Исай 47 - Библи

Вавилоондо хандалга

¹ Эзэн иигэжэ айладана: «Вавилооной басаган, хүүхэн, доошоо буужа, шорой дээрэ һуу! Газарта һуу! Халдейшүүдэй басаган, хан шэрээ бэшэ үгы шуу! Хэзээдэшьеб шамайе урихан, нариихан басагантай жэшээлдэг байгаа, харин мүнөө тиимэ бэшэш!

² Таряа тээрмэдэ! Нэмэргэеэ абажа, хормойгоо шуугаад, нюсэгэн хүлөөрөө гол гатала!

³ Шинии нюсэгые зон хараха, доромжолуулагдаһыеш обёорхо. Би хэнииешье хайрлахагүйб, үһөөгөө абахаб!»

⁴ Манай Абарагша – Израилиин арюун Бурхан, Түмэн Сэрэгтэ Эзэн гэжэ нэрэтэй мүн!

⁵ Эзэн Вавилоондо иигэжэ айладхана: Харанхыда абяа шэмээгүй һуу, халдейшуудай басаган! Саашадаа шамайе хан түрэнүүдэй хатан гэжэ нэрлэхэгүйл!

⁶ Би Өөрын арад түмэндэ уурлан, доромжолжо, шинии мэдэлдэ дамжуулаа бэлэйб. Ши тэдээндэ энэрэл хайра үзүүлэнгүй, наһатайшье зониие дарлан-зобоон байгааш.

⁷ Хэтэ мүнхэдөө хатан байхаб гэжэ ши һанааш. Саашадаа юун болохыень һанаандаашье оруулаагүйш.

⁸ Баян байдалда һуранхай ши одоо амархан һуугаад, бил гээшэб, намһаа ондоо хэншье байхагүй гэжэ шэбшэжэ байгша ши, бэлбэһэн эхэнэр болохогүйб, хүүгэдээ алдахые үзэхэгүйб гэжэ сэдьхэгшэ ши, энээниие шагна!

⁹ Нэгэтэ эдэ бүхы юумэн шамтай тохёолдохо. Эди шэдиеэ хэды хэрэглээшье һаа, үбгэеэ, хүүгэдээ алдахаш.

¹⁰ Муу юумэ хэхэдээ бэрхэ бэлэйш, хэншье энээнииеш харахагүй гэжэ һанааш. Сэсэн мэргэн ухааншни, эрдэм мэдэсэшни шамайе төөрюулээ. Бил гээшэб, намһаа ондоо хэншье байхагүй гэжэ шэбшэжэ байгааш.

¹¹ Гай тодхорой ерэхэдэ, эльбэ шэди хэрэглэбэшье, болюулжа шадахагүйш! Шинии мэдэхэгүй сүйрэл гэнтэ шам дээрэ унаха!

¹² Залуу наһанһаа хойшо хэжэ байһан эльбэ жэльбэнүүдээ, эди шэдиеэ ши хэжэл бай. Шамда тэдэшни туһашье боложо магад, дайсадаашье айлгажа магадши.

¹³ Олон зүбшэл шагнабашье, ши хүсэ шадалгүйгөө мэдэрнэш. Зурхайшад – одо мүшэдөөр үзэл хэлэгшэд, шэнэ һараар юумэ таагшад шамайе болохо байгаа юумэнһээ абараг лэ.

¹⁴ Тэдэ һолоомо мэтэ боложо, галда дүрөө! Өөһэдыгөөшье абаржа шадаагүй! Дулаасаха согшье, хажуудань һууха галшье үлөөгүй.

¹⁵ Эдир залуу наһанһаашни эхилэн зүбшэл үгэжэ байгааша зурхайшадшни өөр өөрын замаар ябаа, хэншье шамайе абараагүй!