Исай 36 - Библи

Ассири Иерусалимда занана

¹ Хэзэкияа хаанай арбан дүрбэдэхи жэлээ хан түрэеэ засаглажа байхада, Ассириин хаан Сэннахэрииб дайгаар добтолжо, сэрэгүүдээрээ Иудын бэхижүүлэгдэһэн бүхы хотонуудые тойрон бүһэлөөд, һүүлдэнь эзэмдэн абаба.

² Ассириин хаан Лахиишһээ Иерусалим руу Хэзэкияа хаанда найралгын үзэмэй дараһан архи аягалдаг эгээн ехэ даргаяа олон сэрэгтэй хамта эльгээжэ, бэеэ, хаан түрэеэ тушааха тухайнь эрилтэ табихыень захирба. Түшэмэл ноён харгын хажууда бүд будажа Сагаан болгодог газарта, хэмэл ехэ сөөрэм руу уһа урадхуулдаг һубагай хажууда тогтобо ха.

³ Тэрэнэй урдаһаа ордоной захирагша, Хилкияагай хүбүүн Элиакиим, бэшээшэ Шэбнаа, олондо тунхаг тараагша Асаапай хүбүүн Ёһаа гэгшэд гараба.

⁴ Ассириин түшэмэл ноён тэдээндэ хандажа, Хэзэкияа хаанай бэедээ найдан байһанай шалтагаан юун бэ гэжэ Ассириин агууехэ хаанай мэдэхэеэ һанаһан тухай хэлэбэ.

⁵ Тэрэ Ассириин хаанай иимэ үгэнүүдые дамжуулаа: – Ши хооһон үгэ хэлэнэш! Харин дайлалдаанда хүсэн, дүй дүршэл хэрэгтэй! Ши хэндэ найдан, минии урдаһаа эсэргүүсэн бодобош?

⁶ Египет туһалха гээд найданат. Теэд энэ болбол хухарһан таяг хэрэглэн, түшэһэндэл адли болохол! Хухарһан таяг дууһан хухаржа, альгыетнай шаажа, соо хадхахал. Египедэй хаан фараондо найдаха гээшэ энээндэл адли юм.

⁷ Али таанад Эзэн Бурхандаа найданабди гэжэ намда хэлэхэ гүт? Ямар Бурхандаа найданабта – Хэзэкияа хаанай мүргэлэй газарнуудыень, үргэлэй шэрээнүүдыень һандаргааһан Бурхандаа гү? Хэзэкияа Иудын болон Иерусалимай зондо гансал энэ газарта, Иерусалимда мүргэхэ, нэгэл шэрээ дээр үргэл хэхэ гээд заабарилаа һэн бэзэ.

⁸ Ши Ассириин хаантай, минии эзэнтэй боосоо хээшье һаа, шүүхэгүйш! Би шамда хоёр мянган мори үгэхэб. Тэдэниие унаха хүнүүдые суглуулжа шадаха юм гүш?

⁹ Ши минии эзэнэй мэдэлдэ байһан хизаар оронуудай эгээн хүсэгүй тулюур засаглагшадай али нэгэндэ харюу сохилто үгэжэ шадаха юм гүш? Али Египедэй дайшалхы тэргэнүүдтэ, тэрэнэй морин сэрэгтэ найдана гүш?..

¹⁰ Тиигээдшье би Эзэнэй зүбшөөлгүйгөөр энэ газарта дайлаха гэжэ ошохо һэн гүб? Үгы ааб даа. Энэ орон нютагта ошожо, һандарал ушаруулха тухайм Эзэн Өөрөө намда захираал!

¹¹ Тиихэдэнь Элиакиим, Шэбнаа ба Ёһаа тэрээндэ иигэжэ хэлэбэ: – Бидэнтэй араам хэлээр хөөрэлдэгты. Бидэ ойлгохобди. Еврей хэлэн дээрэ бү хэлэгты, зон хотын хэрэм хананууд дээрэһээ шагнажа байна.

¹² Гэбэшье Ассириин түшэмэл ноён тэдээндэ иигэжэ ганиран бадашаба: – Минии эзэн гансал танай хаанда болон таанадта эдэ бүгэдые хэлэхыем эльгээгээ гэжэ гү? Үгы! Таанадтай хамта бааһаяа эдижэ, шээһээ уужа байха табисууртай энэ хана дээрэ байгааша бүхы зондо энээниие соносхохыем хаамни эльгээгээ!

¹³ Тиигээд түшэмэл ноён бодожо, еврей хэлэн дээрэ шанга гэгшээр иигэжэ хэлэбэ: – Ассириин хаанай, агууехэ хаанай хэлэһэн үгэ шагнагты!

¹⁴ Хаан иигэжэ хэлэнэ: «Хэзэкияа таанадые мэхэлхэеэ болиг! Тэрэ таанадые абаржа шадахагүй!

¹⁵ Эзэндэ найдагты гэжэ тэрэнэй хэлэхэдэ бү этигэгты. Эзэн таанадые абархагүй, хотонуудыетнай эзэмдэхэ гэһэн зорилгоһоонь манай Ассириин сэрэгые хазагайруулхагүй.

¹⁶ Хэзэкияагай хэлэхые бү шагнагты!» Хотоһоо гаража, бэеэ тушаагты гэжэ Ассириин хаан захирна! Таанадай хүн бүхэн өөһэдынгөө уһан жэмэсэй эшын, инжир модоной жэмэсүүдые эдихэт, өөһэдынгөө худагай уһа уухат.

¹⁷ Һүүлдэнь Ассириин хаан таанадые таанадай орон нютаг мэтэ иимэл орон нютагта, орооһотой ба үзэмэй дараһан архитай орон нютагта, хилээмэтэй ба уһан жэмэстэй орон нютагта абаашаха.

¹⁸ Эзэн таанадые абарха гэжэ Хэзэкияа таанадые мэхэлнэ! Ондоо арадуудай бурхад өөрынгөө орон нютагые Ассириин хаанай гарһаа абараа юм аал?

¹⁹ Хамаат, Арпаадай бурхад мүнөө хаанаб?! Сэпарваһиимэй бурхад хаанаб?! Хэниинь Самариие минии гарһаа абарһан юм?!

²⁰ Эдэ орон нютагуудай бурхад нютагаа хэзээ намһаа абараа юм? Тиигээд мүнөө Эзэн Иерусалимые намһаа яажа абархаб?

²¹ Арад зон харюусангүй, дуугай байба. Юуб гэхэдэ, харюудань юушье дуугархагүй тухайнь Хэзэкияа хаан тэдээндэ захирһан байгаа бшуу.

²² Ордоной эрхилэгшэ Хилкияагай хүбүүн Элиакиим, бэшээшэ Шэбнаа, тунхаг зарлагша Асаапай хүбүүн Ёһаа уйдхар гашуудалаа мэдүүлжэ, өөһэдынгөө хубсаһа хахар-шуур татаад, Хэзэкияада ерэжэ, Ассириин түшэмэл ноёной хэлэһэн бүхы үгэнүүдые дамжуулба.