Исай 54 - Библи

Эзэн Бурханай энхэргэн дуран

¹ Иерусалим, ши үхибүү түрөөгүй, үри хүүгэдгүй эхэнэр, хүхин баясыш! Үхибүү түрэхын зоболон мэдэрээгүй эхэнэр, хүхииш, баярлыш! Юуб гэхэдэ, хадамда гараагүй эхэнэр хадамтай эхэнэртэ орходоо тоогүй олон үхибүүтэй байха. Иигэжэ Эзэн айладхаа.

² Майхангаа үргэдхэгты! Һарабша татагты! Аргамжануудаа утадхажа, гадаһыень бүхэлэгты!

³ Таанад хилэнүүдээ алишье талаһаань үргэдхэхэт. Ондоо үндэһэ яһатанай газар дайдые уг удамтнай эзэлхэ, хаягдаһан хотонуудта һуурижаха.

⁴ Бү айгты, эшхэбтэр байдалда дахин орохогүйт. Бү эшэ, нэрээ бэшэ гутаахагүйш. Залуу наһандаа нүгэл хэһэнээ мартахаш, бэлбэһэн эхэнэр боложо, доромжолгодо ороһоноо бэшэ дурсахагүйш.

⁵ Шамайе Бүтээгшэ бол үбгэншни мүн, нэрэнь – Түмэн Сэрэгтэ Эзэн. Израилиин арюун Бурхан шинии Абарагша мүн, бүхы дэлхэйн Бурхан гэжэ нэрлэгдэдэг.

⁶ Израиль, ши үбгэндөө орхигдоһон, уйдажа байһан залуу һамгандал адлиш. Гэбэшье Эзэн шамайе дахин һөөргэнь дуудажа, иигэжэ айладхана:

⁷ «Би шамайе агшам зуура орхибошье, агууехэ хайра үзүүлэн, һөөргэнь абахаб.

⁸ Уурлаһан сагтаа агшам зуур Би шамайе орхёо һэм, гэбэшье хэтэ мүнхын энэрэл хайраяа шамда үзүүлхэб». Шамайе Абарагша Эзэн иигэжэ айладана.

⁹ «Нойн үе сагай уһан галаб мэтэ энэ. Хэзээдэшье бэшэ тэрэ ехэ уһан газар дэлхэйе бүрхөөхэгүй гэжэ Би тангариглаа бэлэйб, тэрээндэл адли, шамда уурлахагүй, шамайе зэмэлхэгүйб гэжэ Би тангаригланаб.

¹⁰ Хада ууланууд хүдэлжэ, гүбээнүүд доһолжо болохо. Харин Минии энэрэл хайра шамһаа һалахагүй, энхэ тайбан тушаа хэлсээгээ хододоо сахин байхаб», – иигэжэ шамайе энэрэгшэ Эзэн айладажа байна.

Ерээдүй сагай Иерусалим

¹¹ Эзэн иигэжэ айладана: «Иерусалим, ши зобоһон нэгэнши даа! Һалхи шуурганда сохигдоһон хотош! Хараарай, Би шамайе оюун шулуугаар барижа, һуурииешни биндарьяагаар табихаб.

¹² Сонхонуудыеш улаан болороор, бартаануудыеш субад эрдэни шулуугаар, ханыешни үнэтэ шулуугаар бүхэлхэб.

¹³ Улад зониишни һургажа, урагшатай бэрхэнүүд болгохоб.

¹⁴ Зүб шударга, эрхэ сүлөө мандажа, шамайе хүсэтэй болгохо. Дарлалта харшалалгаһаа айхагүйш, Аюултай һүртэй юумэн шамда ойртохогүй.

¹⁵ Хэрбээ хэн нэгэн шам руу добтолбол, Минии зүбшөөлгүйгөөр эдэ бүгэдые эрхилнэ юм. Урдаһаашни хэншье добтолон ороо һаа, өөрөө унахал!

¹⁶ Гал хөөргөөр аһаагша, зэр зэбсэг хэгшэ түмэршэ дарханиие Би бүтээжэ байнаб. Хюдахын тула Би усадхагшые бүтээнэб.

¹⁷ Харин ямаршье зэр зэбсэг шамайе шархатаахагүй, шамайе зэмэлжэ хэлэһэн хүн бүхэндэ харюутайл байхаш. Би Өөрын зарасанарые аршалхаб, илалта туйлуулхаб!» Иигэжэ Эзэн айладана юм.