Исай 43 - Библи

Өөрын арад түмэниие абарха тушаа Бурхан найдуулна

¹ Яков, шамайе байгуулагша, Израиль, шамайе бүтээгшэ Эзэн иигэжэ айладхана: «Бү ай, Би шамайе абархаб. Би шамайе нэрээршни нэрлээб, ши Минии болоош.

² Уһа гаталхадаш Би шамтай байхаб. Гол мүрэнөөр гарахадаа шэнгэхэгүйш. Гал дундуур ябаашье һаа, шатахагүйш. Элдэб гай гасалангууд шамайе дайрахагүй.

³ Ушарынь гэбэл, Би танай Эзэн Бурхан, таанадые абарагша Израилиин арюун Бурхан мүн! Таанадые абархын тула Египет, Эфиопи болон Сэбаа үгэжэ, таанадые сүлөөлөөб.

⁴ Ши Намда ехэ үнэтэй-сэнтэйш, угаа хайратайш, тиимэһээ шамайе абархын тула Би ондоо үндэһэ яһатаниие хамаагүй шинии түлөө үгэхэб, тэдэнээр һэлгэхэб.

⁵ Бү ай, Би шамтай хамтаб! Би шинии уг удамые зүүн болон баруун зүгүүдһээ суглуулан, гэртэнь асархаб.

⁶ Хойто зүгтэ хандан, Минии арад түмэниие табихыень, урда зүгтэ хандан, зониием барижа байхагүй тухай захирхаб. Минии арад түмэнэй алас холоһоо, үлгэн дэлхэйн элдэб буланһаа ерэхэдэнь бү һаад хэгты гэхэб.

⁷ Тэдэ Минии Өөрын зон, Өөрын алдар солын тула Би тэдэниие бүтээгээ бэлэйб».

Израилиие шүүбэрилгэ

⁸ Эзэн иигэжэ айладхал буулгана: «Нюдэтэйшье һаа, һохор, шэхэтэйшье һаа, дүлии Минии арад түмэниие шүүбэрилхыем асарагты!

⁹ Зарга шүүлгын урда бүхы арадууд суглараг лэ! Хэнэйнь бурхад ерээдүйе уридшалан тунхаглажа шадахаб? Зүгнэлгэнүүдыень дуулаһан гэршэнэрээ тэдэ асараг лэ. Тэдэниие шагнажа, зүб, бурууень тодорхойлхоб.

¹⁰ Харин Минии гэршэнэр гэбэл, Израилиин арад түмэн. Таанад болбол Минии зарасанар. Таанад мэдэжэ, Намда этигэжэ, Намайе ори ганса Бурхан гэжэ ойлгохын тула таанадые шэлээб. Намһаа бэшэ ондоо Бурхан байхагүй, хэзээдэшье байгаагүй, байхашьегүй!

¹¹ Би гансаараа Эзэн гээшэб! Намһаа ондоо абарагша танда байхагүй.

¹² Юун болохоб гэжэ уридшалан айладхааб, тиигээд таанадые абарааб. Хариин ямаршье бурхан иимэ юумэ хэжэ шадахагүй. Таанад Минии гэршэнэр гээшэт.

¹³ Би болбол Бурхан гээшэб, хэзээдэшье Бурхан зандаа байхаб. Хэншье Намһаа зугадажа шадахагүй, хэншье Минии үйлэ хэрэгүүдые болюулжа шадахагүй».

Абарал буулгаха

¹⁴ Израилиин арюун Бурхан, таанадые Абарагша Эзэн иигэжэ айладхал буулгана: «Таанадые абархын тула Би Вавилооной урдаһаа сэрэг эльгээгээб, баяртай бардамаар хашхардаг халдейшүүдэй уһанай онгосоор тэрьедэхэдэнь, хюдахаб!

¹⁵ Би болбол танай Арюун Эзэн Бурхантнай гээшэб. Израиль, таанадые бүтээгээб, хаантнай Би мүн!»

¹⁶ Тэнгис дундуур зам, урдажа байһан уһан дундуур харгы гаргагша Эзэн иигэжэ айладхаба.

¹⁷ Тэрэ хүсэ ехэтэ сэрэг – дайшалхы тэргэтэй, моридтой – хосороохо тээшэнь залаа. Тэдэ бултадаа унажа, дахин бодоогүй, зула мэтэ унтаржа замхаа.

¹⁸ Гэбэшье Эзэн иигэжэ айладхал буулгана: «Урданай юумэ бү дурдагты, үнгэрһэн юумэн тушаа һанаата бү бологты.

¹⁹ Харагты, Би шэнэ зүйл хэхэм. Тэрэ мүнөө бэелүүлэгдэжэ эхилээ, харахадатнай болохо. Мүн Би хээрэ талада зам гаргажа, элһэн сүл губида уһа урдахуулхаб.

²⁰ Өөрынгөө шэлэһэн арад зониие ундалуулхын тула хооһон тала газарта уһа үгэжэ, элһэн сүл губида гол урдахуулхадам, хээрын ан арьяатаншье Намайе хүндэлхэ, сүүбэн шоно, тэмээн хяруулшье Намайе магтахал.

²¹ Өөртөө гэжэ энэ арад түмэниие байгуулааб, тэдэ Намда магтаал татахал!»

Израилиин нүгэл

²² Эзэн иигэжэ айладхана: Харин ши, Яков, намайе дуудаагүйш, Израиль, Намда хандаагүйш, Намда мүргөөгүйш.

²³ Түгэс шатаалта үргэлэй хонидые Намда асараагүйш. Үргэл хэжэ Намайе хүндэлөөгүйш. Би шамайе үргэл Намда үргэ гэжэ баадхаа бэшэб, уталга Намда ууюула гэжэ захираа бэшэб.

²⁴ Ши Намда зорюулан аятай юумэ мүнгөөр худалдан абаагүйш, үргэлэйнгөө өөхөөр Намайе садхаагаа бэшэш. Харин ши нүгэл шэбэлээрээ Намайе хашараажа, хуули буса үйлэ хэрэгүүдээрээ Намайе ядараагааш.

²⁵ Гэбэшье Би, Бурхан, шинии хилэнсэг арюудхан, нүгэлыеш хүлисэнэб.

²⁶ Зарга шүүлгэдэ ошоё! Зүб байһанаа баталхын тула ши ушар шалтагаанаа хэлэ!

²⁷ Элинсэг эсэгэшни нүгэл хэжэ, удамаршадшни Намда һөөргэдэбэ.

²⁸ Тиимэ ушарһаа Би санаарта ударидагшадые нангин үүргэһээнь болюулааб, Яковые хосоролдо үгөөб, Израилиие доромжолгодо оруулбаб.