Исай 30 - Библи

Египедтэй ямаршье ашагүй хэлсээн

¹ Эзэн иигэжэ айладхана: «Үгыем дууладаггүй Иудын хан түрын ударидагшадтай гай гасалан тохёолдохо! Тэдэ Намгүйгөөр зүбшэнэ, хүсэлдэм харша холбоо тогтооно. Иигэжэ тэдэ нүгэл дээрээ нүгэл хэнэ.

² Тэдэ Намтай зүбшэнгүй, туһа гуйжа Египет руу ябаа, Египедэй фараондо найдажа, аршалхыень гуйгаа.

³ Теэд фараондо найдаһаниинь гансал нэрыень хухалха, Египедэй һүүдэртэ хорохо гэһэниинь нэрынь гутааха.

⁴ Египедэй хотонууд болохо Цооһанда ударидагшадынь ба Ханээс руу элшэнэрынь хүрөөшье хадань

⁵ ямаршье туһагүй, мүн тиихэдэ эшхэбтэр байдалда оруулһан үндэһэ яһатанһаа тэдэнэр эшэдэг болохо».

⁶ Урда зүгэй элһэн сүл губиин амитад тушаа Эзэнэй буулгаһан айладхал энэ: Арсаланай, хорото могойн, луугай һуурижаһан аймшагтай орон нютагаар элшэнэр аяншална. Элжэгэдтээ, тэмээнүүдтээ хүндэ ашаа тээн, тэдэ ондоо арад зондо бэлэг-сэлэг абаашахаяа һэдэнэ. Теэд тэрэ арад өөһэдтэнь ямаршье туһа хүргэхэгүй.

⁷ Египедэй туһа ямаршье ашагүй, хооһон. Тиимэһээ Би «Аюулгүй Рааһаб» гэжэ Египедые нэрлэнэб.

Үгэ дуулахагүй зон

⁸ Мүнөө яба, шулуун хабтаһан дээрэ тэдээндэ энээниие зура, хуйламал ном руу эдэ үгэнүүдые бэшэ! Тэдэ ерээдүй сагта үлэг лэ, хододоо, хэтын хэтэдэ.

⁹ Юуб гэбэл, тэдэ буһалгаата арад, худалша зон, Эзэнэй һургаал шагнахаяа арсагшад.

¹⁰ Тэдэ үзэлшэдтэ «үзэл бү үзэгты» гэнэ, мэдэлшэдтэ «мүн болохо юумэ бидэндэ бү харуулагты, бидэнэй дуулахаяа һанаһан юумэ хэлэгты, аятай юумэ мэргэлэгты.

¹¹ Замһаа зайлагты, харгыһаа хадуурагты, Израилиин арюун Бурхан тушаа дуулахаа һананагүйбди», – гэжэ тэдэ хэлэнэ.

¹² Тиимэһээ Израилиин арюун Бурхан иигэжэ айладхана: «Минии айладхал дууланагүйт, дарлалтада найдажа, мэхэ гоходо түшэглэбэт.

¹³ Энэ нүгэл хадаа үндэр ханада бии болоһон хэмхэрэл, гэнтэ, хараа байса хамхаран унаха ханын нүхэн мэтэ таанадта болохо.

¹⁴ Шабар һабадал адляар бутаран һалахат. Аһажа байгаа нүүрһэ удхаха гү, али уһанай һабаһаа уһа удхаха шабар хэлтэрхэйшье үлэхэгүй».

¹⁵ Израилиин нангин Эзэн Бурхан арад түмэндэ иигэжэ хандана: «Бусагты Намдаа. Тиигээ һаа, таанад абарагдажа, аюулгүй амгалан ажаһуухат». Теэд таанад энээнһээ арсанат.

¹⁶ Энээнэй орондо таанад дайсадһаа тэрьедэхэеэ, хурдан морёор гүйлгэхэеэ һананат. Моримнай хурдан гэжэ һанахадатнай танһаа хурдан моритой дайсад байхал.

