Исай 28 - Библи

Хойто хаан түрэдэ һэргылэлтэ

¹ Эпрааимай һогтуу зоной бахархадаг гүрлөө сэсэг, Эпрааимай хагдаржа байгаа сэсэг, шэмэг, солонь, үзэмэй дараһан архида диилдэһэн зоной ажаһуудаг баян нюруу газар дээгүүр дүүлиһэн сэсэг гай тодхорто орохо!

² Үзөөрэйгты, шуурган мүндэр, сүйд хэдэг хара һалхин мэтэ, үерлэһэн уһанай хүсэтэ урасхал мэтэ шадалтай, хүсэтэй нэгэн Эзэндэ бии. Тэрэ газардан хаяха,

³ Эпрааимай һогтуу зоной бардамладаг гүрлөө сэсэгые ула доогуураа гэшхэхэ!

⁴ Эпрааимай хагдаржа байгаа сэсэг, шэмэг, солонь, баян нюруу газар дээгүүр дүүлиһэн сэсэгтэй юун болохоб гэхэдэ, сагһаа урид эдеэшэһэн инжиртэл адли юумэн болохо: тэрэниие хэн үзэн харанаб, тэрэ дары таһалан залгиха!

⁵ Амиды үлэһэн Өөрын зондо Түмэн Сэрэгтэ Эзэнэй үзэсхэлэнтэ титимдэл адли болохо саг дүтэлжэ байна.

⁶ Шүүгшэдтэ зүб шударга байха сэдьхэл, хотын бартаануудые дайсадһаа хамгаалжа байгаашадта шэн зориг Тэрэ үршөөхэ.

Иудын хан түрын һогтуу лүндэншэд ба Исай

⁷ Лүндэншэд, санаартадшье хүрэтэрөө үзэмэй дараһан архиһаа найгажа, шара айрагһаа алмайржа байна. Бурханай эльгээһэн үзэгдэлые лүндэншэ ойлгожо шадахаар бэшэ һогтуу, хэрэгүүдые шиидхэжэ шадахаар бэшээр санаартад һогтуу.

⁸ Тиигээд бүхы шэрээнүүдынь хуу бөөлжэһэн болонхой, сэбэр ямаршье газар үгы.

⁹ Иимэ хүн хэндэ эрдэм заажа шадахаб, хэндэ мэдээ ойлгуулхаб?! Хүхэнһөө һаял һалаһан багашуулда гү?!

¹⁰ Тэрэ дабтаад һаланагүй: «Заабари, заабари, дүрим, дүрим, тэндэ нэгэ бага, эндэ нэгэ бага…».

¹¹ Үгыень дуулахагүй һаань, танигдахагүй хэлэнүүд дээрэ шулганаһан хариин зоноор, Эзэн энэ арадта һургаал заабари дамжуулхал.

¹² Та бүгэдэндэ амархые Тэрэ дурадхаа бэлэй, харин таанад үгыень дуулахаяа арсаат.

¹³ Тиимэһээл Эзэнэй үгэнүүд таанадта «заабари, заабари, дүрим, дүрим, тэндэ нэгэ бага, эндэ нэгэ бага…» болохо. Тиимэһээл таанад алхахадаа, бүдэржэ унахат, шархатан, урьхада орожо баригдахат.

Сионой һуури табигдаха

¹⁴ Эндэ, Иерусалимда, арад зониие ударидажа байгааша бардам зантай удамаршад, Эзэнэй айладхал шагныта!

¹⁵ Үхэл хаталтай хэлсээ хэнхэйбди, үхэлэй оронтой үгэеэ ойлголсонхойбди гэжэ һайрхан дуугарнат. Гай тодхор таанадые зайлан гараха, худал хуурмаг, мэхэ гохо таанадые аршалха гээд һананат.

¹⁶ Харин Эзэн Бурхан иигэжэ айладхана: «Бата найдамтай, мантан һууриин шулуу, эрдэни шулуу, хатуу шулуу Сион дээрэ мүнөө Би табинаб. Бата этигэлтэй нэгэн айхагүй.

¹⁷ Һууриин шулууе хэмжэхэ шугам хадаа шударга ёһо болохо, тэрээниие тодоруулан харуулһан зурлаа хадаа үнэн зүб болохол. Танай худал хуурмагай хорохо газар шуурган мүндэртэ үгы хэгдэхэ, уһан үер аюулгүй байдалыетнай таһалдуулха.

¹⁸ Үхэл хаталтай хэһэн хэлсээнтнай, үхэлэй оронтой байгуулһан гэрээтнай мүн бэшэ болохо. Гай тодхорой дайран үнгэрхэдэ, таанад гэшхэгдэн һалахат!

¹⁹ Энэ хадаа таанадые дахин-дахин дайран байха. Үглөө бүри, үдэр һүнигүй тэрэ дайран үнгэрхэ. Тэрээн тушаа дуулаһан хүн бүхэн айн-һүрдэн байхал!»

²⁰ Орон богони, һунажа хэбтэхын аргагүй; хүнжэл бага, бэеэ хушахын арагагүй.

²¹ Эзэн Пэрациим уула дээрэ болон Гибэһооной нюрууда уурлан хэһэн үйлэ хэрэгүүдээ, гайхалтай хэрэгүүдээ, хэхэеэ байна. Тэрэ Өөрынгөө ажал хэрэг, гайхамшагта ажалаа, хэхэ.

²² Минии һэргылхэдэ, наада бү баригты! Тиигээ һаа, таанад тэрьедэжэ шадахагүйт. Түмэн Сэрэгтэ Эзэнэй бүхы орон нютаг хюдан һалгааха гэһэн түсэб тушаа би дуулаһан байнаб!

Бурханай гүн сэсэн ухаан

²³ Минии хэлэхые шагнагты, дуулгаһыем анхарагты.

²⁴ Ургаса тариха үе сагай ерэхэдэ, таряашан гансахан лэ газараа хахалжа, борнойлжо байдаггүй.

²⁵ Газарай хүрьһэ элдүүрилһэнэй удаа тэрэ укроп болон тмин мэтэ ургамалай үрэ таридаг. Тэрэ шэниисэ болон ешмээн жэгдээр һуулгадаг. Таряалангай захаар тад ондоо орооһо тэрэ тарина.

²⁶ Ажалаа яагаад хэхэеэ тэрэ мэдэнэ. Юуб гэхэдэ, Бурхан тэрэниие һургаа бшуу.

²⁷ Укроп болон тминэй үрэ сохин хадахын тула тэдэ хэзээдэшье хүндэ лантуу хэрэглэдэггүй, хүнгэхэн һабаануудаар сохидог.

²⁸ Талхан болгохын тула үрэ таряае буталжа үйрүүлхэ хэрэгтэй. Тиимэһээ тэдэ дүмүүхэнээр орооһо үйрүүлдэг. Орооһо гамтайгаар бутарган, мори тэргэ ябуулдаг.

²⁹ Эдэ бүгэдэ шадабари Түмэн Сэрэгтэ Эзэнһээ олгогдонхой. Тэрэнэй зүбшэл гайхамшагтай, мэргэн ухааниинь агууехэ юм!