Исай 32 - Библи

Үнэн сэхэ хаан

¹ Үнэн зүбөөр зонхилогшо хаан, шударга зүбөөр хэрэгүүдые шиидхэгшэ ударидагшад бии болохо.

² Эдэ удамаршадай хүн бүхэниинь һалхинһаа хорохо газар, шуурганһаа халхалха халхабша мэтэ, хуурай газараар урдагша уһанай һубаг, ангаһан-хатаһан газарта үндэр хабсагайн һүүдэр мэтэ болохо.

³ Зоной хэрэгүүдтэ тэдэ нюдэ балай, шэхэ дүлии мэтээр хандахагүй.

⁴ Яарадаг зоной ухаан номгорхо, һанаһанаа ойлгуулжа шададаггүйшүүл эли тодоор хэлэдэг болохо.

⁵ Муу хүниие хэншье боди сагаан сэдьхэлтэй гэхэгүй, этэгээдые хэншье сэхэ хүн гээд нэрлэхэгүй.

⁶ Муу хүн удхагүй юумэ дуугардаг, муу юумэ хэхэеэ һанажа байдаг. Тэрэ үлэсхэлэн хооһон хүнһөө эдеэ хоол буляан абажа, ангаһан хүнһөө унда буляажа, Эзэниие доромжолон хэлэдэг, муу юумэ хэдэг.

⁷ Тэнэг хүнэй ажаябуулганьшье муу муухай. Тэрэ хорото муу арга мэхэнүүдые зохёожо, үгытэй зониие худал хуурмаг үгэнүүдээр хүрмэжэ хосорооно, хуулита эрхэ түлөөлгэнүүдынь үгэнэгүй.

⁸ Харин боди сагаан сэдьхэлтэн зүб шударга хэрэг ябуулдаг, үнэн зүбэй түлөө хододоо тэмсэдэг.

Байдал һэргэхэ

⁹ Ямаршье юумэндэ һанаагаа зобонгүй, һэли-дэлихэн хүнгэн ажаһуудаг эхэнэрнүүд, минии хэлэхые шагнагты.

¹⁰ Ерэхэ жэлдэ таанад зобохо-тулихат. Юуб гэхэдэ, суглуулха үзэм ургахагүй.

¹¹ Таанад ехэ хүнгэн, сүлөөхэн ажаһуугаат, харин мүнөө айн шэшэрыта! Хубсаһаа тайлан нюсэгэлжэ, бэлхүүһээрээ таар орёогты.

¹² Һандаргагдаһан үрэжэлтэ талмай, үзэмэй модоной сэсэрлигүүд тушаа гашуудан, өөһэдынгөө сээжэ сохин байгыт.

¹³ Минии арад түмэнэй газар нютагта үүргэнэ ба халаахай ургаха. Зугаа наадаар дүүрэн хото, баяр жаргалтай зонтой эдэ гэрнүүд һалан һандархал, тэдээн тушаа гашуудан уйлыта!

¹⁴ Ордоншье хаягдан, шууяатай хотошье хооһорон мартагдаха, хэрэм самхагуудынь һандаргагдаха, малай бэлшээри, хулангуудай хорёо болохо.

¹⁵ Гэбэшье Бурхан бидэндэ дээрэһээ Һүлдөө дахин эльгээхэ. Тиихэдэнь зэлүүд хооһон газар үрэжэл шэмэтэй болохо, таряалангуудаар баян ургаса ургаха.

¹⁶ Энэ сүл губида үнэн шударга ёһо тогтохо, үрэжэлтэ таряаланда үнэн зүб оршохо.

¹⁷ Үнэн зүб хадаа энхэ тайбаниие асарха, үнэн шударга хадаа амгалан, аюулгүй байдал хэтэдээ үршөөхэ.

¹⁸ Бурханай арад түмэн һанаа амархан, энхэ тайбан, аюул гээшые мэдэнгүй гэрнүүдтээ ажамидарха.

¹⁹ Ой модые мүндэр сохижо, хото һандаргагдабашье,

²⁰ ургаса таряагаа уһалха дүүрэн уһатай, үхэр малаа, элжэгэеэ сүлөөтэй бэлшээхэ аргатай зон хэды ехэ жаргалтай байхаб даа!