Исай 33 - Библи

Туһа эриһэн гуйлта

¹ Үшөө дээрмэдүүлэгдээгүй дээрмэдэгшэ, урбалга үшөө өөр дээрээ мэдэрээгүй урбагша ши! Шамда өөртэш гай тодхор хүрэхэ! Дээрмэдэжэ дүүргэхэдэшни өөрыеш дээрмэдэхэ, урбажа садахадашни өөртэшни урбаха!

² Оо, Эзэн! Маанадта нигүүлэсхыгээр хандыт. Бидэ Тандаал найданабди. Үглөө бүри бидэндэ хамгаалалта болыт, зоболоной сагта маанадые абарыт!

³ Аянгаар лужаганахадатнай, үндэһэ яһатад зугадана. Бодоходотнай, обогууд таран гүйлдэнэ.

⁴ Таршаа шумуулдал адляар, танай дундаһаа олзо суглуулаа бэлэй, таршаа шумуулдал адли, тэрэ олзо руу шуумайгаа бэлэй!

⁵ Эзэн үндэртэ залардаг, дээрэ Тэрэ оршодог. Тэрэ Сион дээр шударга ёһо, үнэн зүбые баталан байгуулаа.

⁶ Тэрэ танай ажабайдалда найдамтай аршалалта болохо. Үршөөдэг эрдэни зэндэмэнинь – мэргэн ухаан, эрдэм мэдэсэ, Өөрһөөнь түбэгшөөлгэ.

⁷ Харагты, зоригтойнуудтнай туһа эрин хашхаралдана. Эб найрамдал тухай хэлсээ баталхаяа һэдэһэн элшэнэртнай сурхирса уйлалдана.

⁸ Харгы замууд хооһороо, аяншад харагдахаа болёо. Хэлсээн эбдэгдэжэ, гэршэнүүд хараада абтахаяа болижо, хэншье хэнииешье хүндэлнэгүй.

⁹ Газар гашуудан хатаба. Ливаанай ой модоной набша уршын хатана, Шароон гэдэг үрэжэлтэ һайн газар элһэн сүл губидал адли болоо, Башаан ба Кармээлдэшье мододой набша шарлан унана.

Эзэн дайсадые һэргылнэ

¹⁰ Эзэн үндэһэ яһатадта иигэжэ айладхал буулгаба: Мүнөө одоо Би юумэ хэхэмни. Хэды ехэ хүсэ шадалтайгаа таанадта харуулхаб.

¹¹ Таанад хэндэшье хэрэггүй юумэ түсэблэнэт, ямаршье туһагүй юумэ хэнэт. Амисхаалтнай гал дүлэндэл адли, өөһэдыетнай залгиха.

¹² Таанад бусалжа байһан сагаан шохойдол, галда шатажа байһан үүргэнэдэл адли болохот.

¹³ Холо, ойрын арад яһатан, Минии хэһэн үйлэ хэрэгүүд тушаа шагныт, Минии хүсэ шадалые мэдэрэн ойлгыт!

¹⁴ Сионой нүгэлтэй зон айба, бурхангүйшүүл шэшэрбэ: «Залгидаг гал дотор хэмнай амидаржа шадахаб, хэтэ мүнхэдөө соробхилдог дүлэн дотор хэмнай амидаржа шадахаб?!»

¹⁵ Зүб шударга ябажа, үнэн сэхые хэлэгшэд, дарлалта доро байһан зонһоо мэхээр эдилгэ абахаһаа зайсагшад, улаан шуһа урдахуулхаяа гү, али үшөөшье ондоо муу хэрэг хэхэеэ байгааша зонһоо холодон ябаашад амиды мэндэ үлэхэл.

¹⁶ Тиимэ зон амар амгалан ажаһууха. Хабсагайн саана байһандал, тэдэ аюул гээшые мэдэнгүй ажамидарха, эдихэ эдеэтэй, ууха ундатай хододоо байха.

Ерээдүй һайн һайхан саг

¹⁷ Ялас гэмэ хааниие нюдөөрөө харахат, холуур нэмжыгшэ газарые обёорхот.

¹⁸ Татабари суглуулагшадһаа, хариин тагнуулшадһаа айха-һүрдэхэтнай һэегүй арилжа, гансал һанаандатнай үлэхэ.

¹⁹ Таанадай ойлгохогүй хэлэтэй, ехэрхүү бардам зантай хариин зониие бэшэ харахагүйт.

²⁰ Сион руу харыт! Найр наадаяа һайндэрлэдэг хото руугаа харыт! Иерусалим руу анхаралаа хандуулан ажаглыт! Ямар энхэ амгалан газар, хэзээшье хухархагүй гадаһануудтай, нэгэшье аргамжань таһархагүй майхандал адли тэрэ гээшэб!

²¹ Тэндэ бидэнтэй хамта агууехэ Эзэн заларха, тэрэ газарта урасхалнууд, үргэн гол мүрэнүүд байха, гэбэшье тэндэ уһа һэлигшэдтэй онгосонууд тамаран ерэхэгүй, мантан уһанай онгосо тиишээ тамаран орожо шадахагүй.

²² Эзэн манай Удамарша, манай Шүүгшэ, манай Хаан! Тэрэ бидэниие абарха!

²³ Аргамжануудтнай һула болоо, далбагын модо баринагүй, далбагануудые татаха арга байхагүй. Баян эд баялиг хубаарилагдаха, дохолоншье хүн зөөри буляан абахал.

²⁴ Манай газарта ажаһуудаг зоной нэгэнииньшье үбшэ хабшанби гэжэ гомдожо байхагүй, эндэ амидардаг бүхы зоной нүгэл арюудхагдаха юм.