¹⁷ Дайсанай нэгэ сэрэгшые харахадаа, танай мянган сэрэгшэд зугадан тэрьедэхэл. Табаншье сэрэгшэ таанарые һүрдөөхэ. Гүбээгэй оройдо ори ганса тугһаа бэшэ ондоо юумэн үлэхэгүй.

¹⁸ Гэбэшье Эзэн хүлеэжэ, таанадые хайрлаха. Тэрэ бодожо, таанадта туһалха. Юуб гэбэл, Эзэн гээшэ зүб шударга Бурхан, Тэрээндэ этигэн һүгэдэгшэд жаргал эдлэхэ!

Бурхан Өөрын арад түмэниие үреэхэ

¹⁹ Сион дээрэ, Иерусалимда ажаһуугша арад! Танай нёлбоһод хатаха. Абарал тушаа гуйхадатнай, Эзэн таанадта туһалха, таанадые дуулажа, харюу үгэхэ.

²⁰ Эзэн таанадта уйдхарай эдеэ эдюулээшье һаа, зоболонгой уһаар ундалуулаашье һаа, саашадаа хоргодохогүй, нюдөөрөө Багшаяа харахат!

²¹ Харгы замһаа баруун, зүүн зүгүүд руу хадууран байбал, таанад ара тээһээ Тэрэнэй иимэ абяа дуулахат: «Харгы – тэндэ. Тэрээгүүр ябагты!»

²² Таанад мүнгөөр хушаатай онгонуудаа, алтаар бүрхөөтэй хүрэгүүдээ абажа, муухай юумэндэл, бог шоройдол адляар холо хаяхат: «Зайлагты!»

²³ Орооһо тариха бүхэндэтнай Эзэн бороо хура эльгэжэ, баян ургаса үршөөхэ. Малтнай һайн бэлшээритэй байха.

²⁴ Танай таряалангуудта ажалладаг сар, элжэгэнүүд эгээл һайхан эдеэ хоол эдидэг байха.

²⁵ Дайсадые олоор алаһан, хэрэмүүдэйнь унаһан тэрэ агууехэ үдэр хада уула бүхэнһөө, гүбээ бүхэнһөө уһан урдаха.

²⁶ Һара, нарандал адли ялагар шанга гэрэлтэй болохо, наран хэмһээ долоо дахин ялагар хурса болохол. Эзэнэй арад түмэндөө ушаруулһан гай гасалангай дүүрэжэ, шархануудайнь эдэгэжэ эхилхэдэ, эдэ бүгэдэ тохёолдохо.

Бурхан Ассири хэһээхэ

²⁷ Аяар холоһоо Эзэнэй нэрэ дүтэлжэ байна. Уур хилэнгынь галаар бадаржа, дүлэнгынь угаа шанга. Аманиинь хилэнгээр дүүрэнхэй, хэлэниинь үрэбхидэг галдал мэтэ!

²⁸ Амисхалынь ама хаажа байһан үертэл адли, арадуудые үхэлэй һагшуураар Тэрэ һагшаха. Тэрэ арадуудай үрүүндэ замһаань хадууруулха хазаар байна.

²⁹ Харин таанад нангин һайндэрэй һүнидэл дуу дуулахат. Эзэнэй хада руу, Израилиин хабсагай руу лимбээр хүгжэмлэн ябаашадтал адли сэдьхэлтнай баясан байха.

³⁰ Эзэн һүрдэмэ шанга хоолойгоор бужаганажа, гараа һунган сохихо. Уур хилэнгынь угаа ехэ, үрэбхилдэг галай дүлэн дүлэгэнэхэ. Шуурган, үер, мүндэр орожо эхилхэ!

³¹ Эзэнэй дуу шагнахадаа, Ассириин зон һүрдэхэ, баягаар Эзэндэ сохюулха.

³² Хэнгэрэг, ятагай абяан доро Эзэн тэдэниие баягаар дахин-дахин сохихо, хооһоруулма дайн дажараар урдаһаань тулаха!

³³ Ассириин хааниие асари ехэ галда шатааха газар үнинэй бэлдэгдэнхэй. Тэрэ газар гүнзэгы, үргэн. Тэндэ үндэрөөр ябталаатай түлеэе шатаахын тула Эзэн гал дүлэ аманһаа гаргаха!