Исай 45 - Библи

Киирые шэлэбэ

¹ Эзэн Киирые хаан гэжэ тоһолон шэлээд, арадуудые диилэн зонхилхыень табяа. Хаашуулай эрхэ түлөөлгэнүүдые болюулхын тула Тэрэ Киирые эльгээгээ. Эзэн тэрэнэй урда хотонуудай бартаануудые нээхэл. Кииртэ Эзэн иигэжэ айладхана:

² «Би шинии урда ябажа, хада уулануудые тэгшэлхэб, гуулин бартаануудые эбдэжэ, түмэр шэбхэнүүдыень хуха татахаб.

³ Шамайе нэрээршни дуудадаг Израилиин Эзэн Бурхан Би гээшэб гэжэ шамда мэдүүлхын тула харанхы, нюуса газарнуудһаа эд баялиг, эрдэни зэндэмэни үгэхэб.

⁴ Минии богоол Яковай, Минии шэлэмэл Израилиин аша туһа хаража, Би шамайе нэрээршни дуудааб. Намайе шинии танихагүйшье һаа, Би шамда хүндэтэ нэрэ үгөөб.

⁵ Би болбол Эзэн гээшэб. Ондоо Бурхан байхагүй. Намайе мэдэхэгүйш, харин Би шамда хүсэ үршөөгөөб.

⁶ Тиихэдэм Намһаа ондоо ямаршье Бурхан байхагүй, Намайе Эзэн гэжэ наранай мандаха зүгһөө эхилээд, наранай орохо зүг хүрэтэр зоной мэдэхэнь болтогой!

⁷ Би туяа гэрэл болон харанхые бии болгоноб. Энхэ амгалан байдал, гай тодхоршье асарнаб. Би болбол эдэ бүгэдые хэдэг Эзэн мүн!

⁸ Огторгойһоо бороодол мэтээр үнэн зүбые эльгэхэб, үүлэнһээ тэрэ адхарха. Газар нээгдэжэ, абарал бии болохо. Тиигэжэ үнэн зүб үйлэ хэрэгүүд тэндэ сэсэглэн дэлгэрхэ. Би, Эзэн, энээниие бүтээгээб!»

Бүтээгшэ Эзэн

⁹ Бүтээгшэтэеэ маргалдагша шабар һаба бии юм аал? Тэрэ һаба бусад һабануудтал адлил! Шабарынь вааршанһаа юу хэжэ байһан тухайнь асууха гү?! Бүтээгшэ дүрэгүй гэжэ шабар амһарта гомдол барижа байдаг гү?!

¹⁰ Эхэ, эсэгэдээ «Таанад юундэ намайе түрөөбта?» гэжэ хэлэдэг гүбди?

¹¹ Израилиин арюун Бурхан, тэрэ арад түмэниие байгуулагша Эзэн, иигэжэ айладхана: «Минии үхи хүүгэдэй ерээдүй тушаа һэжэг түрэжэ гү, али юу хэхыемни заажа байха зон таанад гээшэ гүт?!

¹² Дэлхэйе бүтээжэ, дээрэнь зониие бии болгоһониинь Би мүн! Өөрын хүсэ шадалаар огторгойе дэлгээб, нара, һара, мүшэдые зонхилон удариданаб.

¹³ Киирые үнэн зүб үйлэ хэрэг ябуулхын тула Би тодоруулааб. Тэрэнэй ябадаг бүхы харгы зам жэгдэлхэб. Тэрэ Минии Иерусалим хото һэргээн бодхохо, баряанда байгааша Минии арад зониие сүлөөлхэ. Иимэ юумэ хэхэдэнь хэншье тэрээндэ шагнал үгэхэб гэжэ найдуулаа бэшэ. Иигэжэ Би, Түмэн Сэрэгтэ Эзэн, айладхана мүн!»

¹⁴ Эзэн иигэжэ айладхана: Израиль, Египедэй болон Эфиопиин баялиг таанадай болохо, Сэбаагай үндэр бэетэй зон танай богоол болохо, хойноһоотнай гэнжэлүүлэгдэн ябаха. Тэдэ танда унан мүргэжэ, «Үнэхөөр Бурхан таанадтай хамта байна. Ондоо бэшэ Бурхан байхагүй» гэлдэхэ.

¹⁵ Өөрынгөө арад түмэниие абарагша Бурхан, Израилиин Бурхан, Өөрыгөө нюудаг Бурхан юм Тэрэ!

¹⁶ Шүтөөнүүдые дархалагшад бултадаа эшхэбтэр байдалда орохо, бултадаа нэрээ хухалха.

¹⁷ Харин Израиль Эзэнээр хэтэ мүнхэдөө абарагдаха, арад түмэниинь эшэхээр, нэрээ гутаахаар байдалда хэзээдэшье орохогүй!

¹⁸ Огторгойе бүтээһэн, газарые байгуулһан, бии болгоһон, һуурииень табиһан, хооһон байхын тула бэшэ, амидархын тула бүтээһэн, байгуулһан Эзэн иигэжэ айладажа байна: Би болбол Эзэн гээшэб. Намһаа ондоо Бурхан байхагүй!

¹⁹ Би нюусаар айладана бэшэб, харанхы газарта бэшэ. «Хооһон газарта Намайе бэдэрэгты!» гэжэ Яковай үри һадаһадта айладаа бэшэб. Би Эзэн мүн! Би үнэн шударга зүйл айладанаб, үнэн сэхые тунхагланаб!

Дэлхэйн бүхы зоной Эзэн Бурхан

²⁰ Эзэн иигэжэ айладана: «Үндэһэ яһатад, хамтадаа ерэгты! Амиды үлөөшэ зон, зарга шүүлгэндэ дүтэлэн ерэгты, абаржа шадахагүй бурхадта зальбарагшад, модон шүтөөнүүдые абажа ябаашад юушье мэдэхэгүй зон!

²¹ Зарга шүүлгэндэ ерэжэ, хэрэгээ хөөрэгты. Хамта зүбшэгты. Хэн эртэнһээ энээниие мэдүүлжэ, олондо соносхооб? Өөрын арад түмэниие абарагша Би, зүб шударга Эзэн бэшэ гүб?! Намһаа ондоо Бурхан байхагүй!

²² Дэлхэйн бүхы зон, Нам руу эрьежэ абарагдагты! Би болбол ори ганса Бурхан гээшэб!

²³ Би Өөрөөрөө шахаа тангариг үргөөб! Минии аманһаа үнэн зүб үгэ гараа, тэрэниие һөөргэнь абажа, һэлгэжэ байхагүйб! Яһатан бүхэн урдамни мүргэхэ, ямаршье хэлэтэй хүн Намда этигэхэ тухайгаа тангариглаха.

²⁴ Намда, Эзэндэ, үнэн шударга, хүсэн бии гэжэ тэдэ хэлсэхэ. Намайе үзэн ядагшад эшэжэ, Нам руу ерэхэ.

²⁵ Израилиин бүхы уг удам Минии, Эзэнэй, һайгаар зүб болохо, алдаршуулагдаха!»