Исай 48 - Библи

Ерээдүй саг тушаа

¹ Яковай үринэр, Израилиин нэрээр ябагшад, Иудын үриһээ гарагшад, энээниие соносыта! Эзэнэй нэрээр тангаригладагшье һаа, Израилиин Бурханай нэрэ дуудадагшье һаа, досоогоо Тэрээндэ үнэн сэхэ бэшэт, зүб шударга бэшэт.

² Таанад өөһэдыгөө нангин хотын ажаһуугшад гээшэбди гэжэ нэрлэнэт, Түмэн Сэрэгтэ Эзэн гэжэ нэрэтэй Израилиин Бурханда түшэглэнэбди гэлдэнэт.

³ Эзэн иигэжэ Израильда айладхана: Эртэ урда сагһаа хойшо Би юун болохоб гэжэ тунхагладаг байгааб, тиигээд гэнтэ тэрэниие үйлэдэхэдэм, тэрэ бэелүүлэгдэдэг бэлэйл.

⁴ Танай үсэдые, хоолойтнай түмэр, сохотнай гуулин мэтэ гэжэ би ойлгодог һэм.

⁵ Тиимэһээ Би бүри эртэнһээ, ямар нэгэ ушарай болохоһоо урид энээн тушаа таанадта мэдээсэдэг һэм. «Шүтөөнүүднай, шудхаһан хүрэгүүднай эдэ бүгэдые бүтээгээ» гэжэ таанадай хэлэхэгүйн тула иигээ һэм.

⁶ Минии уридшалан соносхоһон бүхы зүйл бүтээ! Энээниие таанад мэдэрхэ ёһотойт. Мүнөө Би таанадта болохоёо байгаа шэнэ юумэн тушаа, таанадай мэдээгүй нюуса зүйл тушаа айладхааб.

⁷ Мүнөөл энэ юумэн болоо, урда тээнь иимэ юумэн байгаагүй. Тэрэнэй тохёолдоһон һаань, таанад энээн тушаа мэдээ һэмди гэжэ хэлэхэ байгаат.

⁸ Таанадта этигэхын аргагүй гэжэ Би мэдэжэ байгааб. Урбахаар зон гээд таанад тушаа хэлсэдэг һэн. Тиимэһээл энээн тушаа таанадта Би дуулуулаагүйб, шэхэндэтнай энээн тушаа ямаршье үгэ дуулдаагүй һэн.

⁹ Минии нэрэ магтан зоной дуулахын тула Би уур хилэнгээ баряад, нюугаад байнаб, таанадые хюдахаһаа тэбшээд байнаб.

¹⁰ Харыт, Би таанадые хайлуулааб, харин мүнгэ хайлуулдагтал адляар бэшэ, Би таанадые зоболонгой зууха соо шалгааб.

¹¹ Өөрынгөө аша туһада Би эдэ бүгэдые хэнэб, Өөрынгөө нэрэ бузарлуулхагүйб! Өөрынгөө алдар солые хэнтэйшье хубаалдахагүйб, энэ болбол гансал Минии байха ёһотой!

Киир тушаа

¹² Эзэн иигэжэ айладана: «Намайе шагна, Яков, Минии дуудаһан Израиль! Би болбол бүгэдын эхиндэ байһан, Би эсэстэшье байхаб!

¹³ Минии гарнууд газарай үндэһэ һуури табяа, огторгойе дэлгээ. Газар, огторгойе дуудахадам, тэдэ хамта тэрэ дары бии болодог.

¹⁴ Таанад бултадаа сугларжа, шагнагты! Ямаршье шүтөөн гү, али бурхан иимэ юумэ уридшалан мэдүүлжэ шадахагүй бэлэй: Минии шэлэһэн хүн Вавилоондо добтолжо, һанаһан юумыемни бултыень гүйсэдхэхэ.

¹⁵ Бил тэрэниие дуудажа, асаржа, амжалта үршөөнэб.

¹⁶ Нам руу дүтэлэгты, юу хэлэхыем шагнагты! Би эхинһээ эхилэн нюуса дуугаржа байгаа бэшэб. Энээнэй эхинһээ хойшо Би тэндэ байлсааб». Мүнөө Эзэн Бурхан Һүлдөө намда шэнгээн, Намайе эльгээгээл!

Өөрын арад зондо хандалга

¹⁷ Израилиин Арюун Эзэн Бурхан, таанадай Абарагша, иигэжэ айладхана: Би болбол танай Эзэн Бурхан гээшэб. Би таанадые аша туһатай юумэндэ һурганаб, ябаха ёһотой замаартнай ударидан байнаб.

¹⁸ Хэрбээ Минии захяа заабаринуудта анхаралаа хандуулдаг һаатнай, үршөөлнүүд гол мүрэн мэтэ таанад руу урдаха байгаа, далайн долгид мэтээр буян таанадта ерэхэ һэн.

¹⁹ Үри һадаһадтнай элһэн мэтэ тоо томшогүй, уг удамтнай орооһон мэтэ тоолошогүй байха байгаал! Тэдэнэй нэрэ Минии урда үгы болохогүй, хосорхогүй байгаал!

²⁰ Вавилоонһоо гарагты, Халдейһээ зугадагты! Баяртайгаар хашхаран, тунхаглагты, дэлхэйн хизаар хүрэтэр иимэ мэдээ тараагты: «Эзэн Өөрынгөө богоол Яковта эрхэ сүлөө үршөөгөө!»

²¹ Эзэн Бурханай Өөрын арад зониие элһэн сүл губяар хүтэлэн ябахада, тэдэ ангажа зобоогүй. Бурхан хабсагайһаа тэдээндэ уһа гаргажа, хадые хахалан, уһа урдахуулаа.

²² «Хара һанаатай зондо амар амгалан байдал үзэгдэхэгүй!» – гэжэ Эзэн айладхана.