Исай 3 - Библи

Иерусалимдахи эхи захагүй байдал

¹ Харагты, Түмэн Сэрэгтэ Эзэн Бурхан хангамжа, туһаламжа Иерусалим болон Иудын хан түрэһөө зайлуулха гэжэ байна. Тэрэ эдеэ хоол, уһыень,

² баатарнууд ба сэрэгшэдыень, шүүгшэд ба лүндэншэдыень, мэдэлшэд ба аха захатанииень,

³ сэрэгэй ноёд болон эрхим ударидагшадые, дүй дүршэлтэй зүбшэгшэд болон ерээдүйе түсэблэхэ, ойлгуулха эди шэдитэйшүүлые абан зайлуулха гэжэ байна.

⁴ Ударидагша болгон үхибүүдые Тэрэ табиха, тэдэниие хүүгэд хүтэлхэ.

⁵ Хүн бүхэн бэе бэеэ дарлажа байха. Залуушуул аха захатанаа хүндэлхэеэ болихо, хара зон нэрэ түрэтэйшүүлээ хүндэлхэгүй.

⁶ Уг унги нэгэ зон нэгэеэ шэлэжэ, иигэжэ хэлэхэ сагынь ерэхэ: «Маанадта орходоо та нэмэргэтэй байна гээшэт, тиимэһээ энэ хүндэ сагта манай удамарша болыт!»

⁷ Теэд тэрэ хүн харюусан хэлэхэ: «Би хэндэшье туһалжа шадахагүйб. Гэртэмни эдихэ хоол, хубсаһа хунаршье байхагүй. Танай удамарша боложо шадахагүйб!»

⁸ Иерусалим бүдэрэн унахаяа байна, Иудын хан түрэ доройтон һандарна, юуб гэхэдэ, тэдэ Эзэнэй урдаһаа һөөргэдэн дуугарна, хэрэг ябуулна, Алдарта Бурханай хараа нюдэндэ энэ доромжолол мүн.

⁹ Нюур шарайень харахада, нүгэлтэйень ойлгохоор. Тэдэ Содомой зондол адли нүгэлөө нюунагүй, һайрхан һагад хөөрэнэ. Өөһэдөөл өөһэдтөө гай тодхор татаа гээшэл.

¹⁰ Зүб шударга ябадалтай зон үйлэдэһэн хэрэгэйнгээ буян эдлэхэ, энэ болбол ехэ зүб гээд дэмжыт.

¹¹ Хара һанаатан золгүй байха. Ондоо зондо юу хээ һэм – тон тиимэ юумэн тэдээндэ өөһэдтэнь хүрэхэ.

¹² Хүүгэд арад зониием дарлажа, эхэнэрнүүд арадыем хүтэлбэрилнэ. Арад түмэмни! Удамаршадтнай таанадые төөрюулжэ, зүб харгыһаатнай хадууруулаа.

Эзэн арадаа шүүбэрилхэ

¹³ Эзэн зарга мэдүүлхэеэ бодожо, арадуудые шүүхэеэ зэһэбэ.

¹⁴ Эзэн арад түмэнэйнгөө ахалагшадые болон ударидагшадые шүүн, иигэжэ айладхана: «Таанад үзэм жэмэсэй сэсэрлиг хооһоруулаат, үгытэй ядуу зонһоо буляажа абаһан зөөри гэртэтнай байна.

¹⁵ Ямар эрхэтэй аад, арад түмэниием дарланабта, үгытэй ядуу зониие юундэ баһанабта? Энэ болбол Би, Түмэн Сэрэгтэ Эзэн Бурхан, айладажа байнаб!»

¹⁶ Эзэн иигэжэ айладаба: «Харыт, Сионой эхэнэрнүүд бардам гээшэнь! Тэдэ хамараа өөдэнь үргөөд, нюдөөрөө наадажа, хүлдөө бугааг жэнгирүүлэн, гоо гоёмсуугаар алхалан ябанал.

¹⁷ Теэд Би тэдэниие хэһээхэб – толгойень хюһажа, халзан болгохоб!»

¹⁸ Эдэнэй гоёолтыень – хүлэйнь бугааг, толгойн зүүлтэ, һарын түхэлтэй зүүдхэлнүүдыень,

¹⁹ һиихэнүүдыень, гарай бугаагуудые, нэмэргэнүүдые, толгойн боолто, хүлэй гэнжэ, бүһэнүүдые, хангалтай түрхилгэнүүдые, һахюуһыень,

²⁰ бэһэлиг, хамарай сахариг,

²¹ гоёолой хубсаһыень, гадар самса, нэмэргэнүүдыень, мүнгэ хэдэг багахан сүүмхэнүүдыень,

²² гэрэл, дотор хубсаһа, аршуулнуудые, нэмэргэнүүдыень Эзэнэй абажа хаяха үдэрынь дүтэлөө.

²³ Анхилдаг һайхан сүршэлгын орондо үмхэй муухай үнэртэй, гоё һайхан бүһэнүүдэй орондо аргамжатай, гоёлой хубсаһанай орондо онги-набта хубсаһатай, гоё һайхан үһэнэй орондо халзан тэдэ болохо.

²⁴ Хотын эрэшүүлые һэлмэ жада хороохо, баатарнууд дайнда алдалан унаха.

²⁵ Хотын бартаануудай хажууда орилоон, бархираан гараха, Иерусалим хадаа дээрмэдүүлһэн, шараа нюсэгэн, газар дээрэ һуужа, бархиржа байһан эхэнэртэл адли болохо.