ хэншье мэдэнэгүй. Зүб шударга хүн муу юумэнһээ зайлана.

² Һайнаар наһаа үнгэргэһэн зон нүгшэхэдөө амар амгалан боложо амардаг.

³ Харин таанад, нүгэл хэгшэ зон, наашаа дүтэлэгтылши! Таанад эльбэ жэльбэшэнһээ, һальхай ябадалтайшуулһаа, янхан эхэнэрнүүдһээ дээрэ бэшэт!

⁴ Хэниие таанад шоо үзэнэбта? Хэнэй урдаһаа амаа ехээр ангайн дуугарнабта? Таанад гэмтэнэй, худалшанай үри һадаһад гээшэт.

⁵ Һаглагар модод доро хурисал хэжэ байһандал, шүтөөнүүдтэ мүргэл хэжэ, хадын жалгаар, горхоной хажуугаар үхи хүүгэдээ аладаг бэшэ гүт?

⁶ Мэлигэр шулуунуудые тэндэһээ абажа, бурхадта мэтээр тэдээндээ мүргэдэгта. Үзэмэй дараһан архи үргэжэ, талханай үргэл тэдээндэ дурадханат. Энээниие үзэжэ байхадаа Би һанаа амар байха аалби?

⁷ Үндэр, мантан хада уула дээрэ ороо зохёожо, өөдөө гаража, үргэл үргэнэт.

⁸ Үүдэнэйнгээ саада тээ шүтөөнүүдээ табинат. Тиигээд Намайе орхижо, бэеэ нюсэгэлөөд, хурисал үзэхэеэ тэдэ шүтөөнүүдтэеэ хэбтэнэт.

⁹ Аятай үнэртэй тоһо түрхеэд, шүтөөндэ зальбархаяа ошонот. Ямар бурханда мүргэхэеэ бэдэржэ, элшэнэрые аяар үхэлэй орон хүрэтэр эльгээнэт.

¹⁰ Удаан сагта бурхадые бэдэржэ, аян замдаа ядарбашье, бусадаггүй бэлэйт. Хүсэ тэнхээгээ һэргээн, һуларангүй ябаат.

¹¹ Эзэн иигэжэ айладхана: «Намайе сэдьхэлдээ хадагалжа байнгүй, худал хэлэжэ байхадаа таанад ямар бурхадһаа айдаг болообта? Удаан сагта абяа шэмээгүй байһандам Намһаа айхаяа болёо гүт?

¹² Таанад зүб юумэ хэнэбди гэжэ һананат, харин Би бурууетнай харуулхаб, тиихэдэм шүтөөнүүдтнай танда туһа хүргэхэгүй.

¹³ Орилжо байхадатнай шүтөөнүүд таанадта туһалаг лэ! Һалхин тэдэниие бултыень хиидхүүлхэ. Харин Намда этигэгшэд газар дэлхэйе эзэмдэхэ, Минии нангин уулые эзэлэн байха юм».

¹⁴ Эзэн иигэжэ айладхана: «Минии арад түмэнэй Нам руугаа бусахадань туһалагты. Харгы зам жэгдэлэгты. Харгы дээрэ байгша һаалта зүйлнүүдые үгы хэгты.

¹⁵ Би болбол хэтэ мүнхэдөө оршогшо үндэр болон арюун Бурхан гээшэб. Үндэр, нангин газарта оршодогшье һаа, Би даруу зантай, гэм зэмээ мэдэрдэг зонтой хамта байнаб. Иигэжэ Би тэдэнэй зориг, этигэл һэргээнэб.

¹⁶ Би зониие хэтэ гэмнэжэ байхагүйб, уур хилэмни таһалгаряагүй бэшэ. Ондоо байгаа бол Минии урда тэдэнэй һүлдэ, Минии байгуулагша халуун амид хүсэгүй болохо бэлэйл.

¹⁷ Тэдэнэй хомхой хобдог байһанда, нүгэл хэхэдэнь Би уурлажа, тэдээнһээ арсаа бэлэйб. Теэд тэдэ юушье ойлгоогүй, үсэд нэтэрүүгээр тэрэ нүгэлтэй замаа үргэлжэлүүлээ.

¹⁸ Тэдэнэй үйлэ хэрэгүүдые Би харанаб, гэбэшье Би тэдэниие эдэгээхэб. Тэдэниие хүтэлжэ, туһалхаб, гашуудан уйлалдагшадай һанаа тэгшэрүүлхэб.

¹⁹ Холо, ойрын зондо бултандань энхэ тайбан байдал үршөөнэб. Өөрын арад зониие аргалхаб.

²⁰ Харин муу зон бурьялжа байһан далайдал адли – тэрэ амар заяа мэдэхэгүй, долгидынь шааян, элдэб хог, шабар шэдэлэн гаргажал байха юм.

²¹ Нүгэл хилэнсэгтэй зондо ямаршье амар амгалан байхагүй». Иигэжэ Бурхамнай айладхажа байна.