Исай 53 - Библи

¹ Зон иигэжэ хэлсэнэ: «Бидэнэй хэлэһэн үгэнүүдтэ хэн этигээ юм? Эзэн Бурханай эршэ хүсэн хэндэ нээгдэн эли болоо юм?

² Эзэнэй урда Тэрэ хуурай газарһаа урган гараһан ургамалдал байгаа. Тэрээндэ һайхан шэг шарайшье, һүр жабхаланшье байгаагүй. Хараһаншье һаа, анхаралаа ехэ Тэрээндэ бидэ хандуулаагүйбди.

³ Тэрэниие шоо үзэжэ, Тэрээнһээ зайлажа байгаабди. Уй гашуудал болон үбшэ хабшанай зоболон Тэрэ мэдээ. Бидэ Тэрээнһээ буруу хаража, шоо үзэжэ, хэншье бэшэ гэжэ тоодоггүй һэмди.

⁴ Харин Тэрэ манай ядарал зоболонгые Өөр дээрээ үргэлжэ, үбшэ хабшыемнай абажа ябаа! Бурханай эльгээһэн хэһээлтэ амасана гэжэ бидэ Тэрээн тушаа һанадаг байгаалди.

⁵ Харин Тэрэ манай нүгэлэй түлөө шархатаһан, манай гэм зэмэй түлөө зобоһон, манай амар амгалан ажаһуухын тула Тэрээн дээрэ хэһээлтэ бууһан байгаа! Хэһээлтэ амасаһаарнь бидэ эдэгээбди.

⁶ Бидэ булта хонид мэтэ төөрижэ, хүн бүхэн өөр өөрын замаар ябаа. Харин Эзэн маанадай гэм зэмые бултыень Тэрээн дээрэ тохоо!

⁷ Тэрэ тамалагдаа, зобоошье һаа, юушье дуугараагүй. Үүслэгдэхээ туугдажа байһан хурьгандал адли, нооһо хиргагшын урда байһан хониндол адли Тэрэ абяа гараагүй.

⁸ Тэрэниие барижа, буруу шүүһэн юм… Үри ашанар тухайнь хэн хөөрэжэ шадахаб? Газар түбидэ Тэрэнэй ами наһан таһалагдаа, арадаймни нүгэлэй түлөө Тэрэ хэһээгдэжэ саазалагдаа.

⁹ Хэзээдэшье хүсэрхэлгэ хээгүйшье һаань, хүүрынь хуулигүй зоной булашада оршоо. Тэрэнэй худал юумэ хэлэжэ байхыень нэгэшье хүн дуулаагүй, тиимэһээ баян зонтой хамта тэрэ хүдөөлүүлэгдөө».

¹⁰ Тэрэниие усадхаха гэжэ Эзэн хүсөө, зоболон тохоо. Нүгэлэй түлөө ами наһаяа үргэхэдөө, Тэрэ уг удамаа харахал, Өөрын үдэрнүүдые утадхахал, Тэрэнэй аргаар Эзэнэй хүсэл бэелүүлэгдэхэ.

¹¹ Зобоһонойнгоо удаа Тэрэ баясаха, дэмы зобоогүйб гэжэ Тэрэ мэдэхэ. Минии Зүб Шударга Зараса Тэрэ олоной хэһээлтэ Өөр дээрээ даажа абаха.

¹² Тиимэһээ Би Тэрээндэ агууехэ зоной дунда һууха һуури үршөөхэб, хүсэтэйшүүлтэй хамта Тэрэ олзо хубаалдаха. Тэрэ Өөрынгөө ами наһа хайрлаагүй, Тэрэниие гэмтэн гэжэ тоолоо, олоной нүгэл Өөр дээрээ тээжэ, нүгэлтэй зоной түлөө зууршалан гуйгаа.