Исай 55 - Библи

Энэрхы сэдьхэлтэй Эзэн Бурхан

¹ Эзэн иигэжэ айладхана: «Ангаһан зон, уһан руу ерэгты! Мүнгэгүйшье хүн ерэжэ, эдигты! Ерыт! Үзэмэй дараһан архи, һү мүнгэгүйгөөр абагты!

² Юуншье бэшэ юумэндэ мүнгэеэ юундэ үрихэбта? Садхаахагүй юумэндэ салингаа юундэ гаргахабта? Намайе һайса шагнагты, үгыем дуулагты. Тиигэбэл, эгээл эрхим эдеэ хоол барихат.

³ Һайса шагнагты, Нам руу ерэгты! Дуулагты, иигэжэ таанад амиды мэндэ байхат! Хэтэ мүнхын хэлсээ таанадтай баталхаб, Давидта найдуулһан үршөөл хайраяа үзүүлхэб.

⁴ Би тэрэниие арадуудта гэршэ, арадуудай удамарша ба захирагшаар табяаб.

⁵ Хариин зониие, хэзээдэшье мэдээ-таняагүй арадуудые таанадай дуудахада, тэдэ тан руу шамдан ерэхэ. Минии, таанадай Эзэн Бурханай, таанадые алдаршуулһан Израилиин арюун Бурханай түлөө эдэ бүгэдэ хэгдэхэ».

⁶ Эзэндээ эрьен мүргэгты, мүнөө Тэрэ таанадай ойрохоно.

⁷ Муу хүн тэрэ замаа орхиг, нүгэлтэй хүн һанаа бодолоо хубилгаг, Эзэн руу эрьег лэ! Тэрэ хүлисэхэ. Манай Бурхан хүлисэхэ уужам сэдьхэлтэйл.

⁸ Эзэн иигэжэ айладана: Минии һанаа бодол таанадайхидал адли бэшэ, Минии харгы зам таанадһаа ондоо.

⁹ Огторгойн газарһаа үндэртэл, Минии зам, бодолнууд танайхиһаа үндэр.

¹⁰ Бороо, саһан тэнгэриһээ буугаад һөөргөө бусадаггүйдэл, ургамалай ургаха, тариха болон эдихэ орооһо үршөөхыень газар ундалуулдагтал,

¹¹ Минии айладаһан үгэ Намдаа һөөргөө бусадаггүй, һанаһан юумыемни бүтээдэг, Минии эльгээһэн зорилгонуудые дүүргэдэг.

¹² Таанад баяртайгаар гаран ошохот, амар амгалан үдэшүүлхэт. Уула гүбээнүүд баярлан дуулалдаха, талын бүхы модод альгаа ташаха.

¹³ Үргөөһэнэй орондо нарһан, халаахайн орондо мирт ургаха. Энэ болбол Минии, Эзэнэй, алдар солын хэрэг болохо, Минии үйлэ хэрэгүүд тушаа хэтэ мүнхын гэршэ тэмдэг болохо.