Исай 5 - Библи

Үзэм жэмэсэй сэсэрлигэй дуун

¹ Нүхэр тухайгаа, үзэмэй жэмэсэй сэсэрлиг тухайнь дуу дуулахамни. Минии Нүхэр үрэжэлтэй гүбээ дээрэ үзэмэй модоной сэсэрлигтэй бэлэйл.

² Тэрэнээ тойруулан малтажа, шулуунуудһаань сэбэрлээ. Эгээл эрхим үзэмэй жэмэс һуулгаа. Алим жэмэс хамгаалхаяа сэсэрлигэй дунда самхаг баряа. Уһан үзэм шахаха шахуурга малтан зохёогоо. Тиигээд һайхан үзэмэй жэмэс гараха гэжэ найдан хүлеэжэ байхадань, гашуун үзэмэй жэмэс ургаал!

³ – Иерусалимда болон Иудын хан түрэдэ ажаһуугша таанад, үзэмэй жэмэсэй сэсэрлигэйм болон Минии хоорондохи зарга хэрэгые шүүбэрилыт!

⁴ Үшөө юу тэрээндэ хэхэ ёһотой байгаа гээшэбиб? Бүхы юумэ хээлби. Теэд юундэ Минии һайн үзэмэй жэмэс гараха гэжэ хүлеэжэ байхада, гашуун, муу үзэмэй жэмэс гарааб?

⁵ Мүнөө Би үзэмэй жэмэсэй сэсэрлигтэйгээ юу хэхэ гэжэ байһанаа таанарта мэдүүлхэм: хорёо хотыень абахаб, тэрэниие хооһолог лэ; ханыень һандаргаахаб, тэрэниие гэшхэг лэ.

⁶ Тэрэниие эзэгүйрүүлэн хаяхаб, мүшэр заһагдан отологдохогүй, газарынь һэндэгдэхэгүй. Тиихэдэм тэрэ хадхууртай үрмэдүүлдэ баригдаха. Тэрээн дээрэ бороо бү оруула гэжэ Би үүлэдтэ захирхаб.

⁷ Израилиин арад – Түмэн Сэрэгтэ Эзэнэй үзэмэй жэмэсэй сэсэрлиг гээшэл; Иудын хан түрын улад зон – Тэрэнэй дуратай үзэмэй модоной эшэнүүд. Үнэн зүбөөр хэрэгүүд эрхилэгдэхэ гээд Тэрэнэй хүлеэһэниинь тэдэ алууршад болоо. Үнэн шударгые хүлеэһэниинь гомдол, оог бархираан гансал гарана.

Зоной муу муухай хэрэгүүд

⁸ Ямаршье зайгүй болотор байшан дээрээ байшан нэмэжэ, таряалан дээрээ таряалан худалдан абажа байгааша таанадта гай тодхор тохёолдохо! Газар дээрэ гансал таанад ажаһууна юм гүт?!

⁹ Түмэн Сэрэгтэ Эзэн эли тодоор намда: Гэрнүүд олон, гэбэшье тэдэ хооһорхо. Мантан, һайхан байшангууд хүнгүй үлэхэ.

¹⁰ Дүрбэн гектар талмай үзэмэй жэмэсһээ оройдоол нэгэ баата жэмэсэй шүүһэн гараха. Тариһан хоомэр таряанһаа оройдоол эфаа, арба дахин бага таряан ургаха, – гэжэ дуулгаал.

¹¹ Эртэ үглөөнһөө үдэшэ болотор үзэмэй дараһан архи уужа үнгэргэгшэдтэ гай ушарха!

¹² Ятаг, хуур, хэнгэрэг, лимбэ! Найрлан, тэдэ архидана. Харин Эзэнэй үйлэ хэрэгүүд тухай һананагүй, хэжэ байгаашыень анхарнагүй.

¹³ Тиимэһээ ойлгодоггүй хадаа арадни баряанда туугдан ошохо. Удамаршадынь туража үхэхэ, хара зониинь ангажа хосорхо.

¹⁴ Үхэлэй орон тэдэниие хүлеэжэ, амаа үргэнөөр ангайна. Тиишээ тайжанар, юрын зоншье, шууягшад, найрлагшадшье ошохол.

