Исай 50 - Библи

Израилиин нүгэл

¹ Эзэн иигэжэ айладхана: «Һамгантаяа һалажа байһан хүндэл адли Өөрынгөө арад түмэниие Намайе үлдөө гэжэ һанаа гүт? Тиимэ юм һаа, һалаһанай гэршэлгэ саарһанууд хаанаб? Өөрынгөө үхи хүүгэдые богоол болгон худалдагша хүндэл адли таанадые үритэй хүндөө худалдаа гэжэ Нам тушаа һанаба гүт? Үгы, таанад өөрынгөө нүгэлэй түлөө баряанда туугдан ошоот, өөрынгөөл зэмэтэйдэ үлдүүлээт.

² Минии абархаяа ерэхэдэ, арад түмэмни юундэ байгаагүйб? Минии дуудахада, юундэ хэншье харюусаагүйб? Иихэдээ Минии гарые богони, Намда абарха хүсэн үгы гэжэ тэдэ һанаба гү?! Хараад үзөөрэйгты, захирхадам, далай шэргэхэ, гол мүрэнүүдые сүл губи болгоходом, загаһад уһагүйһөө боложо хосорхол.

³ Огторгойе үхэһэн хүнэй хойноһоо гашуудан үмдэдэг таар мэтээр харанхы бараан болгожо шадахаб!»

⁴ Һүр һүлдэгүй болоһон зониие дүнгэжэ, үгөөрөө туһалхыем Эзэн Бурхан намда юун гээд хэлэхыем заажа үгөө. Үглөө бүри Тэрэ намайе һэреэн, шэхыем һэргээн, юу айладхахаа байһыень шагнаха гэжэ тэсэн ядан хүлеэдэг намайе болгоно.

⁵ Эзэн Бурханай намда ойлгосо, мэдэсэ үршөөхэдэнь, би татагалзаагүйб, арсаагүйб.

⁶ Намайе сохигшодто нюргаа табижа үгөөб, доромжолходонь, тэдэниие болюулаагүйб, һахалыемни зулгаагша хүндэ хасараа табяад үгөөб, нёлбоходонь, нюураа халхалаагүйб.

⁷ Теэд тэдэнэй баһаһан ушар намайе хүлгөөхэгүй, юуб гэхэдэ, Эзэн Бурхан намда туһална. Би өөрыгөө шанга барин, тэдэниие тэсэнэб. Нэрээ гутаахагүйб гэжэ лаб мэдэнэб.

⁸ Бурхан минии хажуудахана байна. Тэрэ минии гэмгүй байһые элирхэйлхэ. Хэн намайе гэмнэхэ һанаатайб? Хамта зарга шүүхэдэ ошоё! Хэн намтай заргалдаха түсэбтэйб? Хамта шүүбэрилэгшын урда зогсоё!

⁹ Үзөөрэйгты, Эзэн Бурхан Өөрөө намда туһална, хэн намайе гэмнэжэ шадахаб?! Тэдэ булта хибэндэ эдюулһэн хубсаһандал адли таһаран үгы болохо.

¹⁰ Таанадай хэн Эзэниие хүндэлжэ, зарасайнь үгэ дууладаг бэ? Харгы харанхы, гэрэлгүйдэ ябагшад Эзэндэ этигэжэ, Бурхандаа найдан байг!

¹¹ Гал түлижэ, гартаа гал баряад ябааша таанад! Өөрын галай гэрэл соо, өөһэдын носоогшо галаа барин ябыта, хамаагүй! Минии гар таанадта иимэ юумэ ушаруулха: таанад зобожо хэбтэхэт!