Исай 42 - Библи

Эзэнэй үнэн богоол

¹ Эзэн иигэжэ айладхана: Минии дэмжэдэг, сэдьхэлдэмни таарама, Минии шэлэгшэ зараса энэ байна. Арюун Һүлдэеэ тэрээндэ хайрланаб, тиихэдэм Тэрэ үндэһэ яһатан бүхэндэ зүб шударга ёһо гурим нэбтэрүүлхэ.

² Тэрэ хашхархагүй, дуугаа шангадхахагүй, гудамжануудта шангаар хүрхирхэгүй.

³ Тэрэ хухарһан хулһые таһа татахагүй, залиржа байһан дэн унтараахагүй, зүб шударга гурим ёһо бүхы зондо асарха.

⁴ Тэрэ зүрхэ алдахагүй, урма зоригоо хухархагүй, дэлхэй дээрэ зүб шударга гурим тогтоохо. Холын нютагууд Тэрэнэй хуулиие найдан хүлеэнэ.

⁵ Бурхан огторгойе бүтээжэ татаа, дэлхэйе үрэ жэмэстэйнь Тэрэ байгуулжа дэлгээ, Тэрэ улад зондо, амитадта ами наһа, амисхаал бэлэглээ. Тиигээд мүнөө Эзэн Бурхан Өөрын богоолдо иигэжэ айладхана:

⁶ Би, Эзэн, шамайе дуудажа, үнэн шударга байдал тогтоохо арга шадал шамда үршөөгөөб. Шамайе гарһааш барижа, шамайе аршалнаб! Шинии аргаар арад түмэнтэй хэлсээ баталхаб, шамаар дамжуулан, үндэһэ яһатадта гэрэл асархаб.

⁷ Тиихэдэм, һохор зоной нюдэн нээгдэхэ, түрмэдэ һуугшад сүлөөдэ гараха, харанхыда һуугшад түрмэһөө гараха.

⁸ Би болбол Эзэн гээшэб! Иимэ нэрэтэйб! Минии алдар соло ондоо ямаршье бурханда хүртэхэ ёһогүй, Намда үргэһэн магтаалые һиилэмэл хүрэгүүд хубаалдаха эрхэгүй.

⁹ Минии уридшалан айладхаһан зүйлнүүд бүтээ. Мүнөө Би таанадта шэнэ юумэ тохёолдохынь урда тээ уридшалан тунхагланаб.

Магтаал дуун

¹⁰ Эзэндэ шэнэ дуу дуулажа, бүхы дэлхэйгээр Тэрээндэ магтаал дуулагты! Далайгаар тамарагшад болон далайн бүхы амитад, Тэрэниие магтагты! Олтирогууд болон ажаһуугша зониинь, Эзэндэ магтаал дуулагты!

¹¹ Элһэн сүл губи, хотонуудынь Бурханиие магтаг лэ, Кэдаарай улад зон Тэрэниие магтаг, Сээлын ажаһуугшад уулын оройһоо баярлан хашхарха болтогой!

¹² Холын орон нютагуудаар ажаһуугшад Эзэн Бурханда магтаал, алдар соло үргэг лэ!

¹³ Эзэн сэрэгшэ мэтэ урагшаа гаража, дай үүдхэхээр бэлэн байхал. Байлдаанай дуу шангаар хашхаран, дайсадтаа хүсэ шадалаа элирхэйлхэ.

Өөрын арад түмэндэ туһалха

¹⁴ Эзэн иигэжэ айладхана: Удаан сагай туршада абяа аниргүй байжа, бэеэ баряаб. Харин мүнөө хэрэг үүдхэхэ саг ерээ, тиимэһээ Би түрэжэ байгаа эхэнэртэл хашхаран байнаб.

¹⁵ Уула гүбээнүүдые үгы хэн, бүхы үбһэ ногоо хатаахаб. Голой нюрууе элһэн сүл губи болгожо, сөөрэмүүдые шэргээхэб.

¹⁶ Би Өөрын һохор зониие мэдэхэгүй замаарнь хүтэлэн ябахаб, тэдэнэй урда харанхые гэрэл, барзагар газарые тэгшэ тала болгохоб. Энэ болбол Минии хэхэ юумэн. Би тэдэниие хэнгүй орхихогүйб.

¹⁷ Шудхамал хүрэгүүдые бурхад гэжэ нэрлээшэд, шүтөөнүүдтэ этигэгшэд ехэ эшэжэ, тиихэеэ болихо.

Израиль һурахаяа арсана

¹⁸ Эзэн айладхана: Таанад, дүлии зон, шагныта! Һохор зон, харыта!

¹⁹ Минии богоолһоо өөрэгүй ехэ һохор хүн хэн бэ? Минии эльгээһэн элшэдэл адли дүлиинь хэн бэ?

²⁰ Минии арад түмэн, таанад олон юумэ үзэһэншье һаа, юумэ һайн ойлгоогүйт. Шэхэтэйшье һаа, юумэ дуулаагүйт.

²¹ Үнэн шударгаяа хараада абан, Эзэн Хуулиие агууехэ, алдар солотой болгохо һанаатай.

²² Харин мүнөө Тэрэнэй арад дээрмэдүүлэгдээ. Тэдэ бултадаа нүхэн руу хаюулжа, түрмэ шорондо хаагданхай. Тэдэ олзо болоо, хэншье тэдэниие абархагүй.

²³ Таанадай хэн энээн тушаа шагнахаб? Хэзээ анхаралтайгаар иимэ юумэ шагнажа эхилхэбта:

²⁴ «Хэн Яковые дээрмэшэдтэ дамжуулжа үгөөб? Хэн Израилиие һүйдхэгшэдтэ үгөөб? Эзэн бэшэ гү? Бидэ Тэрэнэй урдаһаа нүгэл үйлэдөө бэлэйлди. Тэрэнэй үгөөр ажаһуугаагүйбди, хуулииень сахяагүйбди.

²⁵ Тиимэһээ Тэрэ Өөрын уур хилэнгэй шангые, хатуу дайе маанад дээрэ тохоо. Израиль дотор хаа-хаанагүй уур хилэнгэйнь түймэр мэтэ бушаганаашье хадань, бидэ ойлгоогүйбди, мэдэрээгүйбди».