Исай 29 - Библи

Иерусалимай хуби заяан

¹ Ариээл, Ариээл! Давидай хотон хүреэнээрээ байгааша хото! Гай тодхор шамтай тохёолдохонь лэ! Баян дэлгэр хүндэтэй найр наадануудаа жэлһээ жэлдэ жэгдэ хэжэл байгты.

² Харин Бурхан «Бурханай үргэлэй шэрээ» гэдэг хотодо гай тодхор татаха ёһоороол татаха. Тэндэ уй гашуудал, шаналал болохо, шуһаар дүүрэнхэй үргэлэй шэрээдэл адли энэ хото болохо.

³ Эзэн хотые тойроод бүһэлжэ, харуулай самхагуудые тойруулан бодхоохо, бүһэлүүр барилгануудые бариха.

⁴ Газар дороһоо дуугаржа байһан хии юумэндэл адли, тооһо шорой дороһоо шэбэнэжэ байһан хоолойдол адли Иерусалим болохо.

⁵ Иерусалимда добтолһон дайсад тооһондол мэтээр үлеэгдэн һалаха, тэдэнэй аймшагтай сэрэг һолоомодол хиидэн үгы болохо. Гэнтэ, нюдөө сабшама зуура

⁶ Түмэн Сэрэгтэ Эзэн аянга буулган, газар хүдэлгэн, ехэ дуу шуугаар, хуй һалхяар, шуургаар, түймэрэй галаар таанадые абарха.

⁷ Ариээл руу добтологшо үй түмэн арадуудай сэрэг дайтаха, хэрэм ханануудыень бүһэлхэ, бүхы талаһаа хашаха, зүүдэн мэтэ, һүниин үзэгдэл мэтэ болохол!

⁸ Гэдэһээ үлдэһэн хүн эдижэ байнаб гэжэ зүүдэлээд һэрихэдээ, һанааниинь дутуу байдаг. Ангаһан хүн уһа уужа байнаб гэжэ зүүдэлээд һэрихэдээ, аман хатанхай байһанаа ойлгодог. Сионой хада – Иерусалимда добтолхоёо бэлдэжэ байгааша үй түмэн арадуудтай тон тиимэ юумэн болохо.

Һэргылэлтэнүүд

⁹ Зог татагты, газарта шаагдаһандал бологты, һохор бологты, нюдэгүй! Һогтогты, харин үзэмэй дараһан архиһаа боложо бэшэ! Найгалзагты, харин шара айрагһаа ушарлажа бэшэ!

¹⁰ Эзэн таанадые гүн нойрто абтуулаа. Лүндэншэд, нюдыетнай хаагаа! Үзэлшэд, толгойетнай боогоо!

¹¹ Үзэгдэл бүхэнэй удха таанадһаа далда, ласадаһан номдол адли танда байха. Уншажа шададаг хүниие уншажа үгэхыень гуйхадатнай, тэрэ ласадаһан шалтагһаань уншажа шадахагүй.

¹² Уншажа шадахагүй хүниие уншажа үгэхыень гуйхадатнай, тэрэ яагаад уншахаяа мэдэхэгүйб гэжэ харюусаха.

¹³ Эзэн иигэжэ айладхаа: «Энэ улад зон Намда зальбарна, теэд үгэнүүдынь удхагүй хооһон, тэдэ хэлэ амаараа Намайе хүндэлнэ, харин зүрхэ сэдьхэлдээ Нам тухай огто бодоногүй. Тэдэнэй шүтэхэ зүйлынь гэбэл, гансал зоной ёһонууд, заншалнууд.

¹⁴ Тиимэһээ Би энэ арадтай гайхалтай, урид үзэгдөөгүй хэрэгүүдые дахин хэхэб, Сэсэн мэргэшүүлэй ухаан үгы болохо, ухаатай зоной ухаан һалаха».

Ерээдүй сагта найдалга

¹⁵ Һанаан бодолоо Эзэнһээ оро таһа нюужа байгаашад хосорхо ёһоороо хосорхо! Тэдэ үйлэ хэрэгүүдээ нюусаар хэхэдээ, хэншье харахагүй, хэншье мэдэхэгүй гээд һанана.

¹⁶ Тэдэ бүхы юумэ урбалдуулан байна. Шабараар юумэ бүтээдэг дархан ба шабар – хэниинь дээрэ гээшэб? Танай хэһэн бүтээл танһаа арсажа байдаг юм аал?!

¹⁷ Угаа богони сагай үнгэрхэдэ, үдхэн шэрэнги ой модон үрэжэлтэй таряалан болохо, харин таряалангууд ой модоор бүрхөөгдэхэл.

¹⁸ Тэрэ сагай мандахада, дүлии зон хуйламал номой үгэ соносожо, харанхыда байгааша һохор зоной нюдэн харадаг болохол!

¹⁹ Үгытэй зон Эзэнһээ шэнэ баярта хүртэхэ, ядуу улад Израилиин арюун Бурхан тушаа баясан байхал.

²⁰ Зониие дарлажа байгаашадта, Бурханиие хүндэлдэггүйшүүлдэ энэ хадаа эсэс болохо. Гэмтэй хүн бүхэн хюдагдаха.

²¹ Ондоо зониие худалаар хардагшадые, хэрэг шүүгшые мэхэлэгшэдые, зүб шударга зониие худал баримтаар буруутан болгогшодые Эзэн хюдаха.

²² Абраһаамые гай гасаланһаа абарагша Яковай уг удамай Эзэн Бурхан иигэжэ айладхана: «Минии арад түмэн, таанад саашадаа нэрээ хухалхагүйт, эшхэбтэр муу байдалда ороһонһоо боложо, таанадай нюур шарай бэшэ сухигар болохогүй.

²³ Минии таанадта үршөөхэ үри хүүгэдээ хараха-үзэхэдөө, нэрыемни нангинаар сахин хүндэлдэг болохот, Намайе Яковай арюун Бурхан гээд мэдэрхэт. Израилиин Бурхан Минии урда шэшэрэлдэн байхат.

²⁴ Алдуу эндүү хэжэ байгаашад ойлгодог болохо, гэмэрэлдэн байгаашад заабари хүлеэн абаха».