Исай 40 - Библи

Найдалай ошон бадарна

¹ «Минии арад түмэниие һаатуулагты, – гэжэ манай Бурхан айладхана. – Һаатуулан байгты!

² Иерусалимай зонтой эелдэр зөөлэнөөр хөөрэлдэгты. Тэдэнэй зобохо-тулиха саг дүүрээ, нүгэл хилэнсэгынь арюудхагдаа гэжэ хэлэгты. Бүхы нүгэлэйнь түлөө тэдэниие Би хоёр дахин ехээр хэһээгээб».

³ Нэгэ хүн хашхарна: «Зэлүүд хооһон талада Эзэнэй ябаха зам бэлдэгты! Манай Бурханда элһэн сүл губида сэхэ зам гаргагты!

⁴ Жалга бүхэн жэгдэрхэ, хада гүбээ бүхэн набтар болохо зэргэтэй, ялхитай болдогтой зүргэ тэгшэ болог лэ, нэгэ адли бэшэ газар мэлигэр гоё болог лэ.

⁵ Тиихэдэ Эзэнэй алдар солонь эли болон тодорхо, бүхы зон тэрэниие хараха. Юуб гэхэдэ, Өөрөө Эзэн иимэ юумэн болохо гээд найдуулаа бшуу».

⁶ Хэншьеб хашхарба: «Мэдээсэл тунхаглагты!» Би асуубаб: «Ямар мэдээсэл тунхаглахабиб?» «Бүхы зон үбһэ ногоон мэтэ, гоё һайханиинь хээрын сэсэг мэтэ удахагүй.

⁷ Эзэнэй һалхи эльгээхэдэ, үбһэ ногоон хатажа, сэсэг хагдардаг. Зон гээшэ үнэхөөр үбһэ ногоондо адли.

⁸ Зүб даа, үбһэ ногоон хатана, сэсэг хагдарна, харин манай Бурханай үгэ хэтэ мүнхэдөө оршон байха!»

⁹ Иерусалим, үндэр хада уула өөдэ гаража, һайн мэдээ соносхо! Сион, хоолойгоо шангадхан, һайн мэдээ дуулга! Соносхогты, бү айгты! Иудын хан түрын хотонуудта Бурханайнь заларан ерэжэ байһые дуулгагты!

¹⁰ Харагты, Эзэн Бурхан хүсэ шадалаа, засаг эрхэеэ зангидан залархань. Зондо шагнал Тэрэ асарна.

¹¹ Тэрэ хонишон мэтэ һүрэгөө харюулжа, хурьгадаа суглуулжа, гар дээрээ үргэн, сээжэдээ тэбэреэд, хурьгалһан хонидые дүмүүхэнээр адуулха.

Израилиин Түгэс Хүсэтэ Бурхан

¹² Хэн тэнгис далайн уһые гарайнгаа альгаар хэмжэжэ, һөөмөөр тэнгэриие хэмжүүрлэжэ шадахаб? Хэн газарай шоройе амһартаар хэмжүүрлэн тооложо, уула, гүбээнүүдые шэгнүүрээр шэгнэхэ аргатайб?

¹³ Эзэнэй Һүлдые хэн мэдэрээб? Хэн Тэрээндэ заабарилжа, зүбшэл үгэжэ байгааб?

¹⁴ Хэнтэй Тэрэ зүбшэжэ, хэн Тэрээндэ ухаа заанаб? Хэн Тэрэниие ёһо гуримда һургажа, сэсэн мэргэн ухаа ойлгуулнаб?

¹⁵ Эзэндэ үндэһэ яһатад болбол уһанай дуһал мэтэ, олтирогууд тооһон мэтэ.

¹⁶ Үргэлэй гал носооходо, Ливаанай ой соо модон дуталдаха, тэрэ ой соо ан арьяатаншье Эзэн Бурханда түгэс шатаалта үргэл үргэхэдэ хүрэхэгүй.

¹⁷ Бүхы үндэһэ яһатан Тэрэнэй урда юуншье бэшэ.

¹⁸ Таанад Бурханиие хэнтэй адлидхахабта? Ямар дүрсэтэй гээд яагаад зураглахабта?

¹⁹ Дарханай шудхаһан, алташа дарханай алтаар шэрдэһэн, мүнгэшэ дарханай мүнгэн гэнжэ хэһэн шүтөөндэ адли бэшэл Бурхан!

²⁰ Иимэ үргэл хэхэ аргагүй хүн үмхирхэгүй модо шэлэжэ абаад, унахагүйгөөр шүтөө дархалжа шадаха уран дарханиие олодог.

²¹ Таанад мэдэхэгүй юм гүт? Таанадта үнинэй хэлэгдээгүй юм гү? Дэлхэйн яажа бии болоһон тухай таанад дуулаагүй юм гүт?

²² Таршаа шумуул мэтэ улад зонтой дэлхэйн тойрог дээрэ заларагшань Тэрэ бэлэй. Тэрэ огторгойе хүшэгэ мэтэ татажа, майхан мэтэ дэлгээ.

²³ Тэрэ удамаршадые хэншье бэшэ болгоно, дэлхэйн ноёдые хооһон газар болгоно.

²⁴ Һая таригдаһан, мэнэ һая газарта үндэһэлһэн ургамалдал адли тэдэ удамаршад. Эзэнэй тэдээн руу һалхи эльгээхэдэ, хатажа, һолоомо мэтээр һалхинда тэдэ хиидэнэ.

²⁵ Нангин Арюун Бурханиие хэнтэй адлидхахаар бэ? Хэнтэй тэнсүүлхээр бэ?

²⁶ Огторгой руу харагты! Хэн одо мүшэдые байгуулааб? Сэрэгтэл адляар тэдэниие захиран гаргагша Бурхан тэдэниие тоо тоогоорнь, нэрээрнь мэдэдэг. Тэрэнэй хүсэ шадал агууехэ, ямаршье юумэн Тэрээндэ дутуу байхагүй!

²⁷ Эзэн гай гасалангыем мэдэнэгүй, хэрэгни буруу шиидхэгдээ гэжэ юундэ гомдол баринабши, Яков, юундэ иигэжэ хэлэнэбши, Израиль?

²⁸ Мэдэхэгүй юм гүш? Дуулаагүй юм гүш? Эзэн – хэтэ мүнхэдөө оршодог Бурхан, Тэрэ бүхы дэлхэй байгуулаа. Тэрэ эсэдэггүй, тулидаггүй. Хэншье ухаан бодолыень мэдэхэгүй.

²⁹ Тэрэ ядарһанда тэнхээ үгэжэ, шадал дутаһанда хүсэ нэмээдэг.

³⁰ Залуушье хүн ядаран һуларжа, эдир хүбүүдшье бүдэрэн унадаг.

³¹ Харин Эзэндэ найдагшад шэнэ хүсэтэй болодог. Тэдэ бүргэд мэтэ жэгүүр дээрээ элин халиха, гүйхэдөө эсэхэгүй, алхалан ябахадаа сусахагүй.