Исай 34 - Библи

Эзэн дайсадаа хэһээхэ

¹ Бүхы үндэһэ яһатад! Сугларан дүтэлжэ, шагныта! Бүхы газар дэлхэй, дээрэнь амидарагшад бултадаа соносохо болтогой!

² Эзэн бүхы үндэһэ яһатанда, тэдэнэй бүхы сэрэгтэ уурлаад байна. Тэдэниие хосорхо гээд Тэрэ шиидхээ.

³ Алуулһан бэенүүдынь хүдөөлүүлэгдэнгүй, үмхэй үнэр гаргажа хэбтэхэ. Тэдэнэй шуһанда хада ууланууд нэбтэрэн нэбшэн байха.

⁴ Наран, һара, мүшэд үмхирэн хуушарха, огторгойшье хуйламал ном мэтэ хуйлагдан хуряагдаха, үзэмэй модоной, инжир модоной набша мэтээр одо мүшэд доошоо унаха.

⁵ Эзэнэй һэлмэ огторгойдо хэрэг бүтээгээд, мүнөө шүүбэрилхэеэ Эдоом руу буужа байна, хюдаха гэжэ Эзэнэй шиидэһэн арад зон дээрэ буухаяа байна.

⁶ Үргэлэй хурьга ямаанай шуһа өөхэндэ адли шуһа өөхөөр Эзэнэй һэлмэ дууһан хушагдаатай байха. Эзэн иимэ үргэл, иимэ хюдалга Боцраада, Эдоомой орон нютагта хэхэеэ түсэблэнэ.

⁷ Һарлагууд, бухануудтал адли зон алдалан газарта унаха, газар шуһаар нэбшэжэ, тооһо шорой өөхэнтэй худхалдан ялаганажа байха.

⁸ Эзэнэй Сион абарха, дайсадһаа үһөө абаха саг энэл гээшэ.

⁹ Эдоомой голнууд дабирхай боложо, хүрьһэтэ газарынь шатажа байһан хүхэр болон хубилха. Иигэжэ энэ орон нютаг шатажа байһан дабирхайдал адли болохо.

¹⁰ Энэ үдэршье, һүнишье унтархагүй, утааниинь хэтэ мүнхэдөө дээшээ һуунагтан байха. Энэ орон нютаг үеһөө үедэ эзэгүйрэн, хэншье хэзээдэшье тэрээгүүр ябахагүй.

¹¹ Турлаагууд, шара шубууд, уулинууд, хирээнүүд Эдоомой газар дайда эзэлхэ. Эзэн энэ газарые ямаршье хэбэргүй, хооһон болгохо.

¹² Хаан шэрээ эзэлмээр хүн үгы болохо, мүртэй ударидагшад тэндэ байхагүй.

¹³ Ордонгуудаарнь, бүхэлэгдэһэн хотонуудаарнь үүргэнэ, халаахай ургажа, сүүбэн шонын, шара шубуудай байра тэрэ болохо.

¹⁴ Мануулнууд ба сүүбэн шононууд тиишээ ерэхэ, һаглагар тэхын дүрсэтэй аймшагтай амитад бэе бэеэ дуудан байха, һүниин эмэ мангас амарха газараа бэдэрэн, тиишээ ерэдэг байха.

¹⁵ Тэндэ далита могой үүрээ заһажа, үндэгөө даража, аршалан-хамгаалан байха. Элеэнүүд тэндэ сугларха.

¹⁶ Эзэн Бурханай ном олоод уншагты. Эдэ амитад хододоо суг байха гээд тэндэ бэшээтэй. Эзэн энээн тушаа захирһан гээшэ.

¹⁷ Эзэн Өөрөө газар уһа тэдэнэй хоорондо хубаагаа, тиимэһээ тэдэ энэ газарые хэтэ мүнхэдөө эзэмдэн, үеын үедэ тэндэ оршохо, ажамидарха болоно.