Исай 51 - Библи

Иерусалимай зондо хандалга

¹ Эзэн иигэжэ айладхана: «Зүб шударга ажаһуудаг, Эзэниие бэдэрэгшэ зон, Намайе шагнагты! Сабшажа, таанадые тэндэһээ гаргаһан хабсагай руу, малтажа, таанадые тэндэһээ абаһан нүхэн руу харагты.

² Элинсэг эсэгэ Абраһаам, таанадые түрэһэн эхэ Саррые һанаандаа оруулагты. Би Абраһаамай ори ганса, үхи хүүгэдгүй байхадань үреэжэ, үхи хүүгэдые үршөөгөө бэлэйб. Иигэжэ уг удамынь угаа үнэржүүлээ һэм.

³ Би Сиониие, һандарһан гэрнүүд соонь байгша бүхы зониие хайрлажа, элһэн сүл губииень Эдээмэй сэсэрлиг мэтэ, Эзэнэй сэсэрлиг мэтэ болгохоб. Тэндэ баяр баясхалан, зугаа наадан, Намайе магтан дуулаһан дуунууд зэдэлхэл.

⁴ Минии арад түмэн, айладхалыем шагнагты! Минии улад зон, Нам руу анхаралаа хандуулагты! Арадуудта хуули ёһо тунхаглажа, тэдээндэ гэрэл болгон, Өөрын һургаал тогтоохоб.

⁵ Минии заларха саг ойртоо, тиигээд Би тэдэниие абархаб. Би Өөрөө үндэһэ яһатадые сүүдлэхэб, алас холын орон нютагууд Минии залархые, тэдэниие абархые ехэ найдан хүлеэнэ.

⁶ Огторгой руу харагты, газарые шэртэгты! Огторгой утаа уняар мэтэ үгы болохо, газар хубсаһан мэтэ хуушарха, ажаһуугшадынь аляаһад мэтэ хосорхо. Харин Минии абарал хэтэ мүнхэдөө үргэлжэлхэ, Минии илалта хододоо оршохо.

⁷ Үнэн шударгые мэдэдэг, ой ухаандаа Минии хуули ёһо хадууһан арад түмэн, Намайе шагнагты! Зоной наада энедэ барихаһаа, доромжолхоһоо бү айгты.

⁸ Хибэндэ эдюулһэн хубсаһан мэтэ, хорхойдо эдюулһэн нооһон мэтэ тэдэ үгы болохо. Харин Минии илалта хэтэ мүнхэдөө мандаха, Минии абарал үеһөө үедэ дамжан байха».

⁹ Эзэн, һэриит, маанадта туһалыт! Хүсэ шадалаа зангидан, бидэниие абарыт! Эртэ урда сагта, урданай сагта мэтэ һэриит! Тэнгис далайн Рааһаб гэжэ амитаниие сабшан хюдаа, далайн абарга могойе таһа татаа бэлэйт.

¹⁰ Абарһан зонойнгоо гаталан гарахын тула далайе шэргээжэ, гүн уһые харгы зам болгогшонь мүн лэ Та бэлэйт.

¹¹ Танай абарһан зон Сион руу баяртайгаар дуулалдан гараха, зугаа, баяр дэлгэрхэ. Тэдэ хэтэ мүнхэдөө жаргалтай байха, гай тодхор, гашуудал тэдээнһээ һэегүй һалаха.

¹² Эзэн иигэжэ айладхана: Таанадай түшэг тулгуубари Би, гансал Би мүн! Юундэ таанад үхэхэ табисууртай, хагдардаг үбһэндэл адли хүнһөө айха болообта?

¹³ Таанадые Бүтээгшэ, огторгой татажа, газарай һуури табигша Намайе, Эзэнээ, таанад юундэ мартаабта? Таанадые дарлажа байгшадай, усадхахаар бэлэн байһан дайсанай уур хилэнһээ ходо айжа таанад юундэ байнабта? Харин тэрэ ууртай дарлагша хаанаб?

¹⁴ Баряанда абтаһан зон удахагүй сүлөөлэгдэхэ, хосорхогүй, эдеэ хоолоор дутамаггүй байха.

¹⁵ Би болбол тэнгис далайе хүдэлгэжэ, долгидыень шааяса хүнхинүүлдэг Эзэн Бурхантнай мүн! Минии нэрэ – Түмэн Сэрэгтэ Эзэн!

¹⁶ Таанадта Өөрынгөө һургаал дамжуулааб, гараараа таанадые халхалан аршалааб. Би огторгойе татажа, газарай һуури табин, Сиондо «Таанад Минии арад түмэн гээшэт!» гэжэ айладхааб.

Иерусалимай гай гасалан дүүрэхэ

¹⁷ Иерусалим, һэрииш, һэрииш! Бодо! Эзэнэй шамда үгэгшэ уур хилэнгэйнь аягаһаа гашуун хэһээлтын шүлэ уугааш! Шабхаруушье үлээнгүй дууһан уужа, найгалзан байнаш.

¹⁸ Түрэһэн хүбүүд сооһоош шамайе хүтэлэн абаашаха хэншье байхагүй, хүлынь дүрөөдэ хүргэһэн хүбүүд сооһоош дүнгэжэ гарһааш хүтэлхэ хэншье үгы.

¹⁹ Дабхар гай тодхор шамайе дайраа! Хэн шамайе хайрлахаб?! Дээрмэдэлгэ ба хюдалга, үлэсхэлэн байдал ба һэлмээр усадхалга! Шамайе һаатуулха хэншье үгы!

²⁰ Урьхада ороһон зээрэн мэтэ, гудамжын уулзуур бүхэндэ улад зоншни хүсөө баранхай хэбтэнэ. Эзэнэй уур хилэнгые тэдэ дүүрэн амасаа, Бурханайшни шангархань аймшагтай!

²¹ Үзэмэй дараһан архиһаа бэшэ, ондоо юумэндэ һогтоһон, зобоһон Иерусалимай улад зон, шагнагты!

²² Өөрынгөө арад түмэнэй түлөө тэмсэгшэ Эзэн Бурхантнай иигэжэ айладхана: «Уур хилэн дундаа таанадта үгэһэн аягаяа мүнөө һөөргэнь абанаб. Найгалзуулдаг гашуун хэһээлтын шүлэ таанад бэшэ уухагүйт.

²³ Таанадые тамалагшадта энээниие үгэхэб. Тэдэ таанадые газар дээрэ хэбтүүлэн, шорой мэтээр дээгүүртнай дэбһэн гараа бэлэйл».