Исай 41 - Библи

Израильда Бурханай найдуулга

¹ Эзэн Бурхан иигэжэ айладхана: – Холын нютагууд, абяа шэмээгүй болоод, Намайе шагнагты! Хамта ерэжэ, хэрэгээ шүүхэдэ хөөрэжэ үгыт.

² Хэн хойто зүгһөө баатарые эльгээгээб? Хэн үнэн зүбые тэрээнтэй хамта, ошоһон лэ газартань байгуулнаб? Үндэһэ яһатаниие, хаашуулые диилэхэ хүсэ хэн тэрээндэ үгэнэб? Тэрэ һэлмээрээ тэдэниие тооһон мэтэ, һурша номоороо һалхинда хиидэһэн хагда үбһэн мэтэ болгобо.

³ Тэрэ тэдэниие намнажа, урдань хүлөө табяагүй харгыгаар һанаа амар ябана.

⁴ Хэн энээниие гүйсэдхөөб, хэн бүтээгээб? Хэн угай бэшэг-түүхэ зохёогооб? Эзэн Би эхиндэнь байгааб, эсэстэньшье Би, Эзэн, байлсахаб!

⁵ Олтирог нютагуудай зон Минии хэһэн үйлэ хэрэг хаража, айн шэшэрэлдээ. Тиигээд тэдэ сугларан ерэнэ.

⁶ Хүн бүхэн бэе бэедээ туһалан, «зоригтой бай!» гэжэ хэлэнэ.

⁷ Модошо дархан хайлуулагшын һүр һүлдэ үргэжэ, «һайнаар хээш!» гэнэ. Түмэршэ дархан дүшэ дээрэ хүдэлөөшые зоригжуулна, гагнуур тушаа «һайнаар хэгдээ» гэжэ, хүрэгэй ганхахагүйн тула хадааһаар бүхэлнэ.

⁸ Харин ши, Минии богоол Израиль! Минии шэлэһэн Яков! Минии нүхэр Абраһаамай үри һадаһад!

⁹ Би таанадые дэлхэйн захаһаа асаржа, газарай хирхагһаа дуудажа, иигэжэ айладхаа бэлэйб: Таанад Минии богоолнууд гээшэт. Би таанадые голоогүйб, шэлэн абааб.

¹⁰ Бү айгты, Би таанадтаяа хамтаб! Би таанадай Бурхамби, тиимэһээ бү һанаагаа зобогты! Би таанадые хүсэтэй болгожо, туһалхаб! Таанадые хамгаалжа, абархаб!

¹¹ Таанадта сухалдаһан зон нэрээ гутаажа, хүндэгүй болохо. Таанадтай заргалдагшад хосорхо.

¹² Тэдэниие бэдэрбэшье, олохогүйт. Таанартай заргалдагшад үгы болохо. Таанартай дайлалдагшад юуншье бэшэ болохо.

¹³ Би болбол танай Эзэн Бурхан гээшэб. Таанадые хүтэлжэ, «бү айгты, Би таанадта туһалхаб» гэжэ мэдүүлнэб.

¹⁴ Жаахан, хүсэгүй Израиль, бү ай, Би шамда туһалхаб. Би болбол Израилиин арюун Бурхан, таанадай Абарагша мүн.

¹⁵ Таанадые Би хурса үзүүртэй шэнэ лантуу мэтэ болгохоб. Таанад хада уулануудые нюдэжэ, үгы хэхэт. Гүбээнүүд һолоомо һүрэл мэтэ болохо.

¹⁶ Таанад тэдэниие һагшажа, һалхин хиидүүлжэ, шуурган тарааха. Тиихэдэнь Минии танай Бурхан байһанда баясажа, Израилиин арюун Бурхан болохо Намайе магтан байхат.

¹⁷ Үгытэй, ядуу зон уһа бэдэржэ, ангаһандаа хэлэнэйнь хатан алдахада, Би, Эзэн, гуйлтыень дүүргэхэб, Би, Израилиин Бурхан, тэдэниие хаяад байхагүйб.

¹⁸ Би нюсэгэн гүбээнүүд дээрэһээ гол урдахуулжа, нюруу газарай дунда булаг бурьялуулхаб. Элһэн сүл губи газарые уһан сөөрэм болгожо, хатаһан газарые уһан булагаар элбэг болгохоб.

¹⁹ Элһэн сүл губи газарта хуша, акаци, мирт, чидун модо тарихаб. Зэлүүд хооһон, үрэжэлгүй газарта арса, жодоо, нарһан модо ургуулхаб.

²⁰ Зон энээниие хаража, Минии, Эзэнэй, хэһые мэдэдэг болохо. Израилиин арюун Бурхан болохо Минии энээниие хэһые тэдэ ойлгохо.

Худал хуурмаг бурхад тушаа

²¹ Зарга хэрэгээ хэлэгты гэжэ Би, Эзэн, Яковай Хаан, үндэһэ яһатадай бурхадта айладханаб. Шанга баримтануудаа асарагты!

²² Иишээ ерэжэ, юун болохоёо байһые хэлэгты. Тиихэдэтнай хэзээ энээнэй болохоёо байһые бидэ мэдэдэг болохобди. Үнгэрһэн хэрэгүүдые удхалан ойлгуулагты, тэдэ саашанхи үе сагуудта ямар удха шанартайб гэжэ хэлэгты.

²³ Ерээдүйдэ болохо юумэ үзэгдэл харуулан мэдүүлэгты, тиихэдэтнай бидэ таанадые бурхад гэжэ мэдэдэг болохобди. Мүн һайн, үгышье һаа, муу хэрэг үйлэдэгты, маанадые айн һүрдүүлэгты!

²⁴ Гэбэшье таанад юуншье бэшэт, юушье хэжэ шадахагүйт! Таанадта мүргэгшэд жэгшүүритэй!

²⁵ Хойто зүгтэ байдаг хүниие шэлээб, зүүн зүгһөө тэрэ Минии нэрэ дуудаа! Шабар мэтээр тэрэ удамаршадые гэшхэнэ, вааршанай шабар гэшхэдэг мэтээр.

²⁶ Иимэ юумэн болохо гэжэ таанадай хэн уридшалан хэлээб? Хэлээ һаатнай, «та зүб шударга» гэжэ бидэ соносхохо бэлэйлди. Теэд таанадай хэншье энээн тушаа нэгэшье үгэ хэлээгүй, соносхоогүй, иимэ юумэ хэлэжэ байһыетнай хэншье дуулаагүйл!

²⁷ Би, Эзэн Бурхан, эгээл түрүүлэн Сиондо мэдээ дуулгаа һэм, «Зонтнай гэртээ бусажа байна!» гэжэ Иерусалимда соносхохыень Бил элшые эльгээгээ бэлэйб.

²⁸ Тэдэ бурхадые харахадам, үнэхөөрөө зүбшэл үгэхөөр хэншье тэдэнэй дунда байгаагүй. Намда харюу үгэжэ шадаха хэншье тэндэ үгы бэлэй.

²⁹ Тиимэһээ тэдэ бултадаа мэхэлхэ зүйл, юушье хэжэ шадахагүй, һула, хүсэгүй шүтөөнүүд гээшэл!