¹⁵ Зон доромжологдон номгорхо, бардам зантайшуулшье бултадаа галхаха.

¹⁶ Харин Түмэн Сэрэгтэ Эзэн үнэн зүбөөр хэрэгүүдые шүүжэ үргэмжэлэгдэхэ, Арюун Бурхан үнэн шударгаараа нангин арюунаа харуулха.

¹⁷ Зон хони малаа хаяад, баряанда туугдан ошохо, тиихэдэнь хонидынь эзэгүй өөһэдөө тараха, баяшуулай орхиһон гэрнүүдэй дундуур эшэгэд бэлшэхэ.

¹⁸ Ай даа, худалай аргамжаар өөрынгөө хойноһоо мууе татажа ябаашад, нүгэл шэбэл тэргэдэ хүллөөд, татажа байгаашад гай тодхорто орохо!

¹⁹ «Эзэн айладхалаа түргөөр бэелүүлэг лэ, бидэ тэрэнииень нюдөөрөө харахаяа һананабди. Израилиин арюун Бурхан түсэбөө бэелүүлэг лэ, бидэ тэрэнииень лаб мэдэхэеэ хүсэнэбди!» гэжэ тэдэ хэлэнэ.

²⁰ Мууе һайн, һайниие муу гэжэ нэрлэгшэ, харанхые гэрэл, гэрэлые харанхы болгон хубилгагша, гашууниие амтатай, амтатайе гашуун болгогшо зондо гай ушарха!

²¹ Өөһэдыгөө ехэ сэсэн мэргэн, ухаатайбди гэжэ һанажа байгаашад гай гасаланда орохо!

²² Архиин туулмаг болошонхой, хатуу архи үзэмэй дараһан архитай худхан уугшад гай гасаланда орохо!

²³ Эдилгэ абахадаа, гэмтэниие зүб гэһэн шиидхэбэри гаргана, зүб шударга зониие гэмтэй болгоно!

²⁴ Тиимэһээ тэдэнэй үндэһэн һолоомын болон хатаһан үбһэнэй гал дүлэндэ шатаһандал адли хосорхо, тэдэнэй сэсэг хатажа, хумхаа тооһон болохо, юундэб гэхэдэ, тэдэ Түмэн Сэрэгтэ Эзэнэй Хуули буруушаагаа, Израилиин арюун Бурханай үгэнүүдые тоогоогүй.

²⁵ Эзэн Өөрын арад түмэндэ уур сухал боложо, гараа тэдээн руу һунгажа, сохихо! Хада ууланууд доһолжо, үхэһэн зоной хүүрнүүд бог шорой мэтэ үйлсэнүүдээр хэбтэхэ. Энээнэй удаашье Тэрэнэй уур хилэн унтархагүй, гарынь һунгаатай зандаа байха!

²⁶ Эзэн алас холын үндэһэ яһатаниие урижа, туг үргэхэ, газар дэлхэйн захаһаа ерэхыень тэдээндэ эшхэрхэ. Харыт, тиихэдэнь тэдэ шуумар түргэн ерэхэл!

²⁷ Тэдэнэй хэншье эсэжэ байхагүй, хэнииньшье бүдэрхэгүй. Нэгэшье хүниинь дууража-унтажа байхагүй. Бүһэнүүдынь һуларжа тайлдахагүй, нэгэшье хүнэйнь гуталай уялаа таһархагүй.

²⁸ Тэдэнэй годлинууд хурса, һурша номынь татаатай. Моридойнь туруунууд сахюур шулуун мэтэ хатуу, тэргынь мөөрнүүд хуй һалхин мэтэ.

²⁹ Дайсанай сэрэгшэд залуу арсалан мэтэ архиржа, олзоо шүүрэн абахадань, хэншье буляан абажа шадахагүй.

³⁰ Тэрэ үдэр тэдэ олзо дээгүүрээ далай мэтэ хүрхирхэ. Энэ орон нютагые харабал, Хаб харанхы ба уй гашуудал тэндэ үзэхэш. Гэрэл унтаржа, шэб харанхы болохо.