Исай 56 - Библи

Бүхы үндэһэ яһатан Эзэнэй арад болохо аргатай

¹ Эзэн иигэжэ айладхана: «Шударга ёһо сахин, үнэн зүбые үйлэдэгты. Һаяар таанадые абархаб.

² Амаралтын үдэрые хазагайруулангүй сахигша, муу үйлэ хэхэһээ тэбшэгшэдые юрөөн байхаб».

³ Эзэнэй арад түмэнтэй ниилэһэн хариин хүн «Эзэн намайе Өөрынгөө зонһоо илгана» гэжэ бү хэлэг. Тайган хүн «Хатаһан модонби» гэжэ бү хэлэг.

⁴ Эзэн иимэ тайган хүндэ иигэжэ айладхана: «Амаралтын үдэр сахижа, Намда таарамжатай юумэ шэлэн, хэлсээгээ сахин, Намайе хүндэлжэ байгаа һаатнай,

⁵ таанадай нэрэнүүдые Минии нангин үргөө соо удаан сагта дурдан байха, үхи хүүгэдтэй байжа, нэрэеэ нэрлүүлһэнһээ үлүүгээр таанадые хэтэ мүнхэдөө зон дурдахал».

⁶ Эзэнэй арад түмэнтэй хамтаржа, Эзэндэ алба хэжэ, дурлажа, амаралтын үдэр нангинаар сахин, хэлсээгээ дүүргэгшэ хариин зон тушаа Эзэн иигэжэ айладхана:

⁷ «Би таанадые Өөрын нангин уула руу асархаб, Намда зальбардаг үргөө соо тэдээндэ баяр үршөөхэб, үргэлэй шэрээ дээрэ дурадхаһан түгэс шатаалта үргэл болон бусад үргэлнүүдыетнай дуратайгаар абахаб. Минии гэр бүхы үндэһэ яһатадай зальбарха мүргэл зальбаралай гэр гэжэ нэрлэгдэхэ».

⁸ Таран бутарһан Израилиин арад зониие суглуулагша Эзэн Бурхан үшөө олон зониие асархаб гэжэ найдуулна.

Израилиин удамаршад һохор

⁹ Хариин зоной ерэжэ, Өөрынь арад түмэниие хээрын ан арьяатандал адли зооглохыень Эзэн захирна.

¹⁰ Тэрэ иигэжэ айладхана: Арад зониием һэргылхэ үүргэтэй ударидагшадынь һохор! Юушье мэдэнэгүй! Тэдэ бултадаа хусажа шададаггүй, гансал унтадаг, һанаандаа гоёор зураглан хэбтэдэг нохойнуудта адли!

¹¹ Тэдэ болбол садахаа мэдэхэгүй, өөрын олзо оршодо шунахайрһан нохойнууд гээшэ.

¹² «Ерэгты. Үзэмэй дараһан архи абажа, һогтотороо ууя. Мүнөөдэрэйхидэ орходоо үглөөдэр үшөө ехэ үзэмэй дараһан архи олдохол!» гэжэ эдэ архинша удамаршадынь хэлэнэ.