Исай 46 - Библи

Вавилооной бурхадай эсэс ерээ

¹ Вавилооной Бээл болон Нэбоо гэдэг бурхадай эсэс ерээ! Тэдэ элжэгэнүүд дээрэ ашагдажа, ашаанай эсэһэн амитадта дарамта болоо.

² Эдэ шүтөөнүүд өөһэдыгөөшье абаржа шаданагүй, унаа, олзологдоо.

³ «Яковай уг удам, Израилиин үри һадаһадай үлдөөсэ, Намайе шагнагты! Түрэһэн сагһаатнай хойшо Би таанадые гар дээрэ үргэжэ ябааб, таанад тушаа һанаагаа зобооб.

⁴ Үһэнэйтнай сайтар Би таанадые абажа ябахаб. Би таанадые байгуулааб, абажа ябахаб, аршалхаб, дүнгэхэб.

⁵ Намайе таанад хэнтэй адлидхажа, хэниие Намтай зэргэсүүлхэбта? Хэнтэй адли гэжэ һанахабта, сасуулжа үзэхэбта?»

⁶ Зарим зон түриибшэһөө алтаа хайра гамгүй үгэжэ, мүнгэ шэгнүүрээр шэгнэн, бурхан хэхыень алташа дарханиие хүлһэлдэг. Тиигээд тэдэ шүтөөнэй урда унажа, мүргэдэг.

⁷ Тэдэ үнөөхиеэ мүр дээрээ үргэн зөөжэ, байха байрадань заладаг. Тэрэ хэһэн зүйлынь байраһаа хүдэлхэгүй зогсодог. Хэн нэгэнэй тэрээндэ зальбаран мүргөө гээшэ һаань, тэрэ харюусажа шадахагүй, гай тодхорһоо абаржа шадахагүй.

⁸ «Энээн тушаа һанан байгты, эшэгты, ухаа орогты, буһалгаатан!

⁹ Үни эртын, урданай зүйл һанагты. Минии ори ганса Бурхан байһые баталан дэмжэгты, Намтай адли хэншье байхагүй.

¹⁰ Юун болохыень Би эгээл эхиндэ уридшалан айладхаа бэлэйб. Болоодүй байгаа юумые үни эртэнһээ мэдүүлээб. Минии түсэбүүд заабол бэелүүлэгдэдэг, хэхэеэ һанаһан хэрэгээ Би заатагүй хэдэгби.

¹¹ Зүүн зүгһөө хүниие дуудахадам, тэрэ мяхаша шубуундал добтолон орохо. Түсэблэһэнөө Би заабол гүйсэдхэхэб. Айладхаһанаа заабол дүүргэхэб!

¹² Таанад, үсэд зантай зон, Намайе шагнагты! Үнэн зүб, һайниие хэхэ гээшэ үшөө үды гээд һананат.

¹³ Би һайн юумэ һаяар хэхэб, тэрэ саг ойртоо. Абарал буулгаха сагни удааржа байхагүй. Би Сиониие абархаб, Израильда нэрэ хүндэ олгуулхаб».