Исай 52 - Библи

Иерусалимай дахин һэргэн бодохо тухай

¹ Сион, һэрииш, һэрииш, дахин хүсэ шадалаа нэмэрыш! Нангин хото Иерусалим, алдар солынгоо хубсаһа үмдыш! Буруу номнолтон ба бэеэ арюудхаагүй зон шинии бартаануудаар бэшэ орохогүй.

² Шоройгоо өөрһөө гүбижэ, һэргэн бодыш, баряанда байгаа Иерусалим! Баряанда байгаа Сионой улад зон, хүзүүнһээ гэнжэ таһалан хаягты!

³ Эзэн иигэжэ айладажа байна: Богоол байдалда ороходотнай ямаршье мүнгэн таанадай түлөө түлэгдөөгүй бэлэй. Таанадые сүлөөлхэдэ тон тиимээр ямаршье мүнгэн түлэгдэхэгүй.

⁴ Эзэн Бурхан иигэжэ айладана: «Арад түмэмни түрүүн Египет руу ошоод, тэндэ ажаһуугаа, тиигээд Ассиридэ ямаршье шалтаггүйгөөр дарлуулагдажа байгаа.

⁵ Мүнөө Би юу хэхэбиб? Арадни миинтээр баригдажа, ударидагшадынь сурхирса уйлана, Минии нэрэ саг үргэлжэ, үдэр бүри хараалда хүртэжэ байна.

⁶ Тиимэһээ арад түмэмни нэрыем мэдэдэг болохо, тэдээнтэй Минии хөөрэлдэһые, энэ Минии байһые тэдэ ойлгохо!»

⁷ Энхэ тайбаниие соносхожо, һайн мэдээ асаран, абарал зарлажа, «Танай Бурхан хаан түрэеэ бахим баряа!» гэжэ Сиондо хэлэжэ, һайн мэдээсэл дэлгэрүүлэгшын алхамууд хэды дэмбэрэлтэйб!

⁸ Хотын харуулай дуу хоолой дуулдана! Тэдэ хамта баяртайгаар хашхарба. Тэдэ Эзэнэй Сион руу дахин бусажа ерэһые өөһэдынгөө нюдөөр хаража байна бшуу.

⁹ Иерусалимай һандарһан шулуунууд, хамта дуулажа, баясан хашхаралдагты! Эзэн Өөрынгөө хото абаржа, улад зонойнгоо сэдьхэл амаруулаа.

¹⁰ Бүхы үндэһэ яһатанай хараһаар байтар Эзэн нангин хүсэ шадалаа үзүүлээ: Өөрынгөө арад түмэндэ абарал буулгахыень үлгэн дэлхэйн бүхы булангай зон хараа.

¹¹ Ябагты, ябагты! Вавилоонһоо гарагты! Эзэнэй нангин үргөөгэй хэрэгсэлнүүдые үргэн ябаашад, бузар юумэндэ бү хүрэгты! Өөһэдыгөө арюунаар абан ябагты!

¹² Энэ удаа таанад яаран гарахагүйт, тэрьедэжэ байхагүйт. Эзэн урдууртнай ябажа, таанадые хүтэлхэ, Израилиин Бурхан ара талаһаатнай таанадые аршалан ябахал.

Зоболон амасаһан зарасань

¹³ Эзэн иигэжэ айладхана: «Минии зараса урагшатай байха, ехэ хүндэтэй, нэрэ түрэтэй хүн тэрэ болохо.

¹⁴ Тэрэниие харахадаа, олон зон сошоо бэлэй: түһөө шарайнь угаа муухай, хүнэй нюурта адли бэшэ һэн, харахада, хүн бэшэ шэнги һэн.

¹⁵ Харин мүнөө олон үндэһэ яһатад Тэрэниие харахадаа гайхаха, хаашуул абяа шэмээгүй гэлын-гайхан байха. Тэдэ хараагүй юумэеэ мүнөө хараха, мэдээгүй юумэеэ мэдэжэ абаха».