Исай 31 - Библи

Бурхан Иерусалимые аршалха

¹ Египедһээ туһа эрихэеэ ошогшод дэмы һалаха! Тэдэ Египедэй олон моритой, тэргэнүүдтэйдэнь, мори унаашадайнь хүсэтэйдэ найдана, харин Израилиин Нангин Эзэндэ түшэглэнэгүй, найданагүй, туһа эринэгүй.

² Эзэн Бурхан сэсэн мэргэн ухаатай! Гай тодхор Тэрэ татаха. Нүгэл хэгшэдые, мүн тэдээндэ туһалагшадые хэһээхэ гэжэ шиидээл хадаа Тэрэ хэһээхэ, үгэеэ һөөргэнь абахагүй.

³ Египедэй зон Бурхан бэшэ, юрын лэ зон ха юм даа. Тэдэнэй морид миин моринһоо үлүү бэшэ. Эзэнэй гараа һунгахадань, тэрэ туһалжа байгааша хүсэтэй зон бүдэржэ, туһалуулжа байһан хүсэгүй зон унажа, тэдэ хамта хосорхо.

⁴ Эзэн намда иигэжэ айладхаа: Олон хонишодой хамта хашхаран хуугайлбашье, олзо дээрээ архирагша арсалан тэдэнһээ айдаггүй. Тэрээндэл адли Намайе, Түмэн Сэрэгтэ Эзэниие, Сион уула хамгаалхадам тогтоохо, һаад хэхэ хүсэн байхагүй!

⁵ Дальбараануудаа хамгаалан, уурхай дээрээ элин-халин байдаг шубуундал, Би, Түмэн Сэрэгтэ Эзэн, Иерусалимые бүглэхэб, аршалхаб, хайрлахаб, абархаб.

⁶ Израилиин улад зон, таанад Эзэн Бурханаа орхижо, ехэ нүгэл хээт, гэбэшье һөөргөө Тэрээндээ бусыт!

⁷ Нүгэл үйлэдэн, алта, мүнгөөр шүтөөнүүдые хээт. Гэбэшье хүн бүхэнэй тэдэ шүтөөнүүдээ хаяха саг ерэжэ байна.

⁸ Эзэн иигэжэ айладхана: Ассири дайн дажарай үедэ диилдэхэ, харин хүнэй хүсэ шадал тэрэниие диилэхэ бэшэ. Ассириин улад зон байлдаанһаа зугадан гүйхэ, залуушуулынь богоолнууд болохо.

⁹ Ехэ айн-һүрдэн, тэдэнэй хэрэм бутаран унаха, ударидагшадынь зугадаха, байлдаанай тугһаа айха. Энэ болбол Иерусалимда тахилгатай, Сион дээрэ үргэлэй галтай Эзэн тунхаглаа мүн!